Chapter 16

Vi_16

samānavarṇāsu putrāḥ savarṇā bhavanti // Vi_16.1 //

anulomāsu mātṛsavarṇāḥ // Vi_16.2 //

pratilomāsv āryavigarhitāḥ // Vi_16.3 //

tatra vaiśyāputraḥ śūdreṇāyogavaḥ // Vi_16.4 //

pulkasamāgadhau kṣatriyāputrau vaiśyaśūdrābhyām // Vi_16.5 //

caṇḍālavaidehakasūtāś ca brāhmaṇīputrāḥ śūdraviṭkṣatriyaiḥ // Vi_16.6 //

saṃkarasaṃkarāś cāsaṃkhyeyāḥ // Vi_16.7 //

raṅgāvataraṇam āyogavānām // Vi_16.8 //

vyādhatā pulkasānām // Vi_16.9 //

stutikriyā māgadhānām // Vi_16.10 //

vadhyaghātitvaṃ caṇḍālānām // Vi_16.11 //

strīraksā tajjīvanaṃ ca vaidehakānām // Vi_16.12 //

aśvasārathyaṃ sūtānām // Vi_16.13 //

caṇḍālānāṃ bahir grāmanivasanaṃ mṛtacailadhāraṇam iti viśeṣaḥ // Vi_16.14 //

sarveṣāṃ ca samānajātibhir vivāhaḥ // Vi_16.15 //

svapitṛvittānuharaṇaṃ ca // Vi_16.16 //

saṃkare jātayas tv etāḥ pitṛmātṛpradarśitāḥ /

pracchannā vā prakāśā vā veditavyāḥ svakarmabhiḥ || Vi_16.17 ||

brāhmaṇārthe gavārthe vā dehatyāgo 'nupaskṛtaḥ /

strībālādyavapattau ca bāhyānāṃ siddhikāraṇam || Vi_16.18 ||