Chapter 18

Vi_18

brāhmaṇasya caturṣu varṇeṣu cet putrā bhaveyuḥ, te paitṛkaṃ rikthaṃ daśadhā vibhajeyuḥ // Vi_18.1 //

tatra brāhmaṇīputraś caturo 'ṃśān ādadyāt // Vi_18.2 //

kṣatriyāputras trīn // Vi_18.3 //

dvāv aṃśau vaiśyāputraḥ // Vi_18.4 //

śūdrāputras tv ekam // Vi_18.5 //

atha cet śūdravarjaṃ brāhmaṇasya putratrayaṃ bhavet, tadā taddhanaṃ navadhā vibhajeyuḥ // Vi_18.6 //

varnānukrameṇa catustridvibhāgīkṛtān aṃśān ādadyuḥ // Vi_18.7 //

vaiśyavarjam aṣṭadhā kṛtaṃ caturas trīn ekaṃ cādadyuḥ // Vi_18.8 //

kṣatriyavarjam saptadhā kṛtaṃ caturo dvāv ekaṃ ca // Vi_18.9 //

brāhmaṇavarjaṃ ṣaḍdhā kṛtaṃ trīn dvāv ekaṃ ca // Vi_18.10 //

kṣatriyasya kṣatriyāvaiśyāśūdrāputreṣv ayam eva vibhāgaḥ // Vi_18.11 //

atha brāhmaṇasya brāhmaṇakṣatriyau putrau syātāṃ, tadā saptadhā kṛtād dhanād brāhmaṇaś caturo 'ṃśān ādadyāt // Vi_18.12 //

trīn rājanyaḥ // Vi_18.13 //

atha brāhmaṇasya brāhmaṇavaiśyau, tadā ṣaḍdhā vibhaktasya caturo 'ṃśān brāhmaṇas tv ādadyāt // Vi_18.14 //

dvāv aṃśau vaiśyaḥ // Vi_18.15 //

atha brāhmaṇasya brāhmaṇaśūdrau putrau syātāṃ, tadā taddhanam pañcadhā vibhajeyātām // Vi_18.16 //

caturo 'ṃśān brāhmaṇas tv ādadyāt // Vi_18.17 //

ekaṃ śūdraḥ // Vi_18.18 //

atha brāhmaṇasya kṣatriyasya vā kṣatriyavaiśyau putrau syātāṃ, tadā taddhanaṃ pañcadhā vibhajeyātām // Vi_18.19 //

trīn aṃśān kṣatriyas tv ādadyāt // Vi_18.20 //

dvāv aṃśau vaiśyaḥ // Vi_18.21 //

atha brāhmaṇasya kṣatriyasya vā kṣatriyaśūdrau putrau syātāṃ, tadā taddhanaṃ caturdhā vibhajeyātām // Vi_18.22 //

trīn aṃśān kṣatriyas tv ādadyāt // Vi_18.23 //

ekaṃ śūdraḥ // Vi_18.24 //

atha brāhmaṇasya kṣatriyasya vaiśyasya vā vaiśyaśūdrau putrau syātāṃ, tadā taddhanaṃ tridhā vibhajeyātām // Vi_18.25 //

dvāv aṃśau vaiśyas tv ādadyāt // Vi_18.26 //

ekaṃ śūdraḥ // Vi_18.27 //

athaikaputrā brāhmaṇasya brāhmaṇakṣatriyavaiśyāḥ sarvaharāḥ // Vi_18.28 //

kṣatriyasya rājanyavaiśyau // Vi_18.29 //

vaiśyasya vaiśyaḥ // Vi_18.30 //

śūdraḥ śūdrasya // Vi_18.31 //

dvijātīnāṃ śūdras tv ekaḥ putro 'rdhaharaḥ // Vi_18.32 //

aputrarikthasya yā gatiḥ, sātrārdhasya dvitīyasya // Vi_18.33 //

mātaraḥ putrabhāgānusāreṇa bhāgāpahāriṇyaḥ // Vi_18.34 //

anūḍhāś ca duhitaraḥ // Vi_18.35 //

samānavarṇāḥ putrāḥ samān aṃśān ādadyuḥ // Vi_18.36 //

jyeṣṭhāya śreṣṭham uddhāraṃ dadyuḥ // Vi_18.37 //

yadi dvau brāhmaṇīputrau syātām ekaḥ śūdrāputraḥ, tadā navadhā vibhaktasyārthasya brāhmaṇīputrāv aṣṭau bhāgān ādadyātām ekaṃ śūdrāputraḥ // Vi_18.38 //

atha śūdrāputrāv ubhau syātām eko brāhmaṇīputraḥ, tadā ṣaḍdhā vibhaktasyārthasya caturo 'ṃśān brāhmaṇas tv ādadyāt, dvāv aṃśau śūdrāputrau // Vi_18.39 //

anena krameṇānyatrāpy aṃśakalpanā bhavati // Vi_18.40 //

vibhaktāḥ saha jīvanto vibhajeran punar yadi /

samas tatra vibhāgaḥ syāj jyaiṣṭhyaṃ tatra na vidyate || Vi_18.41 ||

anupaghnan pitṛdravyaṃ śrameṇa yad upārjayet /

svayam īhitalabdhaṃ tan nākāmo dātum arhati || Vi_18.42 ||

paitṛkaṃ tu yadā dravyam anavāptaṃ yad āpnuyāt /

na tat putrair bhajet sārdham akāmaḥ svayam arjitam || Vi_18.43 ||

vastraṃ patram alaṃkāraḥ kṛtānnam udakaṃ striyaḥ /

yogakṣemaṃ pracāraś ca na vibhājyaṃ ca pustakam || Vi_18.44 ||