Vainglory

transliterator: thothica

work_id: "d5fe9e58-3f94-4c5e-961f-267c5e2f09f4" work_slug: "unknown-old-english-elegies-d5fe9e" work_title: Old English Elegies author_name: Unknown chapter_number: 12 chapter_title: Vainglory chapter_slug: "12-vainglory" variant_id: "22dfbd4d-1e02-47d4-9c52-9bb51ebe1edf" content_type: transliteration layout: prose language: old_english source_language: old_english language_direction: ltr script: latin word_count: 474 estimated_read_time: 4

Hwaet, me frod wita on fyrndagum saegde, snottor ar, sundorwundra fela. Wordhord onwreah witgan larum beorn boca gleaw, bodan aercwide, thaet ic sothlice siththan meahte ongitan bi tham gealdre godes agen bearn, wilgest on wicum, ond thone wacran swa some, scyldum bescyredne, on gescead witan. thaet maeg aeghwylc mon eathe gethencan, se the hine ne laeteth on thas laenan tid amyrran his gemyndum modes gaelsan ond on his daegrime druncen to rice, thonne monige beoth maethelhegendra, wlonce wigsmitas winburgum in, sittath aet symble, sothgied wrecath, wordum wrixlath, witan fundiath hwylc aescstede inne in raecede mid werum wunige, thonne win hweteth beornes breostsefan. Breahtem stigeth, cirm on corthre, cwide scralletath missenlice. Swa beoth modsefan dalum gedaeleD, sindon dryhtguman ungelice. Sum on oferhygdo thrymme thringeth, thrinteth him in innan ungemedemad mod; sindan to monige thaet! Bith thaet aefthonca eal gefylled feondes fligepilum, facensearwum; breodath he ond baelceth, both his sylfes swithor micle thonne se sella mon, thenceth thaet his wise welhwam thince eal unforcuth. Bith thaes other swice, thonne he thaes facnes fintan sceawath. Wrenceth he ond blenceth, worn gethenceth hinderhoca, hygegar leteth, scurum sceoteth. He tha scylde ne wat faehthe gefremede, feoth his betran eorl fore aefstum, laeteth inwitflan brecan thone burgweal, the him bebead meotud thaet he thaet wigsteal wergan sceolde, siteth symbelwlonc, searwum laeteth wine gewaeged word ut faran, thraefte thringan thrymme gebyrmed, aefaestum onaeled, oferhygda ful, nithum nearowrencum. Nu thu cunnan meaht, gif thu thyslicne thegn gemittest wunian in wicum, wite the be thissum feawum forthspellum thaet thaet bith feondes bearn flaesce bifongen, hafath fraete lif, grundfusne gaest gode orfeormne, wuldorcyninge. thaet se witga song, gearowyrdig guma, ond thaet gyd awraec: "Se the hine sylfne in tha slithnan tid thurh oferhygda up ahlaeneth, ahefeth heahmodne, se sceal hean wesan aefter neosithum nither gebiged, wunian witum faest, wyrmum bethrungen. thaet waes geara iu in godes rice thaette mid englum oferhygd astag, widmaere gewin. Wroht ahofan, heardne heresith, heofon widledan, forsawan hyra sellan, tha hi to swice thohton ond thrymcyning theodenstoles ricne beryfan, swa hit ryht ne waes, ond thonne gesettan on hyra sylfra dom wuldres wynlond. thaet him wige forstod faeder frumsceafta; wearth him seo feohte to grim. thonne bith tham othrum ungelice se the her on eorthan eathmod leofath, ond with gesibbra gehwone simle healdeth freode on folce ond his feond lufath, theah the he him abylgnesse oft gefremede willum in thisse worulde. Se mot wuldres dream in haligra hyht heonan astigan on engla eard. Ne bith tham othrum swa, se the on ofermedum eargum daedum leofath in leahtrum, ne beoth tha lean gelic mid wuldorcyning." Wite the be thissum, gif thu eathmodne eorl gemete, thegn on theode, tham bith simle gaest gegaederad godes agen bearn wilsum in worlde, gif me se witega ne leag. Forthon we sculon a hycgende haelo raedes gemunan in mode maela gehwylcum thone selestan sigora waldend. Amen.