Chapter 54

Vi_54

yaḥ pāpātmā yena saha saṃyujyate sa tasyaiva prāyaścittaṃ kuryāt // Vi_54.1 //

mṛtapañcanakhāt kūpād atyantopahatāc codakaṃ pītvā brāhamaṇas trirātram upavaset // Vi_54.2 //

dvyahaṃ rājanyaḥ // Vi_54.3 //

ekāhaṃ vaiśyaḥ // Vi_54.4 //

śūdro naktam // Vi_54.5 //

sarve cānte vratasya pañcagavyaṃ pibeyuḥ // Vi_54.6 //

pañcagavyaṃ pibec chūdro brāhmaṇas tu surāṃ pibet /

ubhau tau narakaṃ yāto mahārauravasaṃjñitam || Vi_54.7 ||

parvānārogyavarjam ṛtāv avagacchan patnīṃ trirātram upavaset // Vi_54.8 //

kūṭasākṣī brahmahatyāvrataṃ caret // Vi_54.9 //

anudakamūtrapurīṣakaraṇe sacailaṃ snānaṃ mahāvyāhṛtihomaś ca // Vi_54.10 //

sūryābhyuditanirmuktaḥ sacailasnātaḥ sāvitryaṣṭaśatam āvartayet // Vi_54.11 //

śvasṛgālaviḍvarāhakharavānaravāyasapuṃścalībhir daṣṭaḥ sravantīm āsādya ṣoḍaśa prāṇāyāmān kuryāt // Vi_54.12 //

vedāgnyutsādī triṣavaṇasnāyy adhaḥśāyī saṃvatsaraṃ sakṛdbhaikṣyeṇa varteta // Vi_54.13 //

samutkarṣānṛte guroś cālīkanirbandhe tadākṣepaṇe ca māsaṃ payasā varteta // Vi_54.14 //

nāstiko nāstikavṛttiḥ kṛtaghnaḥ kūṭavyavahārī brāhmaṇavṛttighnaś caite saṃvatsaraṃ bhaikṣyeṇa varteran // Vi_54.15 //

parivittiḥ parivettā ca yayā ca parividyate dātā yājakaś ca cāndrāyaṇaṃ kuryāt // Vi_54.16 //

prāṇibhūpuṇyasomavikrayī taptakṛcchram // Vi_54.17 //

ārdrauṣadhigandhapuṣpaphalamūlacarmavetravidalatuṣakapālakeśabhasmāsthigorasapiṇyākatilatailavikrayī prājāpatyam // Vi_54.18 //

ślaiṣmajatumadhūcchiṣṭaśaṅkhaśuktitrapusīsakṛṣṇalohaudumbarakhaḍgapātravikrayī cāndrāyaṇaṃ kuryāt // Vi_54.19 //

raktavastraraṅgaratnagandhaguḍamadhurasorṇāvikrayī trirātram upavaset // Vi_54.20 //

māṃsalavaṇalākṣākṣīravikrayī cāndrāyaṇaṃ kuryāt // Vi_54.21 //

taṃ ca bhūyaś copanayet // Vi_54.22 //

uṣṭreṇa khareṇa vā gatvā nagnaḥ snātvā suptvā bhuktvā prāṇāyāmatrayam kuryāt // Vi_54.23 //

japitvā trīṇi sāvitryāḥ sahasrāṇi samāhitaḥ /

māsaṃ goṣṭhe payaḥ pītvā mucyate 'satpratigrahāt || Vi_54.24 ||

ayājyayājanaṃ kṛtvā pareṣām antyakarma ca /

abhicāram ahīnaṃ ca tribhiḥ kṛcchrair vyapohati || Vi_54.25 ||

yeṣāṃ dvijānāṃ sāvitrī nānūcyeta yathāvidhi /

tāṃś cārayitvā trīn kṛcchrān yathāvidhy upanāyayet || Vi_54.26 ||

prāyaścittaṃ cikīrṣanti vikarmasthās tu ye dvijāḥ /

brāhmaṇyāc ca parityaktās teṣām apy etad ādiśet || Vi_54.27 ||

yad garhitenārjayanti karmaṇā brāhmaṇā dhanam /

tasyotsargeṇa śudhyanti japyena tapasā tathā || Vi_54.28 ||

vedoditānāṃ nityānāṃ karmaṇāṃ samatikrame /

snātakavratalope ca prāyaścittam abhojanam || Vi_54.29 ||

avagūrya caret kṛcchram atikṛcchraṃ nipātane /

*kṛcchrātikṛcchraṃ kurvīta viprasyotpādya śoṇitam [kucchra] || Vi_54.30 ||

enasvibhir nirṇiktair nārthaṃ kiṃcit samācaret /

kṛtanirṇejanāṃś caitān na jugupseta dharmavit || Vi_54.31 ||

bālaghnāṃś ca kṛtaghnāṃś ca viśuddhān api dharmataḥ /

śaraṇāgatahantṝṃś ca strīhantṝṃś ca na saṃvaset || Vi_54.32 ||

aśītir yasya varṣāṇi bālo vāpy ūnaṣoḍaśaḥ /

prāyaścittārdham arhanti striyo rogiṇa eva ca || Vi_54.33 ||

anuktaniṣkṛtīnāṃ tu pāpānām apanuttaye /

śaktiṃ cāvekṣya pāpaṃ ca prāyaścittaṃ prakalpyet || Vi_54.34 ||