Chapter 55

Vi_55

atha rahasyaprāyaścittāni bhavanti // Vi_55.1 //

sravantīm āsādya snātaḥ pratyahaṃ ṣoḍaśa prāṇāyāmān salakṣaṇān kṛtvaikakālaṃ haviṣyāśī māsena brahmahā pūto bhavati // Vi_55.2 //

karmaṇo 'nte payasvinīṃ gāṃ dadyāt // Vi_55.3 //

vratenāghamarṣaṇena ca surāpaḥ pūto bhavati // Vi_55.4 //

gāyatrīdaśasāhasrajapena suvarṇasteyakṛt // Vi_55.5 //

trirātropoṣitaḥ puruṣasūktajapahomābhyāṃ gurutalpagaḥ // Vi_55.6 //

yathāśvamedhaḥ kraturāṭ sarvapāpāpanodakaḥ /

tathāghamarṣaṇaṃ sūktaṃ sarvapāpāpanodakam || Vi_55.7 ||

prāṇāyāmaṃ dvijaḥ kuryāt sarvapāpāpanuttaye /

dahyante sarvapāpāni prāṇāyāmair dvijasya tu || Vi_55.8 ||

savyāhṛtiṃ sapraṇavāṃ gāyatrīṃ śirasā saha /

triḥ paṭhed āyataprāṇaḥ prāṇāyāmaḥ sa ucyate || Vi_55.9 ||

akāraṃ cāpy ukāraṃ ca makāraṃ ca prajāpatiḥ /

vedatrayān niraduhad bhūr bhuvaḥ svar itīti ca || Vi_55.10 ||

tribhya eva tu vedebhyaḥ pādaṃ pādam adūduhat /

tad ity ṛco 'syāḥ sāvitryāḥ parameṣṭhī prajāpatiḥ || Vi_55.11 ||

etad akṣaram etāṃ ca japan vyāhṛtipūrvikām /

saṃdhyayor vedavid vipro vedapuṇyena yujyate || Vi_55.12 ||

sahasrakṛtvas tv abhyasya bahir etat trikaṃ dvijaḥ /

mahato 'py enaso māsāt tvacevāhir vimucyate || Vi_55.13 ||

etattrayavisaṃyuktaḥ kāle ca kriyayā svayā /

viprakṣatriyaviḍjātir garhaṇāṃ yāti sādhuṣu || Vi_55.14 ||

oṃkārapūrvikās tisro mahāvyāhṛtayo 'vyayāḥ /

tripadā caiva gāyatrī vijñeyā brāhmaṇo mukham || Vi_55.15 ||

yo 'dhīte 'hany ahany etāṃ trīṇi varṣāṇy atandritaḥ /

sa brahma param abhyeti vāyubhūtaḥ khamūrtimān || Vi_55.16 ||

ekākṣaraṃ paraṃ brahma prāṇāyāmāḥ paraṃ tapaḥ /

sāvitryās tu paraṃ nānyan maunāt satyaṃ viśiṣyate || Vi_55.17 ||

kṣaranti sarvā vaidikyo juhotiyajatikriyāḥ /

akṣaraṃ tv akṣaraṃ jñeyaṃ brahmā caiva prajāpatiḥ || Vi_55.18 ||

vidhiyajñāj japayajño viśiṣṭo daśabhir guṇaiḥ /

upāṃśuḥ syāc chataguṇaḥ sahasro mānasaḥ smṛtaḥ || Vi_55.19 ||

ye pākayajñāś catvāro vidhiyajñasamanvitāḥ /

te sarve japayajñasya kalāṃ nārhanti ṣoḍaśīm || Vi_55.20 ||

japyenaiva tu saṃsidhyed brāhmaṇo nātra saṃśayaḥ /

kuryād anyan na vā kuryān maitro brāhmaṇa ucyate || Vi_55.21 ||