Chapter 9

Vi_9

atha samayakriyā // Vi_9.1 //

rājadrohasāhaseṣu yathākāmam // Vi_9.2 //

nikṣepasteyeṣv arthapramāṇaṃ // Vi_9.3 //

sarveṣv evārthajāteṣu mūlyaṃ kanakaṃ kalpayet // Vi_9.4 //

tatra kṛṣṇalone śūdraṃ dūrvākaraṃ śāpayet // Vi_9.5 //

dvikṛṣṇalone tilakaram // Vi_9.6 //

trikṛṣṇalone rajatakaram // Vi_9.7 //

catuḥkṛṣṇalone suvarṇakaram // Vi_9.8 //

pañcakṛṣṇalone sīroddhṛtamahīkaram // Vi_9.9 //

suvarṇārdhone kośo deyaḥ śūdrasya // Vi_9.10 //

tataḥ paraṃ yathārhaṃ dhaṭāgnyudakaviṣāṇām anyatamam // Vi_9.11 //

dviguṇe 'rthe yathābhihitāḥ samayakriyā vaiśyasya // Vi_9.12 //

triguṇe rājanyasya // Vi_9.13 //

kośavarjaṃ caturguṇe brāhmaṇasya // Vi_9.14 //

na brāhmaṇasya kośaṃ dadyāt // Vi_9.15 //

anyatrāgāmikālasamayanibandhanakriyātaḥ // Vi_9.16 //

kośasthāne brāhmaṇaṃ sītoddhṛtamahīkaram eva śāpayet // Vi_9.17 //

prāgdṛṣṭadoṣe svalpe 'py arthe divyānām anyatamam eva kārayet // Vi_9.18 //

satsu viditaṃ sac caritaṃ na mahaty arthe 'pi // Vi_9.19 //

abhiyoktā vartayec chīrṣam // Vi_9.20 //

abhiyuktaś ca divyaṃ kuryāt // Vi_9.21 //

rājadrohasāhaseṣu vināpi śīrṣavartanāt // Vi_9.22 //

strībrāhmaṇavikalāsamartharogiṇāṃ tulā deyā // Vi_9.23 //

sā ca na vāti vāyau // Vi_9.24 //

na kuṣṭhyasamarthalohakārāṇām agnir deyaḥ // Vi_9.25 //

śaradgrīṣmayoś ca // Vi_9.26 //

na kuṣṭhipaittikabrāhmaṇānāṃ viṣaṃ deyam // Vi_9.27 //

prāvṛṣi ca // Vi_9.28 //

na śleṣmavyādhyarditānāṃ bhīrūṇāṃ śvāsakāsinām ambujīvināṃ codakam // Vi_9.29 //

hemantaśiśirayoś ca // Vi_9.30 //

na nāstikebhyaḥ kośo deyaḥ // Vi_9.31 //

na deśe vyādhimarakopasṛṣṭe ce // Vi_9.32 //

sacailasnātam āhūya sūryodaya upoṣitam /

kārayet sarvadivyāni devabrāhmaṇasaṃnidhau || Vi_9.33 ||