Chaand

transliterator: thothica

work_id: "cc61e86c-ca8b-4714-8f37-fe742b33069d" work_slug: "allama-iqbal-bang-e-dara-part-3-cc61e8" work_title: "Bang-E-Dara Part 3" author_name: Allama Iqbal chapter_number: 3 chapter_title: Chaand chapter_slug: "03-chaand" variant_id: "9d6e0cec-f791-464b-9d87-2e6de3d74921" content_type: transliteration layout: verse language: Urdu source_language: Urdu language_direction: ltr script: latin word_count: 137 estimated_read_time: 1

Chaand (Chaand)

Ae Chaand! Husn tera fitrat ki aabru hai Tauf Hareem-e-khaaki teri qadeem khoo hai Yeh Daagh sa jo tere seene mein hai numayaan Aashiq Hai tu kisi ka, yeh daagh aarzoo hai? Mein Muztarib zameen par, betaab tu falak par Tujh Ko bhi justaju hai, mujh ko bhi justaju hai Insaan Hai shama jiss ki, mehfil wohi hai teri? Mein Jiss taraf rawaan hoon, manzil wohi hai teri? Tu Dhoondta hai jiss ko taaron ki khaamoshi mein Posheeda Hai woh shaayad ghogha-e-zindagi mein Istaada Sarv mein hai, sabze mein so raha hai Bulbul Mein naghma-zan hai, khaamosh hai kali mein Aa ! Mein tujhe dikhaaun rukhsaar-e-roshan uss ka Nehron Ke aainay mein shabnam ki aarsi mein Sehra o dasht o dar mein, kohsaar mein wohi hai Insaan Ke dil mein, tere rukhsaar mein wohi hai