Kya kahun apne chaman se main juda kyonkar hua

transliterator: thothica

work_id: "55b25cac-46ff-446c-bfe7-0ae5b8541ad8" work_slug: "allama-iqbal-bang-e-dara-part-1-55b25c" work_title: "Bang-E-Dara Part 1" author_name: Allama Iqbal chapter_number: 7 chapter_title: Kya kahun apne chaman se main juda kyonkar hua chapter_slug: "07-kya-kahun-apne-chaman-se-main-juda-kyonkar-hua" variant_id: "50b6533c-ad09-4fbd-a8b8-1832fa12067c" content_type: transliteration layout: verse language: Urdu source_language: Urdu language_direction: ltr script: latin word_count: 158 estimated_read_time: 1

Kya kahun apne chaman se main juda kyonkar hua Aur aseer-e-halqa-e-daam-e-hawa kyonkar hua

Jaaye hairat hai bura saare zamaane ka hoon main Mujh ko yeh khil'at sharaafat ka ata kyonkar hua

Kuch dikhane dekhne ka tha taqaza Tur par Kya khabar hai tujh ko ae dil faisla kyonkar hua

Hai talab be-mudda'a hone ki bhi ik mudda'a Murgh-e-dil daam-e-tamanna se riha kyonkar hua

Dekhne waale yahan bhi dekh lete hain tujhe Phir yeh waada-e-hashr ka sabr-aazma kyonkar hua

Husn-e-kaamil hi na ho is be-hijaabi ka sabab Woh jo tha pardon mein pinhaan, khud-numa kyonkar hua

Maut ka nuskha abhi baaqi hai ae dard-e-firaaq! Chaaragar deewana hai, main la-dawa kyonkar hua

Tu ne dekha hai kabhi ae deeda-e-ibrat ke gul Ho ke paida khaak se rangeen-qaba kyonkar hua

Pursish-e-aamaal se maqsad tha ruswai meri Warna zaahir tha sabhi kuch, kya hua, kyonkar hua

Mere mitne ka tamasha dekhne ki cheez thi Kya bataun un ka mera saamna kyonkar hua