Shikwe ke naam se be-mehr khafa hota hai

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 184 chapter_title: "Shikwe ke naam se be-mehr khafa hota hai" chapter_slug: "184-shikwe-ke-naam-se-be-mehr-khafa-hota-hai" variant_id: "a8cd0786-f6d2-471b-8c1c-d29b9d797420" content_type: transliteration layout: verse language: Urdu source_language: Urdu language_direction: ltr script: latin word_count: 203 estimated_read_time: 1

Shikwe ke naam se be-mehr khafa hota hai Yeh bhi mat keh ke jo kahiye toh gila hota hai

Pur hoon main shikwe se yun raag se jaise baaja Ik zara chheriye phir dekhiye kya hota hai

Go samajhta nahin par husn-e-talaafi dekho Shikwa-e-jaur se sargarm-e-jafa hota hai

Ishq ki raah mein hai charkh-e-makaukab ki woh chaal Sust-rau jaise koi aabla-pa hota hai

Kyun na thehrein hadaf-e-naavak-e-bedaad ke hum Aap utha laate hain gar teer khata hota hai

Khoob tha pehle se hote jo hum apne bad-khwaah Ke bhala chahte hain aur bura hota hai

Naala jaata tha pare arsh se mera aur ab Lab tak aata hai jo aisa hi rasa hota hai

Khaama mera ke woh hai Baarbad-e-bazm-e-sukhan Shah ki madah mein yun naghma-sara hota hai

Ae shehenshah-e-kawaakib sipah-o-mehr-alam Tere ikraam ka haq kis se ada hota hai

Saat aqleem ka haasil jo faraaham keeje Toh woh lashkar ka tere na'l-baha hota hai

Har maheene mein jo yeh badr se hota hai hilaal Aastaan par tere mah naasiya sa hota hai

Main jo gustaakh hoon aaeen-e-ghazal-khwani mein Yeh bhi tera hi karam zauq-faza hota hai

Rakhiyo Ghalib mujhe is talkh-nawaai mein maaf Aaj kuch dard mere dil mein siwa hota hai