Ek Makra aur Makhi

transliterator: thothica

work_id: "55b25cac-46ff-446c-bfe7-0ae5b8541ad8" work_slug: "allama-iqbal-bang-e-dara-part-1-55b25c" work_title: "Bang-E-Dara Part 1" author_name: Allama Iqbal chapter_number: 20 chapter_title: Ek Makra aur Makhi chapter_slug: "20-ek-makra-aur-makhi" variant_id: "e6183de2-0a3c-4e9e-961e-812fca1e1323" content_type: transliteration layout: verse language: Urdu source_language: Urdu language_direction: ltr script: latin word_count: 418 estimated_read_time: 2

Ek Makra aur Makhi (Ek Makra aur Makhi)

Ek din kisi makkhi se yeh kehne laga makra Is raah se hota hai guzar roz tumhara Lekin meri kutia ki na jaagi kabhi qismat Bhoole se kabhi tum ne yahan paaon na rakha Ghairon se na miliye to koi baat nahin hai Apnon se magar chahiye yun khinch ke na rehna Aao jo mere ghar mein toh izzat hai yeh meri Woh saamne seedhi hai jo manzoor ho aana Makkhi ne suni baat jo makray ki to boli Hazrat! kisi nadaan ko deejiye ga yeh dhoka Is jaal mein makkhi kabhi aane ki nahin hai Jo aap ki seedhi pe charha, phir nahin utra Makray ne kaha wah! farebi mujhe samjhe Tum sa koi nadaan zamanay mein na ho ga Manzoor tumhari mujhe khaatir thi wagarna Kuch fayeda apna to mera is mein nahin tha Udti hui aayi ho Khuda jaane kahan se Thehro jo mere ghar mein to hai is mein bura kya! Is ghar mein kayi tum ko dikhane ki hain cheezein Bahar se nazar aata hai chhoti si yeh kutia Latke huye darwazon pe bareek hain parday Deewaron ko aainon se hai main ne sajaya Mehmaanon ke aaraam ko haazir hain bichhaunay Har shakhs ko samaan yeh mayassar nahin hota Makkhi ne kaha khair, yeh sab theek hai lekin Main aap ke ghar aaun, yeh umeed na rakhna In narm bichhaunon se Khuda mujh ko bachaye So jaye koi in pe to phir uth nahin sakta Makray ne kaha dil mein suni baat jo us ki Phaansun ise kis tarah yeh kam-bakht hai daana Sau kaam khushamad se nikalte hain jahan mein Dekho jise duniya mein khushamad ka hai banda Yeh soch ke makkhi se kaha us ne Badi Bi! Allah ne bakhsha hai bada aap ko rutba Hoti hai use aap ki surat se mohabbat Ho jis ne kabhi ek nazar aap ko dekha Aankhein hain ke heeray ki chamakti hui kaniyan Sar aap ka Allah ne kalghi se sajaya Yeh husn, yeh poshaak, yeh khoobi, yeh safai Phir is pe qayamat hai yeh udte hue gaana Makkhi ne suni jab yeh khushamad to paseeji Boli ke nahin aap se mujh ko koi khatka Inkaar ki aadat ko samajhti hoon bura main Sach yeh hai ke dil todna achha nahin hota Yeh baat kahi aur udi apni jagah se Paas aayi to makray ne uchhal kar use pakda Bhooka tha kayi roz se ab haath jo aayi Aaraam se ghar baith ke makkhi ko uraya