siyahi jaise gir jaaye dam-e-tahreer kaghaz par

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 234 chapter_title: "siyahi jaise gir jaaye dam-e-tahreer kaghaz par" chapter_slug: "234-siyahi-jaise-gir-jaaye-dam-e-tahreer-kaghaz-par" variant_id: "65c033cf-d3af-432c-94e1-6e1db4800540" content_type: transliteration layout: verse language: Urdu source_language: Urdu language_direction: ltr script: latin word_count: 127 estimated_read_time: 1

siyahi jaise gir jaaye dam-e-tahreer kaghaz par meri qismat mein yun tasveer hai shab-haaye-hijraan ki

kahun kya garm-joshi mai-kashi mein shola-ruyan ki ke shama-e-khana-e-dil aatish-e-mai se ferozan ki

hamesha mujh ko tifli mein bhi mashq-e-teera-rozi thi siyahi hai mere ayyam mein lauh-e-dabistan ki

daregh aah-e-seher-gah kaar-e-baad-e-subah karti hai ke hoti hai zyada sard-mehri shama-ruyan ki

mujhe apne junoon ki be-takalluf parda-daari thi valekin kya karun aave jo ruswai garebaan ki

hunar paida kiya hai maine hairat-aazmai mein ke jauhar aaine ka har palak hai chashm-e-hairaan ki

khudaya kis qadar ehl-e-nazar ne khaak chhaani hai ke hain sad-rakhna jun-e-ghirbaal deewaren gulistan ki

hua sharm-e-tahi-dasti se woh bhi sar-nigun aakhir bas ae zakhm-e-jigar ab dekh le shorish namak-daan ki

ba-yaad-e-garmi-e-suhbat ba-rang-e-shola dehke hai chhipaun kyunkar Ghalib sozishen daagh-e-numayan ki