Chapter 93

Vi_93

abrāhmaṇe dattaṃ tatsamam eva pāralaukikam // Vi_93.1 //

dviguṇaṃ brāhmaṇabruve // Vi_93.2 //

sahasraguṇaṃ prādhīte // Vi_93.3 //

anantaṃ vedapārage // Vi_93.4 //

purohitas tv ātmana eva pātram // Vi_93.5 //

svasā duhitṛjāmātaraś ca // Vi_93.6 //

na vāry api prayaccheta baiḍālavratike dvije /

na bakavratike pāpe nāvedavidi dharmavit || Vi_93.7 ||

dharmadhvajī sadā lubdhaś chādmiko lokadāmbhikaḥ /

baiḍālavratiko jñeyo hiṃsraḥ sarvābhisaṃdhakaḥ || Vi_93.8 ||

adhodṛṣṭir naikṛtikaḥ svārthasādhanatatparaḥ /

śaṭho mithyāvinītaś ca bakavrataparo dvijaḥ || Vi_93.9 ||

ye bakavratino loke ye ca mārjāraliṅginaḥ /

te patanty andhatāmisre tena pāpena karmaṇā || Vi_93.10 ||

na dharmasyāpadeśena pāpaṃ kṛtvā vrataṃ caret /

vratena pāpaṃ pracchādya kurvan strīśūdradambhanam || Vi_93.11 ||

pretyeha cedṛśo vipro garhyate brahmavādibhiḥ /

chadmanācaritaṃ yac ca vrataṃ rakṣāṃsi gacchati || Vi_93.12 ||

aliṅgī liṅgiveṣeṇa yo vṛttim upajīvati /

sa liṅgināṃ haraty enas tiryagyonau prajāyate || Vi_93.13 ||

na dānaṃ yaśase dadyān na bhayān nopakāriṇe /

na nṛtyagītaśīlebhyo dharmārtham iti niścitam || Vi_93.14 ||