Manzoor thi yeh shakl tajalli ko noor ki

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 130 chapter_title: Manzoor thi yeh shakl tajalli ko noor ki chapter_slug: "130-manzoor-thi-yeh-shakl-tajalli-ko-noor-ki" variant_id: "3b156995-c549-4658-9a6a-48bb835951bf" content_type: transliteration layout: verse language: Urdu source_language: Urdu language_direction: ltr script: latin word_count: 149 estimated_read_time: 1

Manzoor thi yeh shakl tajalli ko noor ki Qismat khuli tere qad-o-rukh se zahoor ki

Ik khoonchakaan kafan mein karoron banao hain Padti hai aankh tere shaheedon pe hoor ki

Waaiz na tum piyo na kisi ko pila sako Kya baat hai tumhari sharaab-e-tahoor ki

Ladta hai mujh se hashr mein qaatil ke kyun utha Goya abhi suni nahin aawaaz soor ki

Aamad bahaar ki hai jo bulbul hai naghma-sanj Udti si ik khabar hai zabaani tayoor ki

Go waan nahin pe waan ke nikaale hue toh hain Kaabe se in buton ko bhi nisbat hai door ki

Kya farz hai ke sab ko mile ek sa jawaab Aao na hum bhi sair karein koh-e-toor ki

Garmi sahi kalaam mein lekin na is qadar Ki jis se baat uss ne shikaayat zaroor ki

Ghalib gar is safar mein mujhe saath le chalein Hajj ka sawaab nazr karun-ga huzoor ki