Kab woh sunta hai kahani meri

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 102 chapter_title: Kab woh sunta hai kahani meri chapter_slug: "102-kab-woh-sunta-hai-kahani-meri" variant_id: "30a1606e-41aa-4546-92e4-5d57f0f98cca" content_type: transliteration layout: verse language: Urdu source_language: Urdu language_direction: ltr script: latin word_count: 80 estimated_read_time: 1

Kab woh sunta hai kahani meri Aur phir woh bhi zabani meri

Khalish-e-ghamza-e-khoon-rez na poochh Dekh khoonaba-fishaani meri

Kya bayaan kar ke mera royein-ge yaar Magar aashufta-bayaani meri

Hoon za-khud rafta-e-baida-e-khayal Bhool jaana hai nishani meri

Mutaqabil hai muqabil mera Ruk gaya dekh ravaani meri

Qadr-e-sang-e-sar-e-rah rakhta hoon Sakht arzaan hai giraani meri

Gard-e-baad-e-rah-e-betaabi hoon Sarsar-e-shauq hai baani meri

Dahan us ka jo na maloom hua Khul gayi hech-madaani meri

Kar diya zo'f ne aajiz Ghalib Nang-e-peeri hai jawaani meri