Koi ummeed bar nahin aati

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 115 chapter_title: Koi ummeed bar nahin aati chapter_slug: "115-koi-ummeed-bar-nahin-aati" variant_id: "0039edae-6eab-482d-85c6-e26475d7cd9a" content_type: transliteration layout: verse language: Urdu source_language: Urdu language_direction: ltr script: latin word_count: 116 estimated_read_time: 1

Koi ummeed bar nahin aati Koi soorat nazar nahin aati

Maut ka ek din muayyan hai Neend kyun raat bhar nahin aati

Aage aati thi haal-e-dil pe hansi Ab kisi baat par nahin aati

Jaanta hoon sawaab-e-ta'at-o-zohd Par tabiyat idhar nahin aati

Hai kuch aisi hi baat jo chup hoon Varna kya baat kar nahin aati

Kyun na cheekhoon ke yaad karte hain Meri aawaaz gar nahin aati

Daagh-e-dil gar nazar nahin aata Bu bhi ae chaara-gar nahin aati

Hum wahan hain jahaan se hum ko bhi Kuch humari khabar nahin aati

Marte hain aarzoo mein marne ki Maut aati hai par nahin aati

Kaaba kis munh se jaoge 'Ghalib' Sharm tum ko magar nahin aati