Chapter 43

Vi_43

atha narakāḥ // Vi_43.1 //

tāmisram // Vi_43.2 //

andhatāmisram // Vi_43.3 //

rauravam // Vi_43.4 //

mahārauravam // Vi_43.5 //

kālasūtram // Vi_43.6 //

mahānarakam // Vi_43.7 //

saṃjīvanam // Vi_43.8 //

avīci // Vi_43.9 //

tapanam // Vi_43.10 //

saṃpratāpanam // Vi_43.11 //

saṃghātakam // Vi_43.12 //

kākolam // Vi_43.13 //

kuḍmalam // Vi_43.14 //

pūtimṛttikam // Vi_43.15 //

lohaśaṅkuḥ // Vi_43.16 //

ṛbīsam // Vi_43.17 //

viṣamapanthāḥ // Vi_43.18 //

kaṇṭakaśālmaliḥ // Vi_43.19 //

dīpanadī // Vi_43.20 //

asipatravanam // Vi_43.21 //

lohacārakam iti // Vi_43.22 //

eteṣv akṛtaprāyaścittā atipātakinaḥ paryāyeṇa kalpaṃ pacyante // Vi_43.23 //

mahāpātakino manvantaram // Vi_43.24 //

anupātakinaś ca // Vi_43.25 //

upapātakinaś caturyugam // Vi_43.26 //

kṛtasaṃkarīkaraṇāś ca saṃvatsarasahasram // Vi_43.27 //

kṛtajātibhraṃśakaraṇāś ca // Vi_43.28 //

kṛtāpātrīkaraṇāś ca // Vi_43.29 //

kṛtamalinīkaraṇāś ca // Vi_43.30 //

prakīrṇapātakinaś ca bahūn varṣapūgān // Vi_43.31 //

kṛtapātakinaḥ pāpāḥ prāṇatyāgād anantaram /

yāmyaṃ panthānam āsādya duḥkham aśnanti dāruṇam || Vi_43.32 ||

yamasya puruṣair ghoraiḥ kṛṣyamāṇā yatas tataḥ /

sakṛcchreṇānukāreṇa nīyamānāś ca te yathā || Vi_43.33 ||

śvabhiḥ śṛgālaiḥ kravyādaiḥ kākakaṅkabakādibhiḥ /

agnituṇḍair bhakṣyamāṇā bhujaṅgair vṛścikais tathā || Vi_43.34 ||

agninā dahyamānāś ca tudyamānāś ca kaṇṭakaiḥ /

krakacaiḥ pāṭyamānāś ca pīḍyamānāś ca tṛṣṇayā || Vi_43.35 ||

kṣudhayā vyathamānāś ca ghorair vyāghragaṇais tathā /

pūyaśoṇitagandhena mūrchamānāḥ pade pade || Vi_43.36 ||

parānnapānaṃ lipsantas tādyamānāś ca kiṃkaraiḥ /

kākakaṅkabakādīnāṃ bhīmānāṃ sadṛśānanaiḥ || Vi_43.37 ||

kvacit tailena kvāthyante tāḍyante musalaiḥ kvacit /

āyasīṣu ca vaṭyante śilāsu ca tathā kvacit || Vi_43.38 ||

kvacid vāntam athāśnanti kvacit pūyam asṛk kvacit /

kvacid viṣṭhāṃ kvacin māṃsaṃ pūyagandhi sudāruṇam || Vi_43.39 ||

andhakāreṣu tiṣṭhanti dāruṇeṣu tathā kvacit /

krimibhir bhakṣyamāṇāś ca vahnituṇḍaiḥ sudāruṇaiḥ || Vi_43.40 ||

kvacic chītena bādhyante kvacit cāmedhyamadhyagāḥ /

parasparam athāśnanti kvacit pretāḥ sudāruṇāḥ || Vi_43.41 ||

kvacid bhūtena tāḍyante lambamānās tathā kvacit /

kvacit kṣipyanti bānaughair utkṛtyante tathā kvacit || Vi_43.42 ||

kaṇṭeṣu dattapādāś ca bhujaṅgābhogaveṣṭitāḥ /

pīḍyamānās tathā yantraiḥ kṛṣyamāṇāś ca jānubhiḥ || Vi_43.43 ||

bhagnapṛṣṭhaśirogrīvāḥ sūcīkaṇṭhāḥ sudāruṇāḥ /

kūṭāgārapramāṇaiś ca śarīrair yātanākṣamaiḥ || Vi_43.44 ||

evaṃ pātakinaḥ pāpam anubhūya suduḥkhitāḥ /

tiryagyonau prapadyante duḥkhāni vividhāni ca || Vi_43.45 ||