Chapter 25

Vi_25

atha strīṇāṃ dharmāḥ // Vi_25.1 //

bhartuḥ samānavratacāritvam // Vi_25.2 //

śvaśrūśvaśuragurudevatātithipūjanam // Vi_25.3 //

susaṃskṛtopaskaratā // Vi_25.4 //

amuktahastatā // Vi_25.5 //

suguptabhāṇḍatā // Vi_25.6 //

mūlakriyāsv anabhiratiḥ // Vi_25.7 //

maṅgalācāratatparatā // Vi_25.8 //

bhartari pravasite 'pratikarmakriyā // Vi_25.9 //

paragṛheṣv anabhigamanam // Vi_25.10 //

dvāradeśagavākṣeṣv anavasthānam // Vi_25.11 //

sarvakarmasv asvatantratā // Vi_25.12 //

bālyayauvanavārdhakeṣv api pitṛbhartṛputrādhīnatā // Vi_25.13 //

mṛte bhartari brahmacaryaṃ tadanv ārohaṇaṃ vā // Vi_25.14 //

nāsti strīṇāṃ pṛthagyajño na vrataṃ nāpy upoṣitam /

patiṃ śuśrūṣate yat tu tena svarge mahīyate || Vi_25.15 ||

patyau jīvati yā yoṣid upavāsavrataṃ caret /

āyuḥ sā harate bhartur narakaṃ caiva gacchati || Vi_25.16 ||

mṛte bhartari sādhvī strī brahmacarye vyavasthitā /

svargaṃ gacchaty aputrāpi yathā te brahmacāriṇaḥ || Vi_25.17 ||