Warasta uss se hain ke mohabbat hi kyun na ho

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 197 chapter_title: Warasta uss se hain ke mohabbat hi kyun na ho chapter_slug: "197-warasta-uss-se-hain-ke-mohabbat-hi-kyun-na-ho" variant_id: "8d53e43a-cc3e-4922-88de-6966d3491594" content_type: transliteration layout: verse language: Urdu source_language: Urdu language_direction: ltr script: latin word_count: 155 estimated_read_time: 1

Warasta uss se hain ke mohabbat hi kyun na ho Keeje hamare saath adawat hi kyun na ho

Chhora na mujh mein zoaf ne rang-e-ikhtilat ka Hai dil pe baar naqsh-e-mohabbat hi kyun na ho

Hai mujh ko tujh se tazkira-e-ghair ka gila Har-chand bar-sabeel-e-shikayat hi kyun na ho

Paida hui hai kehte hain har dard ki dawa Yun ho toh chaara-e-gham-e-ulfat hi kyun na ho

Dala na be-kasi ne kisi se maamla Apne se kheenchta hoon khajalat hi kyun na ho

Hai aadmi bajaye khud ek mahshar-e-khayal Hum anjuman samajhte hain khilwat hi kyun na ho

Hangaama-e-zabooni-e-himmat hai infi'aal Haasil na keeje dehr se ibrat hi kyun na ho

Warastagi bahana-e-begaangi nahin Apne se kar na ghair se wehshat hi kyun na ho

Mitta hai faut-e-fursat-e-hasti ka gham koi Umr-e-aziz sarf-e-ibadat hi kyun na ho

Is fitna-khoo ke dar se ab uthte nahin Asad Iss mein hamare sar pe qayamat hi kyun na ho