Yeh na thi hamari qismat ke visaal-e-yaar hota

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 204 chapter_title: "Yeh na thi hamari qismat ke visaal-e-yaar hota" chapter_slug: "204-yeh-na-thi-hamari-qismat-ke-visaal-e-yaar-hota" variant_id: "fbbed6f0-d8de-47e0-bceb-66dab3db7d2b" content_type: transliteration layout: verse language: Urdu source_language: Urdu language_direction: ltr script: latin word_count: 190 estimated_read_time: 1

Yeh na thi hamari qismat ke visaal-e-yaar hota Agar aur jeete rehte yahi intezaar hota

Tere waade par jiye hum toh yeh jaan jhoot jaana Ke khushi se mar na jaate agar aitbaar hota

Teri naazuki se jaana ke bandha tha ehd booda Kabhi tu na tod sakta agar ustuwaar hota

Koi mere dil se pooche tere teer-e-neemkash ko Yeh khalish kahan se hoti jo jigar ke paar hota

Yeh kahan ki dosti hai ke bane hain dost naaseh Koi chaarasaaz hota koi ghamgusaar hota

Rag-e-sang se tapakta woh lahu ke phir na thamta Jise gham samajh rahe ho yeh agar sharaar hota

Gham agarche jaan-gusil hai pe kahan bachein ke dil hai Gham-e-ishq gar na hota gham-e-rozgaar hota

Kahoon kis se main ke kya hai shab-e-gham buri bala hai Mujhe kya bura tha marna agar ek baar hota

Huye mar ke hum jo ruswa huye kyun na ghark-e-dariya Na kabhi janaza uthta na kahin mazaar hota

Use kaun dekh sakta ke yagaana hai woh yakta Jo du'i ki bu bhi hoti toh kahin do-chaar hota

Yeh masaail-e-tasawwuf yeh tera bayaan Ghalib Tujhe hum wali samajhte jo na baada-khwaar hota