Chapter 11

Vi_11

athāgniḥ // Vi_11.1 //

ṣoḍaśāṅgulaṃ tāvad antaraṃ maṇḍalasaptakaṃ kuryāt // Vi_11.2 //

tataḥ prāṅmukhasya prasāritabhujadvayasya saptāśvatthapatrāṇi karayor dadyāt // Vi_11.3 //

tāni ca karadvayasahitāni sūtreṇa veṣṭayet // Vi_11.4 //

tatas tatrāgnivarṇaṃ lohapiṇḍaṃ pañcāśatpalikaṃ samaṃ nyaset // Vi_11.5 //

tam ādāya nātidrutaṃ nātivilambitaṃ maṇḍaleṣu pādanyāsaṃ kurvan vrajet // Vi_11.6 //

tataḥ saptamaṃ maṇḍalam atītya bhūmau lohapiṇḍaṃ jahyāt // Vi_11.7 //

yo hastayoḥ kvacid dagdhas tam aśuddhaṃ vinirdiṣet /

na dagdhaḥ sarvathā yas tu sa viśuddho bhaven naraḥ || Vi_11.8 ||

bhayād vā pātayed yas tu dagdho vā na vibhāvyate /

punas taṃ hārayel lohaṃ samayasyāviśodhanāt || Vi_11.9 ||

karau vimṛditavrīhes tasyādāv eva lakṣayet /

abhimantryāsya karayor lohapiṇḍaṃ tato nyaset || Vi_11.10 ||

tvam agne sarvabhūtānām antaś carasi sākṣivat /

tvam evāgne vijānīṣe na vidur yāni mānavāḥ || Vi_11.11 ||

vyavahārābhiśasto 'yaṃ mānuṣaḥ śuddhim icchati /

tad enaṃ saṃśayād asmād dharmatas trātum arhasi || Vi_11.12 ||