Har nafas Iqbal tera aah mein mastoor hai

transliterator: thothica

work_id: "cc61e86c-ca8b-4714-8f37-fe742b33069d" work_slug: "allama-iqbal-bang-e-dara-part-3-cc61e8" work_title: "Bang-E-Dara Part 3" author_name: Allama Iqbal chapter_number: 10 chapter_title: Har nafas Iqbal tera aah mein mastoor hai chapter_slug: "10-har-nafas-iqbal-tera-aah-mein-mastoor-hai" variant_id: "c9d2e1b8-0734-42b6-ae6d-868fbfd92e61" content_type: transliteration layout: verse language: Urdu source_language: Urdu language_direction: ltr script: latin word_count: 256 estimated_read_time: 2

Har nafas Iqbal tera aah mein mastoor hai Seena-e-sozaan tera faryaad se ma'moor hai Naghma-e-umeed teri barbat-e-dil mein nahin Hum samajhte hain yeh Laila tere mehmil mein nahin Gosh aawaz-e-sarood-e-rafta ka joya tera Aur dil hangama-e-haazir se be-parwa tera Qissa-e-gul hum nawayan-e-chaman sunte nahin Ahl-e-mehfil tera paighaam-e-kuhan sunte nahin Ae dara-e-kaarvaan-e-khufta paa! khaamosh reh Hai bohot yaas aafreen teri sada, khaamosh reh Zinda phir woh mehfil-e-dereena ho sakti nahin Shama se roshan shab-e-dosheena ho sakti nahin Hum nasheen! Muslim hoon main, Tauheed ka haamil hoon main Iss sadaqat par azal se shaahid-e-aadil hoon main Nabz-e-maujoodaat mein paida hararat is se hai Aur Muslim ke takhayyul mein jasarat is se hai Haq ne aalam is sadaqat ke liye paida kiya Aur mujhe is ki hifazat ke liye paida kiya Dehr mein gharat-gar-e-baatil parasti main hua Haq toh yeh hai haafiz-e-naamoos-e-hasti main hua Meri hasti perahan-e-uryaani-e-aalam ki hai Mere mit jaane se ruswai bani aadam ki hai Qismat-e-aalam ka Muslim kaukab-e-tabinda hai Jis ki taabani se afsoon-e-seher sharminda hai Aashkara hain meri aankhon pe asrar-e-hayat Keh nahin sakte mujhe na-umeed-e-paikaar-e-hayat Kab dara sakta hai gham ka aarzi manzar mujhe Hai bharosa apni millat ke muqaddar par mujhe Yaas ke unsur se hai azaad mera rozgaar Fateh-e-kaamil ki khabar deta hai josh-e-kaarzar Haan yeh sach hai chashm bar ehd-e-kuhan rehta hoon main Ahl-e-mehfil se purani dastaan kehta hoon main Yaad-e-ehd-e-rafta meri khaak ko akseer hai Mera maazi mere istiqbaal ki tafseer hai Saamne rakhta hoon is daur-e-nishaat afzaa ko main Dekhta hoon dosh ke aaine mein farda ko main