Kabhi neiki bhi us ke jee mein gar aa jaaye hai mujh se

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 103 chapter_title: Kabhi neiki bhi us ke jee mein gar aa jaaye hai mujh se chapter_slug: "103-kabhi-neiki-bhi-us-ke-jee-mein-gar-aa-jaaye-hai-mu" variant_id: "b013def5-80b2-4b76-b874-829c00e7fcc9" content_type: transliteration layout: verse language: Urdu source_language: Urdu language_direction: ltr script: latin word_count: 148 estimated_read_time: 1

Kabhi neiki bhi us ke jee mein gar aa jaaye hai mujh se Jafaayein kar ke apni yaad sharma jaaye hai mujh se

Khudaaya jazba-e-dil ki magar taseer ulti hai Ke jitna kheenchta hoon aur khinchta jaaye hai mujh se

Woh bad-khoo aur meri daastaan-e-ishq toolaani Ibaarat mukhtasar qaasid bhi ghabra jaaye hai mujh se

Idhar woh bad-gumaani hai idhar yeh na-tawaani hai Na poochha jaaye hai us se na bola jaaye hai mujh se

Sambhalne de mujhe ae na-umeedi kya qayamat hai Ke daaman-e-khayal-e-yaar chhoota jaaye hai mujh se

Takalluf bar-taraf nazzargi mein bhi sahi lekin Woh dekha jaaye kab yeh zulm dekha jaaye hai mujh se

Huye hain paaon hi pehle nabard-e-ishq mein zakhmi Na bhaaga jaaye hai mujh se na thehra jaaye hai mujh se

Qayamat hai ke hove muddai ka hum-safar Ghalib Woh kaafir jo Khuda ko bhi na saunpa jaaye hai mujh se