Chapter 8

gavāṃ bandhanayoktreṣu bhaven mṛtyur akāmataḥ /

akāmakṛtapāpasya prāyaścittaṃ kathaṃ bhavet (II,1, p. 199) // Par_8.1 //

vedavedāṅgaviduṣāṃ dharmaśāstraṃ vijānatām /

svakarmarataviprāṇāṃ svakaṃ pāpaṃ nivedayet (II,1, p. 205) // Par_8.2 //

sāvitryāś cāpi gāyatryāḥ saṃdhyopāstyagnikāryayoḥ /

ajñānāt kṛṣikartāro brāhmaṇā nāmadhārakāḥ (II,1, p. 207) // Par_8.3 //

avratānām amantrāṇāṃ jātimātropajīvinām /

sahasraśaḥ sametānāṃ pariṣattvaṃ na vidyate (II,1, p. 209) // Par_8.4 //

yad vadanti tamomūḍhā mūrkhā dharmam atadvidaḥ /

tat pāpaṃ śatadhā bhūtvā tadvaktṝn adhigacchati (II,1, p. 210) // Par_8.5 //

ajñātvā dharmaśāstrāṇi prāyaścittaṃ dadāti yaḥ /

prāyaścittī bhavet pūtaḥ kilbiṣaṃ parṣadi vrajet // Par_8.6 //

catvāro vā trayo vāpi yaṃ brūyur vedapāragāḥ /

sa dharmeti vijñeyo netarais tu sahasraśaḥ (II,1, p. 212) // Par_8.7 //

pramāṇamārgaṃ mārganto ye dharmaṃ pravadanti vai /

teṣām udvijate pāpaṃ sadbhūtaguṇavādinām // Par_8.8 //

yathāśmani sthitaṃ toyaṃ mārutārkeṇa śudhyati /

evaṃ pariṣadādeśān nāśayet tasya duṣkṛtam (II,1, p. 213) // Par_8.9 //

naiva gacchati kartāraṃ naiva gacchati parṣadam /

mārutārkādisamyogāt pāpaṃ naśyati toyavat (II,1, p. 214) // Par_8.10 //

catvāro vā trayo vāpi vedavanto 'gnihotriṇaḥ /

brāhmaṇānāṃ samarthā ye pariṣat sābhidhīyate (II,1, p. 215) // Par_8.11 //

anāhitāgnayo ye 'nye vedavedāṅgapāragāḥ /

pañca trayo vā dharmajñāḥ pariṣat sā prakīrtitā // Par_8.12 //

munīnām ātmavidyānāṃ dvijānāṃ yajñayājinām /

vedavrateṣu snātānām eko 'pi pariṣad bhavet // Par_8.13 //

pañca pūrvaṃ mayā proktās teṣāṃ cāsaṃbhave trayaḥ /

svavṛttiparituṣṭo ye pariṣat sā prakīrtitā // Par_8.14 //

ata ūrdhvaṃ tu ye viprāḥ kevalaṃ nāmadhārakāḥ /

pariṣattvaṃ na teṣv asti sahasraguṇiteṣv api (II,1, p. 218) // Par_8.15 //

yathā kāṣṭhamayo hastī yathā carmamayo mṛgaḥ /

brāhmaṇas tv anadhīyānas trayas te nāmadhārakāḥ // Par_8.16 //

grāmasthānaṃ yathā śūnyaṃ yathā kūpas tu nirjalaḥ /

yathā hutam anagnau ca amantro brāhmaṇas tathā (II,1, p. 219) // Par_8.17 //

yathā ṣaṇḍho 'phalaḥ strīṣu yathā gaur ūṣarāphalā /

yathā cājñe 'phalaṃ dānaṃ tathā vipro 'nṛco 'phalaḥ (II,1, p. 220) // Par_8.18 //

citrakarma yathānekair aṅgair unmīlyate śanaiḥ /

brāhmaṇyam api tadvad dhi saṃskārair mantrapurvakaiḥ (II,1, p. 221) // Par_8.19 //

prāyaścittaṃ prayacchanti ye dvijā nāmadhārakāḥ /

te dvijā pāpakarmāṇaḥ sametā narakaṃ yayuḥ // Par_8.20 //

ye paṭhanti dvijā vedaṃ pañcayajñaratāś ca ye /

trailokyaṃ tārayanty ete pañcendriyaratā api (II,1, p. 222) // Par_8.21 //

saṃpraṇītaḥ śmaśāneṣu dīpto 'gniḥ sarvabhakṣakaḥ /

evaṃ ca vedavid vipraḥ sarvabhakṣo 'pi daivatam (II,1, p. 224) // Par_8.22 //

amedhyāni tu sarvāṇi prakṣipyante yathodake /

tathaiva kilbiṣaṃ sarvaṃ prakṣipec ca dvijānale (II,1, p. 227) // Par_8.23 //

gāyatrīrahito vipraḥ śūdrād apy aśucir bhavet /

gāyatrībrahmatattvajñāḥ saṃpūjyante janair dvijāḥ // Par_8.24 //

duḥśīlo 'pi dvijaḥ pūjyo na tu śūdro jitendriyaḥ /

kaḥ parityajya gāṃ duṣṭāṃ duhec chīlavatīṃ kharīm (II,1, p. 228) // Par_8.25 //

dharmaśāstrarathārūḍhā vedakhaḍgadharā dvijāḥ /

krīḍārtham api yad brūyuḥ sa dharmaḥ paramaḥ smṛtaḥ (II,1, p. 229) // Par_8.26 //

cāturvedyo vikalpī ca aṅgavid dharmapāṭhakaḥ /

trayaś ca āśramo mukhyāḥ parṣad eṣā daśāvarā (II,1, p. 230) // Par_8.27 //

rājñaś cānumate sthitvā prāyaścittam vinirdiśet /

svayam eva na kartavyaṃ kartavyā svalpaniṣkṛtiḥ (II,1, p. 232) // Par_8.28 //

brāhmaṇāṃs tān atikramya rājā kartuṃ yad icchati /

tat pāpaṃ śatadhā bhūtvā rājānam anugacchati (II,1, p. 233) // Par_8.29 //

prāyaścittaṃ sadā dadyād devatāyatanāgrataḥ /

ātmakṛcchraṃ tataḥ kṛtvā japed vai vedamātaram // Par_8.30 //

saśikhaṃ vapanaṃ kṛtvā trisaṃdhyam avagāhanam /

gavāṃ madhye vased rātrau divā gāś cāpy anuvrajet (II,1, p. 237) // Par_8.31 //

uṣṇe varṣati śīte vā mārute vāti vā bhṛśam /

na kurvītātmanas trāṇaṃ gor akṛtvā tu śaktitaḥ (II,1, p. 238) // Par_8.32 //

ātmano yadi vānyeṣāṃ gṛhe kṣetre khale 'tha vā /

bhakṣayantīṃ na kathayet pibantaṃ caiva vatsakam // Par_8.33 //

pibantīṣu pibet toyaṃ saṃviśantīṣu saṃviśet /

patitāṃ paṅkamagnāṃ vā sarvaprāṇaiḥ samuddharet (II,1, p. 239) // Par_8.34 //

brāhmaṇārthe gavārthe vā yas tu prāṇān parityajet /

mucyate brahmahatyāyā goptā gor brāhmaṇasya ca // Par_8.35 //

govadhasyānurūpeṇa prājāpatyaṃ vinirdiśet /

prājāpatyaṃ tataḥ kṛcchraṃ vibhajet tac caturvidham (II,1, p. 240) // Par_8.36 //

ekāham ekabhaktāśī ekāhaṃ naktabhojanaḥ /

ayācitāśy ekam ahar ekāhaṃ mārutāśanaḥ // Par_8.37 //

dinadvayaṃ caikabhakto dvidinaṃ caikabhojanaḥ /

dinadvayam ayācī syād dvidinaṃ mārutāśanaḥ // Par_8.38 //

tridinaṃ caikabhaktāśī tridinaṃ naktabhojanaḥ /

dinatrayam ayācī syāt tridinaṃ mārutāśanaḥ // Par_8.39 //

caturahaṃ caikabhaktāśī caturahaṃ naktabhojanaḥ /

caturdinam ayācī syāc caturahaṃ mārutāśanaḥ (II,1, p. 241) // Par_8.40 //

prāyaścitte tataś cīrṇe kuryād brāhmaṇabhojanam /

viprāṇāṃ dakṣiṇāṃ dadyāt pavitrāṇi japed dvijaḥ // Par_8.41 //