Hui taakhir to kuch baais-e-taakhir bhi tha

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 73 chapter_title: "Hui taakhir to kuch baais-e-taakhir bhi tha" chapter_slug: "73-hui-taakhir-to-kuch-baais-e-taakhir-bhi-tha" variant_id: "52fb1405-96e0-4a2b-9c5a-9ad2c04fc35a" content_type: transliteration layout: verse language: Urdu source_language: Urdu language_direction: ltr script: latin word_count: 180 estimated_read_time: 1

Hui taakhir to kuch baais-e-taakhir bhi tha Aap aate the magar koi inaan-geer bhi tha

Tum se be-ja hai mujhe apni tabaahi ka gila Us mein kuch shaaiba-e-khoobi-e-taqdeer bhi tha

Tu mujhe bhool gaya ho to pata batla doon Kabhi fitraak mein tere koi nakhcheer bhi tha

Qaid mein hai tere vehshi ko wahi zulf ki yaad Haan kuch ik ranj-e-giraan-baari-e-zanjeer bhi tha

Bijli ik kaund gayi aankhon ke aage to kya Baat karte ke main lab-tishna-e-taqreer bhi tha

Yusuf us ko kahun aur kuch na kahe khair hui Gar bigad baithe to main laaiq-e-taazeer bhi tha

Dekh kar ghair ko ho kyun na kaleja thanda Naala karta tha valay taalib-e-taaseer bhi tha

Peshe mein aib nahi rakhiye na Farhad ko naam Hum hi aashufta-saron mein woh jawaan-e-meer bhi tha

Hum the marne ko khade paas na aaya na sahi Aakhir us shokh ke tarkash mein koi teer bhi tha

Pakde jaate hain farishton ke likhe par na-haq Aadmi koi hamara dam-e-tehreer bhi tha

Rekhte ke tumheen ustaad nahin ho Ghalib Kehte hain agle zamaane mein koi Mir bhi tha