Chapter 24

Vi_24

atha brāhmaṇasya varṇānukrameṇa catasro bhāryā bhavanti // Vi_24.1 //

tisraḥ kṣatriyasya // Vi_24.2 //

dve vaiśyasya // Vi_24.3 //

ekā śūdrasya // Vi_24.4 //

tāsāṃ savarṇāvedane pāṇir grāhyaḥ // Vi_24.5 //

asavarṇāvedane śaraḥ kṣatriyakanyayā // Vi_24.6 //

pratodo vaiśyakanyayā // Vi_24.7 //

vasanadaśāntaḥ śūdrakanyayā // Vi_24.8 //

na sagotrāṃ na samānārṣapravarāṃ bhāryāṃ vindeta // Vi_24.9 //

mātṛtas tv ā pañcamāt puruṣāt *pitṛtaś cā saptamāt [pitṛtāś] // Vi_24.10 //

nākulīnām // Vi_24.11 //

na ca vyādhitām // Vi_24.12 //

nādhikāṅgīm // Vi_24.13 //

na hīnāṅgīm // Vi_24.14 //

nātikapilām // Vi_24.15 //

na vācāṭām // Vi_24.16 //

athāṣṭau vivāhā bhavanti // Vi_24.17 //

brāhmo daiva ārṣaḥ prājāpatyo gāndharva āsuro rākṣasaḥ paiśācaś ceti // Vi_24.18 //

āhūya guṇavate kanyādānaṃ brāhmaḥ // Vi_24.19 //

yajñasthartvije daivaḥ // Vi_24.20 //

gomithunagrahaṇenārṣaḥ // Vi_24.21 //

prārthitapradānena prājāpatyaḥ // Vi_24.22 //

dvayoḥ sakāmayor mātāpitṛrahito yogo gāndharvaḥ // Vi_24.23 //

krayeṇāsuraḥ // Vi_24.24 //

yuddhaharaṇena rākṣasaḥ // Vi_24.25 //

suptapramattābhigamanāt *paiśācaḥ [paiśacaḥ] // Vi_24.26 //

eteṣv ādyāś catvāro dharmyāḥ // Vi_24.27 //

gāndharvo 'pi rājanyānām // Vi_24.28 //

brāhmīputraḥ puruṣān ekaviṃśatiṃ punīte // Vi_24.29 //

daivīputraś caturdaśa // Vi_24.30 //

ārṣīputraś ca sapta // Vi_24.31 //

prājāpatyaś caturaḥ // Vi_24.32 //

brāhmeṇa vivāhena kanyāṃ dadat brahmalokaṃ gamayati // Vi_24.33 //

daivena svargam // Vi_24.34 //

ārṣeṇa vaiṣṇavam // Vi_24.35 //

prājāpatyena devalokam // Vi_24.36 //

gāndharveṇa gandharvalokaṃ gacchati // Vi_24.37 //

pitā pitāmaho bhrātā sakulyo mātāmaho mātā ceti kanyāpradāḥ // Vi_24.38 //

pūrvābhāve prakṛtisthaḥ paraḥ para iti // Vi_24.39 //

ṛtutrayam upāsyaiva kanyā kuryāt svayaṃ varam /

ṛtutraye vyatīte tu prabhavaty ātmanaḥ sadā || Vi_24.40 ||

pitṛveśmani yā kanyā rajaḥ paśyaty asaṃskṛtā /

sā kanyā vṛṣalī jñeyā haraṃs tāṃ na viduṣyati || Vi_24.41 ||