Fikr-e-insaan par teri hasti se yeh roshan hua
20th Century Allama Iqbal Urdutransliterator: thothica
work_id: "55b25cac-46ff-446c-bfe7-0ae5b8541ad8" work_slug: "allama-iqbal-bang-e-dara-part-1-55b25c" work_title: "Bang-E-Dara Part 1" author_name: Allama Iqbal chapter_number: 24 chapter_title: "Fikr-e-insaan par teri hasti se yeh roshan hua" chapter_slug: "24-fikr-e-insaan-par-teri-hasti-se-yeh-roshan-hua" variant_id: "8ded2e49-56bb-4d22-927a-2b8fea32b4f7" content_type: transliteration layout: verse language: Urdu source_language: Urdu language_direction: ltr script: latin word_count: 200 estimated_read_time: 1
Fikr-e-insaan par teri hasti se yeh roshan hua Hai par-e-murgh-e-takhaiyul ki rasaai ta kuja Tha sarapa rooh tu, bazm-e-sukhan paikar tera Zaib-e-mehfil bhi raha, mehfil se pinhaan bhi raha Deed teri aankh ko uss husn ki manzoor hai Ban ke soz-e-zindagi har shai mein jo mastoor hai
Mehfil-e-hasti teri barbat se hai sarmaya-daar Jis tarah nadi ke naghmon se sukoot-e-kohsaar Tere firdaus-e-takhaiyul se hai qudrat ki bahaar Teri kisht-e-fikr se ugte hain aalam sabza-waar Zindagi muzmir hai teri shokhi-e-tehreer mein Taab-e-goyai se jumbish hai lab-e-tasveer mein
Nutq ko sau naaz hain tere lab-e-eijaz par Mehv-e-hairat hai surayya rif'at-e-parwaaz par Shaahid-e-mazmoon tasadduq hai tere andaaz par Khanda-zan hai ghuncha-e-Dilli gul-e-Shiraz par Aah! Tu ujri hui Dilli mein aaramida hai Gulshan-e-Weimar mein tera hum-nawa khwabida hai
Lutf-e-goyai mein teri hum-sari mumkin nahin Ho takhaiyul ka na jab tak fikr-e-kaamil hum-nasheen Haaye! Ab kya ho gayi Hindustan ki sar-zameen Aah! Ae nazara-amoz nigaah-e-nukta-been Gaisu-e-Urdu abhi minnat-pazeer-e-shana hai Shama yeh saudai-e-dil-sozi-e-parwana hai
Ae Jahanabad, ae gehwara-e-ilm-o-hunar Hain sarapa naala-e-khamosh tere baam-o-dar Zarre zarre mein tere khwabida hain shams-o-qamar Yun toh posheeda hain teri khaak mein laakhon gauhar Dafn tujh mein koi fakhr-e-rozgaar aisa bhi hai? Tujh mein pinhaan koi moti aabdaar aisa bhi hai?