Chapter 10

Vi_10

atha dhaṭaḥ // Vi_10.1 //

caturhastocchrito dvihastāyataḥ // Vi_10.2 //

tatra sāravṛkṣodbhavā pañcahastāyatobhayataḥśikyā tulā // Vi_10.3 //

tāṃ ca suvarṇakārakāṃsyakārāṇām anyatamo bibhṛyāt // Vi_10.4 //

tatra caikasmin śikye puruṣaṃ divyakāriṇam āropayet, dvitīye pratimānaṃ śilādi // Vi_10.5 //

pratimānapuruṣau samadhṛtau sucihnitau kṛtvā puruṣam avatārayet // Vi_10.6 //

dhaṭaṃ ca samayena gṛhṇīyāt // Vi_10.7 //

tulādhāraṃ ca // Vi_10.8 //

brahmaghnāṃ ye smṛtā lokā ye lokāḥ kūṭasākṣiṇām /

tulādhārasya te lokās tulāṃ dhārayato mṛṣā || Vi_10.9 ||

dharmaparyāyavacanair dhaṭa ity abhidhīyase /

tvam eva dhaṭa jānīṣe na vidur yāni mānuṣāḥ || Vi_10.10 ||

vyavahārābhiśasto 'yaṃ mānuṣas tolyate tvayi /

tad enaṃ saṃśayād asmād dharmatas trātum arhasi || Vi_10.11 ||

tatas tv āropayec chikye bhūya evātha taṃ naram /

tulito yadi vardheta tataḥ śuddhaḥ sa dharmataḥ || Vi_10.12 ||

śikyacchedākṣabhaṅgeṣu bhūyas tv āropayen naram /

evaṃ niḥsaṃśayaṃ jñānaṃ yato bhavati nirṇayaḥ || Vi_10.13 ||