Kisi ko de ke dil koi nawasanj-e-fughan kyun ho

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 112 chapter_title: "Kisi ko de ke dil koi nawasanj-e-fughan kyun ho" chapter_slug: "112-kisi-ko-de-ke-dil-koi-nawasanj-e-fughan-kyun-ho" variant_id: "3b4a1e56-d2ba-42e8-86d2-c86881b705ea" content_type: transliteration layout: verse language: Urdu source_language: Urdu language_direction: ltr script: latin word_count: 229 estimated_read_time: 2

Kisi ko de ke dil koi nawasanj-e-fughan kyun ho Na ho jab dil hi seene mein toh phir munh mein zubaan kyun ho

Woh apni khoo na chhorrein-ge hum apni waza kyun chhorrein Subuk-sar ban ke kya poochein ke hum se sargiraan kyun ho

Kiya gham-khwaar ne ruswa, lage aag is mohabbat ko Na laawe taab jo gham ki woh mera raazdaan kyun ho

Wafa kaisi kahan ka ishq, jab sar phorna thehra Toh phir ae sang-dil tera hi sang-e-aastaan kyun ho

Qafas mein mujh se roodaad-e-chaman kehte na dar humdum Giri hai jis pe kal bijli woh mera aashiyaan kyun ho

Yeh keh sakte ho hum dil mein nahi hain par yeh batlao Ke jab dil mein tumhi tum ho toh aankhon se nihan kyun ho

Ghalat hai jazb-e-dil ka shikwa, dekho jurm kis ka hai Na kheencho gar tum apne ko kashakash darmiyaan kyun ho

Yeh fitna aadmi ki khaana-weerani ko kya kam hai Huye tum dost jis ke dushman uss ka aasmaan kyun ho

Yahi hai aazmaana toh sataana kis ko kehte hain Adoo ke ho liye jab tum toh mera imtihaan kyun ho

Kaha tum ne ke kyun ho ghair ke milne mein ruswai Baja kehte ho, sach kehte ho, phir kehiyo ke haan kyun ho

Nikaalna chahta hai kaam kya taanon se tu Ghalib Tere be-mehr kehne se woh tujh par meherbaan kyun ho