Chapter 7

=dravyaśuddhih=

athāto dravyaśuddhis tu parāśaravaco yathā /

dāravāṇāṃ pātrāṇāṃ takṣaṇāc chuddhir iṣyate (II,1, p. 147) // Par_7.1 //

bhasmanā śudhyate kāṃsyaṃ tāmramamlena śudhyati /

rajasā śudhyate nārī vikalaṃ yā na gacchati (II,1, p. 150) // Par_7.2 //

nadī vegena śudhyeta lopo yadi na dṛśyate /

vāpīkūpataḍāgeṣu dūṣiteṣu kathaṃcana (II,1, p. 153) // Par_7.3 //

uddhṛtya vai ghaṭaśataṃ pañcagavyena śudhyati /

aṣṭavarṣā bhaved gaurī navavarṣā tu rohiṇī (II,1, p. 156) // Par_7.4 //

daśavarṣā bhavet kanyā ata ūrdhvaṃ rajasvalā /

prāpte tu dvādaśe varṣe yaḥ kanyāṃ na prayacchati (II,1, p. 157) // Par_7.5 //

māsi māsi rajas tasyāḥ pibanti pitaraḥ svayam /

mātā caiva pitā caiva jyeṣṭho bhrātā tathaiva ca (II,1, p. 158) // Par_7.6 //

trayas te narakaṃ yānti dṛṣṭvā kanyāṃ rajasvalām /

yas tāṃ samudvahet kanyāṃ brāhmaṇo madamohitaḥ // Par_7.7 //

asaṃbhāṣyo hy apāṅkteyaḥ sa vipro vṛṣalīpatiḥ /

yaḥ karoty ekarātreṇa vṛṣalīsevanaṃ dvijaḥ (II,1, p. 159) // Par_7.8 //

sa bhaikṣabhuj japan nityaṃ tribhir varṣair viśudhyati /

astaṃgate yadā sūrye caṇḍālaṃ patitaṃ striyam // Par_7.9 //

sūtikāṃ spṛśataś caiva kathaṃ śuddhir vidhīyate /

jātavedaḥ suvarṇaṃ ca somamārgaṃ vilokya ca // Par_7.10 //

brāhmaṇānumataś caiva snānaṃ kṛtvā viśudhyati /

spṛṣṭvā rajasvalānyonyaṃ brāhmaṇī brāhmaṇī tathā (II,1, p. 160) // Par_7.11 //

tāvat tiṣṭhen nirāhārā trirātreṇaiva śudhyati /

spṛṣṭvā rajasvalānyonyaṃ brāhmaṇī kṣatriyā tathā // Par_7.12 //

ardhakṛcchraṃ caret pūrvā pādam ekam anantarā /

spṛṣṭvā rajasvalānyonyaṃ brāhmaṇī vaiśyajā tathā // Par_7.13 //

pādahīnaṃ caret pūrvā pādam ekam anantarā /

spṛṣṭvā rajasvalānyonyaṃ brāhmaṇī śūdrajā tathā // Par_7.14 //

kṛcchreṇa śudhyate pūrvā śūdrā dānena śudhyati /

snātā rajasvalā yā tu caturthe 'hani śudhyati (II,1, p. 164) // Par_7.15 //

kuryād rajo nivṛttau tu daivapitryādi karma ca /

rogeṇa yad rajaḥ strīṇām anvahaṃ tu pravartate (II,1, p. 165) // Par_7.16 //

nāśuciḥ sā tatas tena tat syād vaikālikaṃ matam /

sādhvācārā na tāvat syād rajo yāvat pravartate (II,1, p. 168) // Par_7.17 //

rajonivṛttau gamyā strī gṛhakarmaṇi caiva hi /

prathame 'hani caṇḍālī dvitīye brahmaghātinī // Par_7.18 //

tṛtīye rajakī proktā caturthe 'hani śudhyati /

āture snānotpanne daśakṛtvo hy anāturaḥ (II,1, p. 169) // Par_7.19 //

snātvā snātvā spṛśed enaṃ tataḥ śudhyet sa āturaḥ /

ucchiṣṭocchiṣṭasaṃspṛṣṭaḥ śunā śūdreṇa vā dvijaḥ (II,1, p. 170) // Par_7.20 //

upoṣya rajanīm ekāṃ pañcagavyena śudhyati /

anucchiṣṭena śūdreṇa sparśe snānaṃ vidhīyate (II,1, p. 171) // Par_7.21 //

tenocchiṣṭena saṃspṛṣṭaḥ prājāpatyaṃ samācaret /

bhasmanā śudhyate kāṃsyaṃ surayā yan na lipyate (II,1, p. 172) // Par_7.22 //

surāmātreṇa saṃspṛṣṭaṃ śudhyate 'gnyupalekhanaiḥ /

gavāghrātāni kāṃsyāni śvakākopahatāni ca (II,1, p. 172) // Par_7.23 //

śudhyanti daśabhiḥ kṣāraiḥ śūdrocchiṣṭāni yāni ca /

gaṇḍūṣaṃ pādaśaucaṃ ca kṛtvā vai kāṃsyabhājane // Par_7.24 //

ṣaṇmāsān bhuvi niḥkṣipya uddhṛtya punar āharet /

āyaseṣv āyasānāṃ ca sīsasyāgnau viśodhanam (II,1, p. 173) // Par_7.25 //

dantam asthi tathā bhṛṅgaṃ rūpyaṃ sauvarṇabhājanam /

maṇipāṣāṇapātrāṇīty etān prakṣālayej jalaiḥ (II,1, p. 174) // Par_7.26 //

pāṣāṇe tu punar gharṣaḥ śuddhir evam udāhṛtā /

mṛṇmaye dahanāc chuddhir dhānyānāṃ mārjanād api (II,1, p. 176) // Par_7.27 //

veṇuvalkalacīrāṇāṃ kṣaumakārpāsavāsasām /

aurṇanetrapaṭānāṃ ca prokṣaṇāc chuddhir iṣyate (II,1, p. 179) // Par_7.28 //

muñjopaskaraśūrpāṇāṃ śaṇasya phalacarmaṇām /

tṛṇakāṣṭhasya rajjūṇām udakābhyukṣaṇaṃ matam (II,1, p. 181) // Par_7.29 //

tūlikādyupadhānāni raktavastrādikāni ca /

śoṣayitvātapenaiva prokṣaṇāc chuddhitām iyuḥ (II,1, p. 184) // Par_7.30 //

mārjāramakṣikākīṭa- pataṅgakṛmidardurāḥ /

medhyāmedhyaṃ spṛśanto 'pi nocchiṣṭaṃ manur abravīt (II,1, p. 185) // Par_7.31 //

mahīṃ spṛṣṭvāgataṃ toyaṃ yāś cāpy anyonyavipruṣaḥ /

bhuktocchiṣṭaṃ tathā snehaṃ nocchiṣṭaṃ manur abravīt (II,1, p. 186) // Par_7.32 //

tāmbūlekṣuphale caiva bhuktasnehānulepane /

madhuparke ca some ca nocchiṣṭaṃ dharmato viduḥ // Par_7.33 //

rathyākardamatoyāni nāvaḥ panthās tṛṇāni ca /

mārutārkeṇa śudhyanti pakveṣṭakacitāni ca // Par_7.34 //

aduṣṭā saṃtatā dhārā vātoddhūtāś ca reṇavaḥ /

striyo vṛddhāś ca bālāś ca na duṣyanti kadācana (II,1, p. 188) // Par_7.35 //

deśabhaṅge pravāse vā vyādhiṣu vyasaneṣv api /

rakṣed eva svadehādi- paścād dharmaṃ samācaret (II,1, p. 196) // Par_7.36 //

yena kena ca dharmeṇa mṛdunā dāruṇena vā /

uddhared dīnam ātmānaṃ samartho dharmam ācaret (II,1, p. 197) // Par_7.37 //

āpatkāle tu nistīrṇe śaucācāraṃ tu cintayet /

śuddhiṃ samuddharet paścāt svastho dharmaṃ samācaret // Par_7.38 //