Ek_Gaye_aur_Bakri

transliterator: thothica

work_id: "55b25cac-46ff-446c-bfe7-0ae5b8541ad8" work_slug: "allama-iqbal-bang-e-dara-part-1-55b25c" work_title: "Bang-E-Dara Part 1" author_name: Allama Iqbal chapter_number: 22 chapter_title: Ek_Gaye_aur_Bakri chapter_slug: "22-ek-gaye-aur-bakri" variant_id: "7a57900f-34d9-4529-9692-1cc608e40177" content_type: transliteration layout: verse language: Urdu source_language: Urdu language_direction: ltr script: latin word_count: 362 estimated_read_time: 2

Ek Gaaye aur Bakri (Ek Gaye aur Bakri)

Ik charagah hari bhari thi kahin Thi sarapa bahaar jis ki zameen Kya samaan us bahaar ka ho bayaan Har taraf saaf nadiyaan theen rawaan The anaaron ke be-shumaar darakht Aur peepal ke saaya-daar darakht Thandi thandi hawayein aati theen Taairon ki sadayein aati theen Kisi nadi ke paas ik bakri Charte charte kahin se aa nikli Jab thehar kar idhar udhar dekha Paas ik gaaye ko khade paaya Pehle jhuk kar usse salaam kiya Phir saleeqe se yun kalaam kiya Kyun Badi Bi! mizaaj kaise hain Gaaye boli keh khair achhe hain Kat rahi hai buri bhali apni Hai museebat mein zindagi apni Jaan par aa bani hai, kya kahiye Apni qismat buri hai, kya kahiye Dekhti hoon Khuda ki shaan ko main Ro rahi hoon buron ki jaan ko main Zor chalta nahin ghareebon ka Pesh aaya likha naseebon ka Aadmi se koi bhala na kare Uss se paala pade, Khuda na kare Doodh kam doon to badbadata hai Hoon jo dubli to bech khaata hai Hathkandon se ghulam karta hai Kin farebon se raam karta hai Uss ke bachon ko paalti hoon main Doodh se jaan daalti hoon main Badle neki ke yeh buraai hai Mere Allah! teri duhaai hai Sun ke bakri yeh maajra saara Boli , aisa gila nahin achha Baat sachi hai be-maza lagti Main kahoon gi magar Khuda lagti Yeh charagah, yeh thandi thandi hawa Yeh hari ghaas aur yeh saaya Aisi khushiyan hamein naseeb kahan Yeh kahan, be-zubaan ghareeb kahan ! Yeh maze aadmi ke dam se hain Lutf saare usi ke dam se hain Uss ke dam se hai apni aabadi Qaid hum ko bhali, keh aazaadi ! Sau tarah ka banon mein hai khatka Waan ki guzraan se bachaye Khuda Hum peh ehsaan hai bada uss ka Hum ko zeba nahin gila uss ka Qadr aaraam ki agar samjho Aadmi ka kabhi gila na karo Gaaye sun kar yeh baat sharmaayi Aadmi ke gile se pachhtaayi Dil mein parkha bhala bura uss ne Aur kuchh soch kar kaha uss ne Yun to chhoti hai zaat bakri ki Dil ko lagti hai baat bakri ki