Muhabbat

transliterator: thothica

work_id: "9bc58cbd-ab40-4264-bd01-6e5bddf3e11f" work_slug: "allama-iqbal-bang-e-dara-part-2-9bc58c" work_title: "Bang-E-Dara Part 2" author_name: Allama Iqbal chapter_number: 18 chapter_title: Muhabbat chapter_slug: "18-muhabbat" variant_id: "edebc225-1330-49e4-b50b-c3497967981b" content_type: transliteration layout: verse language: Urdu source_language: Urdu language_direction: ltr script: latin word_count: 248 estimated_read_time: 2

Muhabbat (Muhabbat)

Uroos-e-shab ki zulfein theen abhi na-aashna kham se Sitaare aasmaan ke be-khabar thay lazzat-e-ram se Qamar apne libaas-e-nau mein begaana sa lagta tha Na tha waaqif abhi gardish ke aaeen-e-musallam se Abhi imkaan ke zulmat-khaane se ubhri hi thi dunya Mazaaq-e-zindagi posheeda tha pehnaaye aalam se Kamaal-e-nazm-e-hasti ki abhi thi ibtida goya Huwaida thi nageenay ki tamanna chashm-e-khaatam se Suna hai aalam-e-baala mein koi keemiyagar tha Safa thi jis ki khaak-e-paa mein barh kar saaghar-e-jam se Likha tha arsh ke paaye pe ik akseer ka nuskha Chhupaate thay farishte jis ko chashm-e-rooh-e-aadam se Nigaahein taak mein rehti theen lekin keemiyagar ki Woh is nuskhe ko barh kar jaanta tha ism-e-aazam se Barha tasbeeh-khwaani ke bahaane arsh ki jaanib Tamanna-e-dili aakhir bar aayi sa'i-e-paiham se Phiraya fikr-e-ajza ne use maidaan-e-imkaan mein Chhupe gi kya koi shai baargaah-e-haq ke mehram se Chamak taare se maangi, chaand se daagh-e-jigar maanga Uraayi teergi thori si shab ki zulf-e-barham se Tadap bijli se paayi, hoor se pakeezgi paayi Haraarat li nafsa-haaye Maseeh ibn-e-Maryam se Zara si phir ruboobiyat se shaan-e-be-niyaazi li Malak se aajizi, uftaadgi taqdeer-e-shabnam se Phir in ajza ko ghola chashma-e-haiwaan ke paani mein Murakkab ne muhabbat naam paaya Arsh-e-Aazam se Mehavvas ne yeh paani hasti-e-nau-khez par chhirka Girah kholi hunar ne us ke goya kaar-e-aalam se Hui jumbish ayaan, zarron ne lutf-e-khwaab ko chhora Gale milne lage uth uth ke apne apne humdam se Khiraam-e-naaz paaya aaftaabon ne, sitaaron ne Chatak ghunchon ne paayi, daagh paaye laala-zaaron ne