Muzhda ae zauq-e-aseeri ke nazar aata hai

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 143 chapter_title: "Muzhda ae zauq-e-aseeri ke nazar aata hai" chapter_slug: "143-muzhda-ae-zauq-e-aseeri-ke-nazar-aata-hai" variant_id: "70f87662-1fb8-44f2-bb86-9e52c37fb697" content_type: transliteration layout: verse language: Urdu source_language: Urdu language_direction: ltr script: latin word_count: 106 estimated_read_time: 1

Muzhda ae zauq-e-aseeri ke nazar aata hai Daam-e-khaali qafas-e-murgh-e-giraftaar ke paas

Jigar-e-tishna-e-aazaar tasalli na hua Joo-e-khoon hum ne bahai bun-e-har khaar ke paas

Mund gayin kholte hi kholte aankhein hai hai Khoob waqt aaye tum is aashiq-e-beemar ke paas

Main bhi ruk ruk ke na marta jo zabaan ke badle Dashna ik tez sa hota mere gham-khwaar ke paas

Dahan-e-sher mein ja baithe lekin ae dil Na khade hojiye khoobaan-e-dil-aazaar ke paas

Dekh kar tujh ko chaman baske namu karta hai Khud-ba-khud pahunche hai gul gosha-e-dastaar ke paas

Mar gaya phod ke sar Ghalib-e-vehshi hai hai Baithna us ka woh aa kar teri deewar ke paas