Chapter 57

Vi_57

atha tyājyāḥ // Vi_57.1 //

vrātyāḥ // Vi_57.2 //

patitāḥ // Vi_57.3 //

tripuruṣaṃ mātṛtaḥ pitṛtaś cāśuddhāḥ // Vi_57.4 //

sarva evābhojyāś cāpratigrāhyāḥ // Vi_57.5 //

apratigrāhyebhyaś ca pratigrahaprasaṅgaṃ varjayet // Vi_57.6 //

pratigraheṇa brāhmaṇānāṃ brāhmaṃ tejaḥ praṇaśyati // Vi_57.7 //

dravyāṇāṃ vāvijñāya pratigrahavidhiṃ yaḥ pratigrahaṃ kuryāt sa dātrā saha nimajjati // Vi_57.8 //

pratigrahasamarthaś ca yaḥ pratigrahaṃ varjayet sa dātṛlokam avāpnoti // Vi_57.9 //

edhodakamūlaphalābhayāmiṣamadhuśayyāsanagṛhapuṣpadadhiśākaṃś cābhyudyatān na nirṇudet // Vi_57.10 //

āhūyābhyudyatāṃ bhikṣāṃ purastād anucoditām /

grāhyāṃ prajāpatir mene api duṣkṛtakarmaṇaḥ || Vi_57.11 ||

nāśnanti pitaras tasya daśa varṣāṇi pañca ca /

na ca havyaṃ vahaty agnir yas tām abhyavamanyate || Vi_57.12 ||

gurūn bhṛtyān ujjihīrṣur arciṣyan pitṛdevatāḥ /

sarvataḥ pratigṛhṇīyān na tu tṛpyet svayaṃ tataḥ || Vi_57.13 ||

eteṣv api ca kāryeṣu samarthas tatpratigrahe /

nādadyāt kulaṭāṣaṇḍha- patitebhyas tathā dviṣaḥ || Vi_57.14 ||

guruṣu tv abhyatīteṣu vinā vā tair gṛhe vasan /

ātmano vṛttim anvicchan gṛhṇīyāt sādhutaḥ sadā || Vi_57.15 ||

ardhikaḥ kulamitraṃ ca dāsagopālanāpitāḥ /

ete śūdreṣu bhojyānnā yaś cātmānaṃ nivedayet || Vi_57.16 ||