Chapter 1

Vi_1

brahmarātryāṃ vyatītāyāṃ prabuddhe padmasaṃbhave /

viṣṇuḥ sisṛkṣur bhūtāni jñātvā bhūmiṃ jalānugām || Vi_1.1 ||

jalakrīḍāruci śubhaṃ kalpādhiṣu yathā purā /

vārāham āsthito rūpam ujjahāra vasuṃdharām || Vi_1.2 ||

vedapādo yūpadaṃṣṭraḥ kratudantaś citīmukhaḥ /

agnijihvo darbharomā brahmaśīrṣo mahātapāḥ || Vi_1.3 ||

ahorātrekṣaṇo divyo vedāṅgaśrutibhūṣaṇaḥ /

ājyanāsaḥ sruvatuṇḍaḥ sāmaghoṣasvano mahān || Vi_1.4 ||

dharmasatyamayaḥ śrīmān kramavikramasatkṛtaḥ /

prāyaścittamahāghoṇaḥ paśujānur mahākṛtiḥ || Vi_1.5 ||

udgātrāntro homaliṅgo bījauṣadhimahāphalaḥ /

vedyantarātmā mantrasphig- vikṛtaḥ somaśoṇitaḥ || Vi_1.6 ||

vediskandho havir gandho havyakavyādivegavān /

prāgvaṃṣakāyo dyutimān nānādīkṣābhir anvitaḥ || Vi_1.7 ||

dakṣiṇāhṛdayo yoga mahāmantramayo mahān /

upākarmoṣṭharuciraḥ pravargyāvartabhūṣaṇaḥ || Vi_1.8 ||

nānācchandogatipatho guhyopaniṣadāsanaḥ /

chāyāpatnīsahāyo vai maṇiśṛṅga ivoditaḥ || Vi_1.9 ||

mahīṃ sāgaraparyantāṃ saśailavanakānanāṃ /

ekārṇavajalabhraṣṭām ekārṇavagataḥ prabhuḥ || Vi_1.10 ||

daṃṣṭrāgreṇa samuddhṛtya lokānāṃ hitakāmyayā /

ādidevo mahāyogī cakāra jagatīṃ punaḥ || Vi_1.11 ||

evaṃ yajñavarāheṇa bhūtvā bhūtahitārthinā /

uddhṛtā pṛthivī devī rasātalagatā purā || Vi_1.12 ||

uddhṛtya niścale sthāne sthāpayitvā tathā svake /

yathāsthānaṃ vibhajyāpas tadgatā madhusūdanaḥ || Vi_1.13 ||

sāmudryaś ca samudreṣu nādeyīś ca nadīṣu ca /

palvaleṣu ca pālvalyaḥ saraḥsu ca sarobhavāḥ || Vi_1.14 ||

pātālasaptakaṃ cakre lokānāṃ saptakaṃ tathā /

dvīpānām udadhīnāṃ ca sthānāni vividhāni ca || Vi_1.15 ||

sthānapālān lokapālān nadīḥ śailavanaspatīn /

ṛṣīṃś ca sapta dharmajñān vedān sānṅān surāsurān || Vi_1.16 ||

piśācoragagandharva yakṣarākṣasamānuṣān /

paśupakṣimṛgādyāṃś ca bhūtagrāmaṃ caturvidham /

meghendracāpaśampādyān yajñāṃś ca vividhāṃs tathā || Vi_1.17 ||

evaṃ varāho bhagavān kṛtvedaṃ sacarācaram /

jagaj jagāma lokānām avijñātāṃ tadā gatim || Vi_1.18 ||

avijñātāṃ gatiṃ yāte devadeve janārdane /

vasudhā cintayām āsa kā dhṛtir me bhaviṣyati || Vi_1.19 ||

pṛcchāmi kaśyapaṃ gatvā sa me vakṣyaty asaṃśayam /

madīyāṃ vahate cintāṃ nityam eva mahāmuniḥ || Vi_1.20 ||

evaṃ sā niścayaṃ kṛtvā devī strīrūpadhāriṇī /

jagāma kaśyapaṃ draṣṭuṃ dṛṣṭavāṃs tāṃ ca kaśyapaḥ || Vi_1.21 ||

nīlapaṅkajapatrākṣīṃ śāradendunibhānanām /

alisaṃghālakāṃ śubhrāṃ bandhujīvādharāṃ śubhām || Vi_1.22 ||

subhrūṃ susūkṣmadaśanāṃ cārunāsāṃ natabhruvam /

kambukaṇṭhīṃ saṃhatorūṃ pīnorujaghanasthalām || Vi_1.23 ||

virejatuḥ stanau yasyāḥ samau pīnau nirantarau /

śakrebhakumbhasaṃkāśau śātakumbhasamadyutī || Vi_1.24 ||

mṛṇālakomalau bāhū karau kisalayopamau /

rukmastambhanibhāv ūrū gūḍhe śliṣṭe ca jānunī || Vi_1.25 ||

jaṅghe virome susame pādāv atimanoramau /

jaghanaṃ ca ghanaṃ madhyaṃ yathā kesariṇaḥ śiśoḥ || Vi_1.26 ||

prabhāyutā nakhās tāmrā rūpaṃ sarvamanoharam /

kurvāṇāṃ vīkṣitair nityaṃ nīlotpalayutā diśaḥ || Vi_1.27 ||

kurvāṇāṃ prabhayā devīṃ tathā vitimirā diśaḥ /

susūkṣmaśuklavasanāṃ ratnottamavibhūṣitāṃ || Vi_1.28 ||

padanyāsair vasumatīṃ sapadmām iva kurvatīṃ /

rūpayauvanasaṃpannāṃ vinītavad upasthitām || Vi_1.29 ||

samīpam āgatāṃ dṛṣṭvā pūjayitvātha kaśyapaḥ /

uvāca tāṃ varārohe vijñātaṃ hṛdgataṃ mayā || Vi_1.30 ||

dhare tava viśālākṣi gaccha devi janārdanam /

sa te vakṣyaty aśeṣeṇa bhāvinī te yathā dhṛtiḥ || Vi_1.31 ||

kṣīrode vasatis tasya mayā jñātā śubhānane /

dhyānayogena cārvaṅgi tvadarthaṃ tatprasādataḥ || Vi_1.32 ||

ity evam uktā saṃpūjya kaśyapaṃ vasudhā tataḥ /

prayayau keśavaṃ draṣṭuṃ kṣīrodam atha sāgaram || Vi_1.33 ||

sā dadarśāmṛtanidhiṃ candraraśmimanoharam /

pavanakṣobhasaṃjāta- vīcīśatasamākulam || Vi_1.34 ||

himavacchatasaṃkāśaṃ bhūmaṇḍalam ivāparam /

vīcīhastaiḥ pracalitair āhvayānam iva kṣitim || Vi_1.35 ||

tair eva śuklatāṃ candre vidadhānam ivāniśam /

antarasthena hariṇā vigatāśeṣakalmaṣam || Vi_1.36 ||

yasmāt tasmād dhārayantaṃ suśuklāṃ tanum ūrjitām /

pāṇḍuraṃ khagamāgamyam adhobhuvanavartinam || Vi_1.37 ||

indranīlakaḍārāḍhyaṃ viparītam ivāmbaram /

phalāvalīsamudbhūta- vanasaṃgham ivācitam || Vi_1.38 ||

nirmokam iva śeṣāher vistīrṇāntam atīva hi /

taṃ dṛṣṭvā tatra madhyasthaṃ daḍṛśe keśavālayam || Vi_1.39 ||

anirdeśyaparīmāṇam anirdeśyarddhisaṃyutam /

śeṣaparyaṅkagaṃ tasmin dadarśa madhusūdanam || Vi_1.40 ||

śeṣāhiphaṇaratnāṃśu durvibhāvyamukhāmbujam /

śaśāṅkaśatasaṃkāśaṃ sūryāyutasamaprabham || Vi_1.41 ||

pītavāsasamakṣobhyaṃ sarvaratnavibhūṣitam [savaratna] /

mukuṭenārkavarṇena kuṇḍalābhyāṃ virājitam || Vi_1.42 ||

saṃvāhyamānāṅghriyugaṃ lakṣmyā karatalaiḥ śubhaiḥ /

śarīradhāribhiḥ śastraiḥ sevyamānaṃ samantataḥ || Vi_1.43 ||

taṃ dṛṣṭvā puṇḍarīkākṣaṃ vavande madhusūdanam /

jānubhyām avaniṃ gatvā vijñāpayati cāpy atha || Vi_1.44 ||

uddhṛtāhaṃ tvayā deva rasātalatalaṃ gatā /

svasthāne sthāpitā viṣṇo lokānāṃ hitakāmyayā || Vi_1.45 ||

tatrādhunā hi deveśa kā dhṛtir me bhaviṣyati /

evam uktas tayā devyā devo vacanam abravīt || Vi_1.46 ||

varṇāśramācāraratāḥ santaḥ śāstraikatatparāḥ /

tvāṃ dhare dhārayiṣyanti teṣāṃ tvadbhāra āhitaḥ || Vi_1.47 ||

evam uktā vasumatī devadevam abhāṣata /

varṇānām āśramāṇāṃ ca dharmān vada sanātana || Vi_1.48 ||

tvatto 'ham śrotum icchāmi tvaṃ hi me paramā gatiḥ /

namas te devadeveśa devāribalasūdana || Vi_1.49 ||

nārāyaṇa jagannātha śaṅkhacakragadādhara /

padmanābha hṛṣīkeśa mahābalaparākrama || Vi_1.50 ||

atīndriya suduṣpāra deva śārṅgadhanurdhara /

varāha bhīma govinda purāṇa puruṣottama || Vi_1.51 ||

hiraṇyakeśa viśvākṣa yajñamūrte nirañjana /

kṣetrakṣetrajñadeveśa salilārṇavaśāyaka || Vi_1.52 ||

mantra mantravahācintya vedavedāṅgavigraha /

jagato 'sya samagrasya sṛṣṭisaṃhārakāraka || Vi_1.53 ||

dharmādharmajña dharmāṅga dharmayone varaprada /

viṣvaksenāmṛta vyoma madhukaiṭabhasūdana || Vi_1.54 ||

bṛhatāṃ bṛṃhaṇājñeya sarva sarvābhayaprada /

vareṇyānagha jīmūta jagannirmāṇakāraka || Vi_1.55 ||

āpyāyana apāṃ sthāna caitanyādhāra niṣkriya /

saptaśīrṣādhvaraguro purāṇapuruṣottama || Vi_1.56 ||

dhruvākṣara susūkṣmeśa bhaktavatsala pāvana /

tvaṃ gatiḥ sarvadevānāṃ tvaṃ gatir brahmavādinām || Vi_1.57 ||

tathā viditavedyānāṃ gatis tvaṃ puruṣottama /

prapannāsmi jagannātha dhruvaṃ vācaspatiṃ prabhum || Vi_1.58 ||

subrahmaṇyam anādhṛṣyaṃ vasuṣeṇaṃ vasupradam /

mahāyogabalopetaṃ pṛśnigarbhaṃ dhṛtārciṣam || Vi_1.59 ||

vāsudevaṃ mahātmānaṃ puṇḍarīkākṣaṃ acyutam /

surāsuraguruṃ devaṃ vibhuṃ bhūtamaheśvaram || Vi_1.60 ||

ekavyūhaṃ caturbāhuṃ jagatkāraṇakāraṇam /

brūhi me bhagavan dharmāṃś cāturvarṇyasya śāśvatān || Vi_1.61 ||

āśramācārasaṃyuktān sarahasyān sasaṃgrahān /

evam uktas tu deveśaḥ kṣoṇyā kṣoṇīm abhāṣata || Vi_1.62 ||

śṛṇu devi dhare dharmāṃś cāturvarṇyasya śāśvatān /

āśramācārasaṃyuktān sarahasyān sasaṃgrahān || Vi_1.63 ||

ye tu tvāṃ dhārayiṣyanti santas teṣāṃ parāyaṇān /

niṣaṇṇā bhava vāmoru kāñcane 'smin varāsane || Vi_1.64 ||

sukhāsīnā nibodha tvaṃ dharmān nigadato mama /

śuśruve vaiṣṇavān dharmān sukhāsīnā dharā tadā || Vi_1.65 ||