Chapter 2

Vi_2

om / brāhmaṇaḥ kṣatriyo vaiśyaḥ śūdraś ceti varṇāś catvāraḥ // Vi_2.1 //

teṣām ādyā dvijātayas trayaḥ // Vi_2.2 //

teṣāṃ niṣekādyaḥ śmaśānānto mantravat kriyāsamūhaḥ // Vi_2.3 //

teṣāṃ ca dharmāḥ // Vi_2.4 //

brāhmaṇasyādhyāpanam // Vi_2.5 //

kṣatriyasya śastranityatā // Vi_2.6 //

vaiśyasya paśupālanam // Vi_2.7 //

śūdrasya dvijātiśuśrūṣā // Vi_2.8 //

dvijānāṃ yajanādhyayane // Vi_2.9 //

athaiteṣāṃ vṛttayaḥ // Vi_2.10 //

brāhmaṇasya yājanapratigrahau // Vi_2.11 //

kṣatriyasya kṣititrāṇam // Vi_2.12 //

kṛṣigorakṣavāṇijyakusīdayonipoṣaṇāni vaiśyasya // Vi_2.13 //

śūdrasya sarvaśilpāni // Vi_2.14 //

āpady anantarā vṛttiḥ // Vi_2.15 //

kṣamā satyam damaḥ śaucaṃ dānam indriyasaṃyamaḥ /

ahiṃsā guruśuśrūṣā tīrthānusaraṇaṃ dayā || Vi_2.16 ||

ārjavaṃ lobhaśūnyatvaṃ devabrāhmaṇapūjanam /

anabhyasūyā ca tathā dharmaḥ sāmānya ucyate || Vi_2.17 ||