Aamad-e-khat se hua hai sard jo bazaar-e-dost

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 6 chapter_title: "Aamad-e-khat se hua hai sard jo bazaar-e-dost" chapter_slug: "06-aamad-e-khat-se-hua-hai-sard-jo-bazaar-e-dost" variant_id: "df33e15a-3281-46e4-8afd-3a164cae9210" content_type: transliteration layout: verse language: Urdu source_language: Urdu language_direction: ltr script: latin word_count: 177 estimated_read_time: 1

Aamad-e-khat se hua hai sard jo bazaar-e-dost Dood-e-shama-e-kushta tha shayad khat-e-rukhsaar-e-dost

Ae dil-e-na'aaqibat-andesh zabt-e-shauq kar Kaun la sakta hai taab-e-jalwa-e-deedaar-e-dost

Khaana-veeraan-saazi-e-hairat tamaasha kijiye Soorat-e-naqsh-e-qadam hoon rafta-e-raftaar-e-dost

Ishq mein bedaad-e-rashk-e-ghair ne maara mujhe Kushta-e-dushman hoon aakhir garche tha beemaar-e-dost

Chashm-e-ma raushan ke us be-dard ka dil shaad hai Deeda-e-pur-khoon hamara saaghar-e-sarshaar-e-dost

Ghair yoon karta hai meri pursish us ke hijr mein Be-takalluf dost ho jaise koi gham-khwaar-e-dost

Taake main jaanoon ke hai us ki rasaai waan talak Mujh ko deta hai payaam-e-waada-e-deedaar-e-dost

Jab ke main karta hoon apna shikwa-e-zoaf-e-dimaagh Sar kare hai woh hadees-e-zulf-e-ambar-baar-e-dost

Chupke chupke mujh ko rote dekh paata hai agar Hans ke karta hai bayaan-e-shokhi-e-guftaar-e-dost

Mehrbaani-haaye-dushman ki shikaayat kijiye Ta bayaan kije sipaas-e-lazzat-e-aazaar-e-dost

Yeh ghazal apni mujhe jee se pasand aati hai aap Hai radeef-e-sher mein 'Ghalib' za-bas takraar-e-dost

Chashm-band-e-khalq juz timsaal-e-khud-beeni nahin Aaina hai qaalib-e-khisht-e-dar-o-deewaar-e-dost

Barq-e-khirman-zaar-e-gauhar hai nigaah-e-tez yaan Ashk ho jaate hain khushk az-garmi-e-raftaar-e-dost

Hai sawa neze pe us ke qaamat-e-nau-khez se Aaftab-e-subh-e-mehshar hai gul-e-dastaar-e-dost

Ae adoo-e-maslehat chand ba-zabt afsurda reh Kardani hai jama' taab-e-shokhi-e-deedaar-e-dost

Laghzish-e-mastaana o josh-e-tamaasha hai 'Asad' Aatish-e-mai se bahaar-e-garmi-e-bazaar-e-dost