Chapter 92

Vi_92

sarvadānādhikam abhayapradānam // Vi_92.1 //

tatpradānenābhīpsitaṃ lokam āpnoti // Vi_92.2 //

bhūmidānena ca // Vi_92.3 //

gocarmamātrām api bhuvaṃ pradāya sarvapāpebhyaḥ pūto bhavati // Vi_92.4 //

gopradānena svargalokam āpnoti // Vi_92.5 //

daśadhenuprado golokān // Vi_92.6 //

śatadhenuprado brahamalokān // Vi_92.7 //

suvarṇaśṛṅgīṃ raupyakhurāṃ muktālāṅgūlāṃ kāṃsyopadohāṃ vastrottarīyāṃ dattvā dhenuromasaṃkhyāni varṣāṇi svargalokam āpnoti // Vi_92.8 //

viśeṣataḥ kapilām // Vi_92.9 //

dāntaṃ dhuraṃdharaṃ dattvā daśadhenuprado bhavati // Vi_92.10 //

aśvadaḥ sūryasālokyam āpnoti // Vi_92.11 //

vāsodaś candrasālokyam // Vi_92.12 //

suvarṇadānenāgnisālokyam // Vi_92.13 //

rūpyadānena rūpam // Vi_92.14 //

taijasānāṃ pātrāṇāṃ pradānena pātrībhavati sarvakāmānām // Vi_92.15 //

ghṛtamadhutailapradānenārogyam // Vi_92.16 //

auṣadhapradānena // Vi_92.17 //

lavaṇadānena ca lāvaṇyam // Vi_92.18 //

dhānyapradānena tṛptim // Vi_92.19 //

sasyapradānena ca // Vi_92.20 //

annadaḥ sarvam // Vi_92.21 //

dhānyapradānena saubhāgyam // Vi_92.22 //

tilapradaḥ prajām iṣṭām // Vi_92.23 //

indhanapradānena dīptāgnir bhavati // Vi_92.24 //

saṃgrāme ca sarvajayam āpnoti // Vi_92.25 //

āsanapradānena sthānam // Vi_92.26 //

śayyāpradānena bhāryām // Vi_92.27 //

upānatpradānenāśvatarīyuktaṃ ratham // Vi_92.28 //

chatrapradānena svargam // Vi_92.29 //

tālavṛntacāmarapradānenādhvasukhitvam // Vi_92.30 //

vāstupradānena nagarādhipatyam // Vi_92.31 //

yad yad iṣṭatamaṃ loke yac cāsti dayitaṃ gṛhe /

tat tad guṇavate deyaṃ tad evākṣayam icchatā || Vi_92.32 ||