Chapter 1

āśramasthaṃ sukhāsīnaṃ vedaśāstraviśāradam /

apṛcchann ṛṣayo gatvā yamaṃ yamitamānasam // YSS_1.1 //

ṛṣayaḥ

mahāpātakasaṃyuktāḥ upapātakinas tathā /

yair yair vratair viśudhyanti tan no brūhi mahāmune // YSS_1.2 //

yamaḥ

divā vātārkasaṃspṛṣṭaṃ rātrau nakṣatramārutaiḥ /

saṃdhyādvayor vā saṃdhyābhyāṃ pavitraṃ sarvadā jalam // YSS_1.3 //

svabhāvayuktam avyāptam amedhyena sadā śuci /

bhāṇḍasthaṃ dharaṇīsthaṃ vā pānīyaṃ pāvanaṃ nṛṇāṃ // YSS_1.4 //

amedhyena tu saṃspṛṣṭo rātrāv ahani vā dvijaḥ /

sadyaḥ snātvā spṛśed agniṃ sandhyayoś ca sadā śuciḥ // YSS_1.4A //

śvāpadoṣṭrahayādyaiś ca mānuṣaiś caritaṃ vinā /

daṣṭaḥ snātvā śuciḥ sadyo naraḥ saṃdhyādirātriṣu // YSS_1.5 //

antyād ajñānato bhuktvā caṇḍālānnaṃ kathañcana /

gomūtrayāvakāhāro daśarātreṇa śudhyati // YSS_1.6 //

jalāgnyudbandhanabhraṣṭāḥ pravrajyānāśakacyutāḥ /

viṣaprapatanaprāyāḥ śastraghātahatāś ca ye // YSS_1.7 //

navaite pratyavasitāḥ sarvadharmabahiṣkṛtāḥ /

cāndrāyaṇena śudhyanti taptakṛcchradvayena vā // YSS_1.8 //

ubhayāvāsinaḥ pāpā ye śyāmaśabalācyutāḥ /

aindavābhyāṃ viśudhyanti dattvā dhenuṃ tathā vṛṣaṃ // YSS_1.9 //

gobrāhmaṇahataṃ dagdhvā mṛtam udbandhanena ca /

pāśaṃś chittvā tathā tasya kṛcchraṃ sāṃtapanaṃ caret // YSS_1.10 //

kṛmibhir vraṇasaṃbhūtair makṣikādyupaghātitaḥ /

kṛcchrābdaṃ samprakurvīta parāko mohasaṃgamāt // YSS_1.11 //

ekaike tu kṛte pāpe prāyaścittaṃ vidur budhāḥ /

sarvapātakasampāte prāyaścittaṃ na vidyate // YSS_1.12 //

sarvapātakasampāte kapālagrahaṇaṃ smṛtam /

tat kāpālikam asyāgraṃ prāyaścittaṃ manīṣibhiḥ // YSS_1.13 //

kāpālikānnabhoktṝṇāṃ tannārīgāmināṃ tathā /

jñānāt kṛcchrābdam uddiṣṭam ajñānād aindavadvayam // YSS_1.14 //

surāmadyapāne kṛte gomāṃsabhakṣaṇe 'pi vā /

taptakṛcchraparikliṣṭo mauñjīhomena śudhyati // YSS_1.15 //

prāyaścitte 'vyavasite kartā yadi vipadyate /

śuddhas tad ahar evāsāv ihaloke paratra ca // YSS_1.16 //

yāvad eko 'pṛthagdravyaḥ prāyaścittaṃ niṣevate /

apraśastās tu taṃ spṛṣṭvā bhaveyuḥ te vigarhitāḥ // YSS_1.17 //

asaṃbhojyā apratigrāhyā asaṃpāṭhyā avivāhinaḥ /

pūyante tadvrate pūrṇe sarve te (')rikthabhāginaḥ // YSS_1.18 //

aśītir yasya varṣāṇi bālo vāpy ūnaṣoḍaśaḥ /

prāyaścittārdham arhanti striyo rogiṇa eva ca // YSS_1.19 //

apūrṇaṣoḍaśābdasya caturvarṣādhikasya ca /

prāyaścittaṃ cared bhrātā pitā vānyo 'pi bāndhavaḥ // YSS_1.20 //

ato bālatarasyāsya nāparādho na pātakaṃ /

rājadaṇḍo na tasyāsti prāyaścittaṃ ca neṣyate // YSS_1.21 //

kṛcchraṃ sāṃtapanaṃ kuryād hatvā saṃkīrṇayonijam /

sūtaṃ hatvātikṛcchraṃ tu kuṇḍagolakam eva ca // YSS_1.22 //

striyo hatvāviśeṣeṇa carec cāndrāyaṇavratam /

hatvā gāṃ kṣatriyaṃ vaiśyaṃ śūdraṃ vāpy anulomajam // YSS_1.23 //

eṣāṃ bhuktvā striyo gatvā tathaiva pratigṛhya ca /

kṛcchrābdam abdakṛcchraṃ vā śuddhyarthaṃ samyag ācaret // YSS_1.23A //

anyaprāṇilayaṃ kurvan dadyāc chaktyā ca dakṣiṇām /

kṛcchraṃ cāpi caren nityaṃ prājāpatyam iti sthitiḥ // YSS_1.24 //

mahāpātakakartāraś catvāro 'py aviśeṣataḥ /

agniṃ praviśya śudhyanti snānād vāpi hayakratau // YSS_1.25 //

rahasyakāriṇas tv ete māghamāse tu pauruṣam /

japtvāghamarṣaṇaṃ sūktaṃ śudhyanty antarjale sthitāḥ // YSS_1.26 //

paradāre nare ṣaṇḍe hayājāvipaśuṣv api /

āgomaithunam āsevyaḥ pāvamānīs tryahaṃ japet // YSS_1.27 //

caṇḍālādyāsu nārīṣu goṣu maithunakāriṇaḥ /

japtvāghamarṣaṇaṃ pakṣaṃ śudhyanti hi payovratāḥ // YSS_1.28 //

mātaraṃ gurupatnīṃ ca svasāraṃ duhitāṃ tathā /

gatvā tu praviśed agniṃ nānyaśuddhir vidhīyate // YSS_1.29 //

svasāraṃ ca pitur mātuḥ svasutāṃ mātulasya ca /

putrasya bhāryāṃ gatvā tu ṣaṇmāsaṃ kṛcchram ācaret // YSS_1.30 //

ṣaṭcatasras tathānyāś ca bandhubhyāṃ pitṛmātṛtaḥ /

gatvaitāṃś ca sagotrāṃ ca parākaṃ kṛcchram ācaret // YSS_1.31 //

rajakaś carmakāraś ca naṭo buruḍa eva ca /

kaivartaś caiva śailūṣo mallaś cāntyāvasāyinaḥ // YSS_1.32 //

eṣāṃ bhuktvā ca pītvā ca rahas saṃkamya vā sakṛt /

āsye ca maithunaṃ kṛtvā taptakṛcchraṃ samācaret // YSS_1.32A //

caṇḍālamuṣṭikāś caiva tathā saṃkīrṇayonijāḥ // YSS_1.32 B //

eṣāṃ bhuktvā striyo gatvā tathaiva pratigṛhya ca /

jñānāt kṛcchrābdam uddiṣṭam ajñānād aindavaṃ smṛtaṃ // YSS_1.33 //

kulācārasmṛto yeṣāṃ surāpānaṃ tu yoṣitāṃ /

patitakṣetrasaṃbhūtāḥ te 'kulācārikāḥ smṛtāḥ // YSS_1.34 //

caturṇām api varṇānāṃ bāhyā brāhmaṇamāninaḥ /

pāraṃparyeṇa saṃkīrṇā varjanīyāḥ prayatnataḥ // YSS_1.35 //

ārūḍhapatitāj jāto brāhmaṇyāṃ śūdrataś ca yaḥ /

caṇḍālau tāv ubhau jñeyau sagotrād yaś ca jāyate // YSS_1.36 //

jārajātaḥ savarṇāyāṃ kuṇḍo jīvati bhartari /

mṛte golakanāmā tu jātihīnau tathāiva tau // YSS_1.37 //

asavarṇāsu nārīṣu dvijair utpāditāś ca ye /

parapatnīṣu sarvāsu kuṇḍāḥ te golakāḥ smṛtāḥ // YSS_1.37A //

mātṛvarṇā na te proktāḥ pitṛvarṇā na te smṛtāḥ /

avivāhyāḥ sutāś caiva bandhubhiḥ pitṛmātṛtaḥ // YSS_1.38 //

mātṛsvatantrair nṛpasaṃgataiś ca bālādivṛddhair nṛpapīḍitaiś ca /

bhāṣā pravṛttā na khalu pramāṇam na hy uttaraṃ naiva kṛtaṃ kṛtās te // YSS_1.39 //

aśvasya hantā puruṣasya hantā chettā tarūṇāṃ ghaṭasevitānāṃ /

parasya dāreṣu ca ye prasaktāḥ te śastravaddhyā na vihīnadaṇḍyāḥ // YSS_1.40 //

yo duṣṭabhāvena parasya hantā hinasti bhāryāṃ sasutaṃ kalatram /

kṣetraṃ tathā dhānyadhanaṃ śarīram taṃ ghātayet mudgarapātaghātaiḥ // YSS_1.41 //

kartānumantā 'py upadeśadātā protsāhakas saṃpratighātakaś ca /

mantrī sahāyas sahavāsyavadhyaḥ śaṅkāviśuddhiḥ puruṣeṇa kāryā // YSS_1.42 //

yo yasya bhaktāśrayadāsasaktaḥ doṣe kṛte tena nareṇa kartā /

tad arpite bhoktari nānuśeyaṃ bhaktapradātā pratimucyate tu // YSS_1.43 //

pare 'pare lobhahatās tatas tu parāvaraś caiva pare 'pare ca // YSS_1.44 //

yajñe vivāhe ca tathotsaveṣu samānapuṃsā 'py asamānapuṃsā /

parābdikām pākavidhau pravṛttiṃ naiteṣu bhaktapradadoṣam āhuḥ // YSS_1.45 //

śastrapradātā viṣavahnido 'pi māsaṃ samāpnoti parāya dattvā /

dharmārthakāmapratipattihetor yadi pravṛttau na paropatāpe // YSS_1.46 //

yo vāhanaṃ kartari vāraṇaṃ vā hy ādāya gacchaty aviśiṣṭabuddhiḥ /

tatrāpi doṣaṃ na vadanti tajjñāḥ tatraiva śuddhaś ca tathaiva daṇḍyaḥ // YSS_1.47 //

bhāryā sutā gotraruhā snuṣā vā bhrātā suto dāsabhṛto jano vā /

yo doṣaduṣṭas sa nṛpeṇa śāsyo nakārakas tu prabhur eṣa dharmaḥ // YSS_1.48 //

dravyapradānena samāsamena karmaprayogena tathā yudhena /

yo vartate yasya narasya citte jñeyas sahāyas tu sukhāsukheṣu // YSS_1.49 //

mahāmṛgaṃ pakṣimṛgaṃ paśuṃ vā samānajātīyam athetaraṃ vā /

acodito hanti narastriyaṃ vā svāmīyagaus tasya na khaṇḍanīyaḥ // YSS_1.50 //

yad yaddhi jātir dvijavargajātyā yāgādikam pāpakṛto na daṇḍyāḥ /

grahapradāneṣu niruddhabaddhāḥ sarpā na hiṃsanti parair abhītāḥ // YSS_1.51 //

taṃ dāpayitvā dhanine nṛpeṇa tatsvāminaḥ prāṇidhanair vimucyaḥ // YSS_1.52 //

dharmārthavādeṣu gavādayo hi svecchāpramādād yadi te mriyante /

tatrāpi doṣañ ca paśupramāṇaṃ nācakṣate dharmavidas tathaiva // YSS_1.53 //

āraṇyakā ye yadi daṃṣṭriṇas tu gāvo mriyante yadi tā adagdhāḥ /

pāpān niroddhuṃ na ca pāśadātuḥ dhārāsvahastaṃ pravadanti pāpaṃ // YSS_1.54 //

eko hato yo bahubhiḥ sametaiḥ na jñāyate kasya mṛtopaghātaiḥ /

divyena teṣām upalabhya hantā nivartanīyo nṛpasaṃniyuktaiḥ // YSS_1.55 //

saṃtyaktajīvo mriyate kadācid niṣpāpakaḥ pātakaśuddhikāryāt // YSS_1.55A //

tarkapramāṇaiḥ pratitarkayitvā kecid vadanty evam idaṃ pramānam /

nityāntajīvo mriyate kadācid vedaiś ca pṛṣṭair ṛṣibhiś ca gītaṃ // YSS_1.56 //

cāndrāyaṇādīni hi pāvanāni pāpā yad icchanti hitāya kartum /

saṃsargam icchanti phalaṃ tathā syāt jñānapradīpena tamo 'ndhakāre // YSS_1.57 //