Chapter 4

Vi_4

jālasthārkamarīcigataṃ rajaḥ trasareṇusaṃjñakam // Vi_4.1 //

tadaṣṭakaṃ likṣā // Vi_4.2 //

tattrayaṃ rājasarṣapaḥ // Vi_4.3 //

tattrayaṃ gaurasarṣapaḥ // Vi_4.4 //

tatṣaṭkaṃ yavaḥ // Vi_4.5 //

tattrayaṃ kṛṣṇalam // Vi_4.6 //

tatpañcakaṃ māṣaḥ // Vi_4.7 //

taddvādaśakam akṣārdham // Vi_4.8 //

akṣārdham eva sacaturmāṣakaṃ suvarṇaḥ // Vi_4.9 //

catuḥsuvarṇako niṣkaḥ // Vi_4.10 //

dve kṛṣṇale samadhṛte rūpyamāṣakaḥ // Vi_4.11 //

tatṣoḍaśakaṃ dharaṇam // Vi_4.12 //

tāmrakārṣikaḥ kārṣāpaṇaḥ // Vi_4.13 //

paṇānāṃ dve śate sārdhe prathamaḥ sāhasaḥ smṛtaḥ /

madhyamaḥ pañca vijñeyaḥ sahasraṃ tv eṣa cottamaḥ || Vi_4.14 ||