naveed-e-aman hai bedaad-e-dost jaan ke liye

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 226 chapter_title: "naveed-e-aman hai bedaad-e-dost jaan ke liye" chapter_slug: "226-naveed-e-aman-hai-bedaad-e-dost-jaan-ke-liye" variant_id: "1e5841bf-dc72-4d8f-8248-017afc731f41" content_type: transliteration layout: verse language: Urdu source_language: Urdu language_direction: ltr script: latin word_count: 204 estimated_read_time: 1

naveed-e-aman hai bedaad-e-dost jaan ke liye rahi na tarz-e-sitam koi aasmaan ke liye

bala se gar mizha-e-yaar tishna-e-khoon hai rakkhoon kuch apni bhi mizhgaan-e-khoon-fishaan ke liye

woh zinda hum hain ke hain roshnaas-e-khalq ae Khizr na tum ke chor bane umr-e-jaavedaan ke liye

raha bala mein bhi main mubtilaa-e-aafat-e-rashk balaaye-jaan hai ada teri ik jahaan ke liye

falak na door rakh iss se mujhe ke main hi nahin daraaz-dasti-e-qaatil ke imtihaan ke liye

misaal yeh meri koshish ki hai ke murgh-e-aseer kare qafas mein faraaham khas aashiyaan ke liye

gada samajh ke woh chup tha meri jo shaamat aayi utha aur uth ke qadam maine paasbaan ke liye

ba-qadr-e-shauq nahin zarf-e-tangnaaye-ghazal kuch aur chahiye vus'at mere bayaan ke liye

diya hai khalq ko bhi ta use nazar na lage bana hai aish Tajammul Husain Khan ke liye

zubaan pe baar-Khudaya yeh kis ka naam aaya ke mere nutq ne bose meri zubaan ke liye

Naseer-ud-daulat-o-deen aur Moin-ul-millat-o-mulk bana hai charkh-e-bareen jiss ke aastaan ke liye

zamaana ehd mein uss ke hai mahv-e-aaraaish banein ge aur sitaare ab aasmaan ke liye

waraq tamaam hua aur madh baaqi hai safeena chahiye iss behr-e-bekaraan ke liye

adaa-e-khaas se Ghalib hua hai nukta-sara salaa-e-aam hai yaaraan-e-nukta-daan ke liye