Chapter 99

Vi_99

dṛṣṭvā śriyaṃ devadevasya viṣṇor gṛhītapādāṃ tapasā jvalantīm /

sutaptajāmbūnadacāruvarṇāṃ papraccha devīṃ vasudhā prahṛṣṭā || Vi_99.1 ||

unnidrakokanadacārukare vareṇye unnidrakokanadanābhigṛhītapāde /

unnidrakokanadasadmasadāsthitīte unnidrakokanadamadhyasamānavarṇe || Vi_99.2 ||

nīlābjanetre tapanīyavarṇe śuklāmbare ratnavibhūṣitāṅgi /

candrānane sūryasamānabhāse mahāprabhāve jagataḥ pradhāne || Vi_99.3 ||

tvam eva nidrā jagataḥ pradhānā lakṣmīr dhṛtiḥ śrīr viratir jayā ca /

kāntiḥ prabhā kīrtir atho vibhūtiḥ sarasvatī vāg atha pāvanī ca || Vi_99.4 ||

svadhā titikṣā vasudhā pratiṣṭhā sthitiḥ sudīkṣā ca tathā sunītiḥ /

khyātir viśālā ca tathānasūyā svāhā ca medhā ca tathaiva buddhiḥ || Vi_99.5 ||

ākramya sarvaṃ tu yathā trilokīṃ tiṣṭhaty ayaṃ devavaro 'sitākṣi /

tathā sthitā tvaṃ varade tathāpi pṛcchāmy ahaṃ te vasatiṃ vibhūteḥ || Vi_99.6 ||

ity evam uktā vasudhāṃ babhāṣe lakṣmīs tadā devavarāgrataḥsthā /

sadā sthitāhaṃ madhusūdanasya devasya pārśve tapanīyavarṇe || Vi_99.7 ||

asyājñayā yaṃ manasā smarāmi śriyā yutaṃ taṃ pravadanti santaḥ /

saṃsmāraṇe cāpy atha yatra cāhaṃ sthitā sadā tac chṛṇu lokadhātri || Vi_99.8 ||

vasāmy athārke ca niśākare ca tārāgaṇāḍhye gagane vimeghe /

meghe tathā lambapayodhare ca śakrāyudhāḍhye ca taḍitprakāśe || Vi_99.9 ||

tathā suvarṇe vimale ca rūpye ratneṣu vastreṣv amaleṣu bhūme /

prāsādamālāsu ca pāṇḍurāsu devālayeṣu dhvajabhūṣiteṣu || Vi_99.10 ||

sadyaḥ kṛte cāpy atha gomaye ca matte gajendre turage prahṛṣṭe /

vṛṣe tathā darpasamanvite ca vipre tathaivādhyayanaprapanne || Vi_99.11 ||

siṃhāsane cāmalake ca bilve chatre ca śaṅkhe ca tathaiva padme /

dīpte hutāśe vimale ca khḍga ādarśabimbe ca tathā sthitāham || Vi_99.12 ||

pūrṇodakumbheṣu sacāmareṣu satālavṛnteṣu vibhūṣiteṣu /

bhṛṅgārapātreṣu manohareṣu mṛdi sthitāhaṃ ca navoddhṛtāyām || Vi_99.13 ||

kṣīre tathā sarpiṣi śādbale ca kṣaudre tathā dadhni puraṃdhrigātre /

dehe kumāryāś ca tathā surāṇāṃ tapasvināṃ yajñahutāṃ ca dehe || Vi_99.14 ||

śare ca saṃgrāmavinirgate ca sthitā mṛte svargasadaḥprayāte /

vedadhvanau cāpy atha śaṅkhaśabde svāhāsvadhāyām atha vādyaśabde || Vi_99.15 ||

rājyābhiṣeke ca tathā vivāhe yajñe vare snātaśirasy athāpi /

puṣpeṣu śukleṣu ca parvateṣu phaleṣu ramyeṣu saridvarāsu || Vi_99.16 ||

saraḥsu pūrṇeṣu tathā jaleṣu saśādvalāyāṃ bhuvi padmakhaṇḍe /

vane ca vatse ca śiśau prahṛṣṭe sādhau nare dharmaparāyaṇe ca || Vi_99.17 ||

ācāraseviny atha śāstranitye vinītaveṣe ca tathā suveṣe /

suśuddhadānte malavarjite ca mṛṣṭāśane cātithipūjake ca || Vi_99.18 ||

svadāratuṣṭe nirate ca dharme dharmotkaṭe cātyaśanād vimukte /

sadā sapuṣpe sasugandhigātre sugandhalipte ca vibhūṣite ca || Vi_99.19 ||

satye sthite bhūtahite niviṣṭe kṣamānvite krodhavivarjite ca /

svakāryadakṣe parakāryadakṣe kalyāṇacitte ca sadā vinīte || Vi_99.20 ||

nārīṣu nityaṃ suvibhūṣitāsu pativratāsu priyavādinīṣu /

amuktahastāsu sutānvitāsu suguptabhāṇḍāsu balipriyāsu || Vi_99.21 ||

saṃmṛṣṭaveśmāsu jitendriyāsu kalivyapetāsv avilolupāsu /

dharmavyapekṣāsu dayānvitāsu sthitā sadāhaṃ madhusūdane ca || Vi_99.22 ||

nimeṣamātraṃ ca vinā kṛtāhaṃ na jātu tiṣṭhe puruṣottamena || Vi_99.23 ||