Chapter 59

[svāmipālavivādaḥ]

kṣetrārāmavivīteṣu gṛheṣu paśuvāṭiṣu /

grahaṇaṃ tatpraviṣṭānāṃ tāḍanaṃ vā bṛhaspatiḥ // K_664 //

adhamottamamadhyānāṃ paśūnāṃ caiva tāḍane /

svāmī tu vivaded yatra daṇḍaṃ tatra prakalpayet // K_665 //

ajāteṣv eva sasyeṣu kuryād āvaraṇaṃ mahat /

duḥkheneha nivāryante labdhasvādurasā mṛgāḥ // K_666 //

dāpayet paṇapādaṃ gāṃ dvau pādau mahiṣīṃ tathā /

tathājāvikavatsānāṃ pādo daṇḍaḥ prakīrtitaḥ // K_667 //