Chapter 9

brāhmaṇān bhojayitvā tu goghnaḥ śuddho na saṃśayaḥ // Par_8.41/1 //

gavāṃ saṃrakṣaṇārthāya na duṣyed rodhabandhayoḥ /

tad vadhaṃ tu na taṃ vidyāt kāmākāmakṛtaṃ tathā (II,1, p. 255) // Par_9.1 //

daṇḍād ūrdhvaṃ yad anyena prahārād yadi pātayet /

prāyaścittaṃ tadā proktaṃ dviguṇaṃ govadhe caret (II,1, p. 256) // Par_9.2 //

rodhabandhanayoktrāṇi ghātaś ceti caturvidham /

ekapādaṃ cared rodhe dvau pādau bandhane caret (II,1, p. 257) // Par_9.3 //

yoktreṣu pādahīnaṃ syāc caret sarvaṃ nipātane /

govāṭe vā gṛhe vāpi durge vāpy asamasthale (II,1, p. 258) // Par_9.4 //

nadīṣv atha samudreṣu tv anyeṣu na nadīmukhe /

dagdhadeśe mṛtā gāvaḥ stambhanād rodha ucyate (p. 259) (II,1, p. 259) // Par_9.5 //

yoktradāmakadoraiś ca kaṇṭhābharaṇabhūṣaṇaiḥ /

gṛhe vāpi vane vāpi baddhā syād gaur mṛtā yadi // Par_9.6 //

tad eva bandhanaṃ vidyāt kāmākāmakṛtaṃ ca yat /

hale vā śakaṭe paṅktau pṛṣṭhe vā pīḍito naraiḥ (II,1, p. 260) // Par_9.7 //

gopatir mṛtyum āpnoti yoktro bhavati tadvadhaḥ /

mattaḥ pramatta unmattaś cetano vāpy acetanaḥ (II,1, p. 261) // Par_9.8 //

kāmākāmakṛtakrodho daṇḍair hanyād athopalaiḥ /

prahṛtā vā mṛtā vāpi tad dhi hetur nipātane // Par_9.9 //

aṅguṣṭhamātrasthūlas tu bāhumātraḥ pramāṇataḥ /

ādras tu sapalāśaś ca daṇḍa ity abhidhīyate (II,1, p. 262) // Par_9.10 //

mūrchitaḥ patito vāpi daṇḍenābhihitaḥ sa tu /

utthitas tu yadā gacchet pañca sapta daśaiva vā // Par_9.11 //

grāsaṃ vā yadi gṛhṇīyāt toyaṃ vāpi pibed yadi /

pūrvaṃ vyādhyupasṛṣṭaś cet prāyaścittaṃ na vidyate (II,1, p. 263) // Par_9.12 //

piṇḍasthe pādam ekaṃ tu dvau pādau garbhasaṃmite /

pādonaṃ vratam uddiṣṭaṃ hatvā garbham acetanam // Par_9.13 //

pāde 'ṅgaromavapanaṃ dvipāde śmaśruṇo 'pi ca /

tripāde tu śikhā varjaṃ saśikhaṃ tu nipātane (II,1, p. 264) // Par_9.14 //

pāde vastrayugaṃ caiva dvipāde kāṃsyabhājanam /

tripāde govṛṣaṃ dadyāc caturthe godvayaṃ smṛtam // Par_9.15 //

niṣpannasarvagātras tu dṛśyate vā sacetanaḥ /

aṅgapratyaṅgasaṃpūrṇo dviguṇaṃ govrataṃ caret (II,1, p. 265) // Par_9.16 //

pāṣāṇenātha daṇḍena gāvo yenābhighātitāḥ /

śṛṅgabhaṅge caret pādaṃ dvau pādau netraghātane (II,1, p. 266) // Par_9.17 //

lāṅgūle pādakṛcchraṃ tu dvau pādāv asthibhañjane /

tripādaṃ caiva karṇe tu caret sarvaṃ nipātane (II,1, p. 267) // Par_9.18 //

śṛṅgabhaṅge 'sthibhaṅge ca kaṭibhaṅge tathaiva ca /

yadi jīvati ṣaṇmāsān prāyaścitttaṃ na vidyate (II,1, p. 268) // Par_9.19 //

vraṇabhaṅge ca kartavyaḥ snehābhyaṅgas tu pāṇinā /

yavasaś copahartavyo yāvad dṛḍhabalo bhavet // Par_9.20 //

yāvat saṃpūrṇasarvāṅgas tāvat taṃ poṣayen naraḥ /

gorūpaṃ brāhmaṇasyāgre namaskṛtvā visarjayet (II,1, p. 269) // Par_9.21 //

yady asaṃpūrṇasargāṅgo hīnadeho bhavet tadā /

goghātakasya tasyārthaṃ prāyaścittaṃ vinirdiśet // Par_9.22 //

kāṣṭhaloṣṭakapāṣāṇaiḥ śastreṇaivoddhato balāt /

vyāpādayati yo gāṃ tu tasya śuddhiṃ vinirdiśet (II,1, p. 270) // Par_9.23 //

caret sāṃtapanaṃ kāṣṭhe prājāpatyaṃ tu loṣṭake /

taptakṛcchraṃ tu pāṣāṇe sastre caivātikṛcchrakam // Par_9.24 //

pañca saṃtapane gāvaḥ prājāpatye tathā trayaḥ /

taptakṛcchre bhavanty aṣṭāv atikṛcchre trayodaśa // Par_9.25 //

pramāpaṇe prāṇabhṛtāṃ dadyāt tat pratirūpakam /

tasyānurūpaṃ mūlyaṃ vā dadyād ity abravīn manuḥ // Par_9.26 //

anyatrāṅkanalakṣmabhyāṃ vāhane mocane tathā /

sāyaṃ saṃgopanārthaṃ ca na duṣyed rodhabandhayoḥ (II,1, p. 271) // Par_9.27 //

atidāhe 'tivāhe ca nāsikābhedane tathā /

nadīparvatasaṃcāre prāyaścittaṃ vinirdiśet (II,1, p. 272) // Par_9.28 //

atidāhe caret pādaṃ dvau pādau vāhane caret /

nāsikye padahīnaṃ tu caret sarvaṃ nipātane // Par_9.29 //

dahānāt tu vipadyate anaḍvān yoktrayantritaḥ /

uktaṃ parāśareṇaiva hy ekapādaṃ yathāvidhi (II,1, p. 273) // Par_9.30 //

rodhanaṃ bandhanaṃ caiva bhāraḥ praharaṇaṃ tathā /

durgapreraṇayoktraṃ ca nimittāni vadhasya ṣaṭ // Par_9.31 //

bandhapāśasuguptāṅgo mriyate yadi gopaśuḥ /

bhavane tasya pāpī syāt prāyaścittārdham arhati (II,1, p. 274) // Par_9.32 //

na nārikelair na ca śāṇavālaiḥ na vāpi mauñjair na ca valkaśṛṅkhalaiḥ /

etais tu gāvo na nibandhanīyā baddhvāpi tiṣṭhet paraśuṃ gṛhītvā (II,1, p. 275) //

Par_9.33 //

kuśaiḥ kāśaiś ca badhnīyād gopaśuṃ dakṣiṇāmukham /

pāśalagnāgnidagdhāsu prāyaścittaṃ na vidyate (II,1, p. 276) // Par_9.34 //

yadi tatra bhavet kāṣṭhaṃ prāyaścittaṃ kathaṃ bhavet /

japitvā pāvanīṃ devīṃ mucyate tatra kilbiṣāt // Par_9.35 //

prerayan kūpavāpīṣu vṛkṣacchedeṣu pātayan /

gavāśaneṣu vikrīṇaṃs tataḥ prāpnoti govadham (II,1, p. 277) // Par_9.36 //

ārādhitas tu yaḥ kaścid bhinnakakṣo yadā bhavet /

śravaṇaṃ hṛdayaṃ bhinnaṃ magno vā kūpasaṃkaṭe // Par_9.37 //

kūpād utkramaṇe caiva bhagno vā grīvapādayoḥ /

sa eva mriyate tatra trīn pādāṃs tu samācaret // Par_9.38 //

kūpakhāṭe taṭābandhe nadībandhe prapāsu ca /

pānīyeṣu vipannānāṃ prāyaścittaṃ na vidyate // Par_9.39 //

kūpakhāte taṭākhāte dīrghakhāte tathaiva ca /

anyeṣu dharmakhāteṣu prāyaścittaṃ na vidyate (II,1, p. 279) // Par_9.40 //

veśmadvāre nivāseṣu yo naraḥ khātam icchati /

svakāryagṛhakhateṣu prāyaścittaṃ vinirdiśet // Par_9.41 //

niśi bandhaniruddheṣu sarpavyāghrahateṣu ca /

agnividyudvipannānāṃ prāyaścittaṃ na vidyate (II,1, p. 280) // Par_9.42 //

grāmaghāte śaraugheṇa veśmabhaṅgān nipātane /

ativṛṣṭihatānāṃ ca prāyaścittaṃ na vidyate (II,1, p. 281) // Par_9.43 //

saṃgrāme prahatānāṃ ca ye dagdhā veśmakeṣu ca /

dāvāgnigrāmaghāteṣu prāyaścittaṃ na vidyāte (II,1, p. 282) // Par_9.44 //

yantritā gauś cikitsārthaṃ mūḍhagarbhavimocane /

yatne kṛte vipadyeta prāyaścittaṃ na vidyate // Par_9.45 //

vyāpannānāṃ bahūnāṃ ca bandhane rodhane 'pi vā /

bhiṣaṅmithyopacāre ca prāyaścittaṃ vinirdiśet (II,1, p. 284) // Par_9.46 //

govṛṣāṇāṃ vipattau ca yāvantaḥ prekṣakā janāḥ /

anivārayatāṃ teṣāṃ sarveṣāṃ pātakaṃ bhavet (II,1, p. 285) // Par_9.47 //

eko hato yair bahubhiḥ sametair na jñāyate yasya hato 'bhighātāt /

divyena teṣām upalabhya hantā nivartanīyo nṛpasaṃniyuktaiḥ (II,1, p. 286) // Par_9.48

//

ekā ced bahubhiḥ kācid daivād vyāpāditā yadi /

pādaṃ pādaṃ tu hatyāyāś careyus te pṛthak pṛthak // Par_9.49 //

hate tu rudhiraṃ dṛśyaṃ vyādhigrastaḥ kṛśo bhavet /

lālā bhavati daṣṭeṣu evam anveṣaṇaṃ bhavet // Par_9.50 //

grāsārthaṃ codito vāpi adhvānaṃ naiva gacchati /

manunā caivam ekena sarvaśāstrāṇi jānatā (II,1, p. 288) // Par_9.51 //

prāyaścittaṃ tu tenoktaṃ goghnaś cāndrāyaṇaṃ caret /

keśānāṃ rakṣaṇārthāya dviguṇaṃ vratam ācaret (II,1, p. 290) // Par_9.52 //

dviguṇe vrata ādiṣṭe dviguṇā dakṣiṇā bhavet /

rājā vā rājaputro vā brāhmaṇo vā bahuśrutaḥ // Par_9.53 //

akṛtvā vapanaṃ tasya prāyaścittaṃ vinirdiśet /

sarvān keśān samuddhṛtya cchedayed aṅguladvayam (II,1, p. 291) // Par_9.54 //

evaṃ nārīkumārīṇāṃ śiraso muṇḍanaṃ smṛtam /

na striyāḥ keśavapanaṃ na dūre śayanāśanam (II,1, p. 292) // Par_9.55 //

na ca goṣṭhe vased rātrau na divā gā anuvrajet /

nadīṣu saṃgame caiva araṇyeṣu viśeṣataḥ // Par_9.56 //

na strīṇām ajinaṃ vāso vratam eva samācaret /

trisaṃdhyaṃ snānam ity uktaṃ surāṇām arcanaṃ tathā (II,1, p. 293) // Par_9.57 //

bandhumadhye vrataṃ tāsāṃ kṛcchracāndrāyaṇādikam /

gṛheṣu satataṃ tiṣṭhec chucir niyamam ācaret // Par_9.58 //

iha yo govadhaṃ kṛtvā pracchādayitum icchati /

sa yāti narakaṃ ghoraṃ kālasūtram asaṃśayam (II,1, p. 294) // Par_9.59 //

vimukto narakāt tasmān martyaloke prajāyate /

klībo duḥkhī ca kuṣṭhī ca sapta janmāni vai naraḥ // Par_9.60 //

tasmāt prakāśayet pāpaṃ svadharmaṃ satataṃ caret /

strībālabhṛtyagovipreṣv atikopaṃ vivarjayet // Par_9.61 //