Chapter 19

Vi_19

mṛtaṃ dvijaṃ na śūdreṇa nirhārayet // Vi_19.1 //

na śūdraṃ dvijena // Vi_19.2 //

pitaraṃ mātaraṃ ca putrā nirhareyuḥ // Vi_19.3 //

na dvijaṃ pitaram api śūdrāḥ // Vi_19.4 //

brāhmaṇam anāthaṃ ye brāhmaṇā nirharanti te svargalokabhājaḥ // Vi_19.5 //

nirhṛtya ca bāndhavaṃ pretaṃ saṃṣkṛtyāpradakṣiṇena citām abhigamyāpsu savāsaso nimajjanaṃ kuryuḥ // Vi_19.6 //

pretasyodakanirvapaṇaṃ kṛtvaikaṃ piṇḍaṃ kuśeṣu dadyuḥ // Vi_19.7 //

privartitavāsasaś ca nimbapatrāṇi vidaśya dvāry aśmani padanyāsaṃ kṛtvā gṛhaṃ praviśeyuḥ // Vi_19.8 //

akṣatāṃś cāgnau kṣipeyuḥ // Vi_19.9 //

caturthe divase 'sthisaṃcayanaṃ kuryuḥ // Vi_19.10 //

teṣāṃ gaṅgāmbhasi prakṣepaḥ // Vi_19.11 //

yāvat saṃkhyam asthi puruṣasya gaṅgāmbhasi tiṣṭhati, tāvad varṣasahasrāṇi svargalokam adhitiṣṭhati // Vi_19.12 //

yāvad āśaucaṃ tāvat pretasyodakaṃ piṇḍam ekaṃ ca dadyuḥ // Vi_19.13 //

krītalabdhāśanāś ca bhaveyuḥ // Vi_19.14 //

amāṃsāśanāś ca // Vi_19.15 //

sthaṇḍilaśāyinaḥ // Vi_19.16 //

pṛthakśāyinaś ca // Vi_19.17 //

grāmān niṣkramyāśaucānte kṛtaśmaśrukarmāṇas tilakalkaiḥ sarṣapakalkair vā snātāḥ parivartitavāsaso gṛhaṃ praviśeyuḥ // Vi_19.18 //

tatra śāntiṃ kṛtvā brāhmaṇānāṃ ca pūjanaṃ kuryuḥ // Vi_19.19 //

devāḥ parokṣadevāḥ, pratyakṣadevā brāhmāṇāḥ // Vi_19.20 //

brāhmaṇair lokā dhāryante // Vi_19.21 //

brāhmaṇānāṃ prasādena divi tiṣṭhanti devatāḥ /

brāhmaṇābhihitaṃ vākyaṃ na mithyā jāyate kvacit || Vi_19.22 ||

yad brāhmaṇās tuṣṭatamā vadanti tad devatāḥ pratyabhinandayanti /

tuṣṭeṣu tuṣṭāḥ satataṃ bhavanti pratyakṣadeveṣu parokṣadevāḥ || Vi_19.23 ||

duḥkhānvitānāṃ mṛtabāndhavānām āśvāsanaṃ kuryur adīnasattvāḥ /

vākyais tu yair bhūmi tavābhidhāsye vākyāny ahaṃ tāni mano 'bhirāme || Vi_19.24 ||