Chapter 17

Vi_17

pitā cet putrān vibhajet tasya svecchā svayam upārjite 'rthe // Vi_17.1 //

paitāmahe tv arthe pitṛputrayos tulyaṃ svāmitvam // Vi_17.2 //

pitṛvibhaktā vibhāgānantarotpannasya bhāgaṃ dadyuḥ // Vi_17.3 //

aputradhanaṃ patnyabhigāmi // Vi_17.4 //

tadabhāve duhitṛgāmi // Vi_17.5 //

tadabhāve pitṛgāmi // Vi_17.6 //

tadabhāve mātṛgāmi // Vi_17.7 //

tadabhāve bhrātṛgāmi // Vi_17.8 //

tadabhāve bhrātṛputragāmi // Vi_17.9 //

tadabhāve bandhugāmi // Vi_17.10 //

tadabhāve sakulyagāmi // Vi_17.11 //

tadabhāve sahādhyāyigāmi // Vi_17.12 //

tadabhāve brāhmaṇadhanavarjaṃ rājagāmi // Vi_17.13 //

brāhmaṇārtho brāhmaṇānām // Vi_17.14 //

vānaprasthadhanam ācāryo gṛhṇīyāt // Vi_17.15 //

śiṣyo vā // Vi_17.16 //

saṃsṛṣṭinas tu saṃsṛṣṭī sodarasya tu sodaraḥ /

dadyād apaharec cāṃśaṃ jātasya ca mṛtasya ca || Vi_17.17 ||

pitṛmātṛsutabhrātṛdattam, adhyagnyupāgatam, ādhivedanikaṃ, bandhudattaṃ, śulkam, anvādheyakam iti strīdhanam // Vi_17.18 //

brāhmādiṣu caturṣu vivāheṣv aprajāyām atītāyāṃ tadbhartuḥ // Vi_17.19 //

śeṣeṣu ca pitā haret // Vi_17.20 //

sarveṣv eva prasūtāyāṃ yaddhanaṃ tat duhitṛgāmi // Vi_17.21 //

patyau jīvati yaḥ strībhir alaṃkāro dhṛto bhavet /

na taṃ bhajeran dāyādā bhajamānāḥ patanti te || Vi_17.22 ||

anekapitṛkāṇāṃ tu pitṛto 'ṃśaprakalpanā /

yasya yat paitṛkaṃ rikthaṃ sa tad gṛhṇīta netaraḥ || Vi_17.23 ||