Andreas

transliterator: thothica

work_id: "07b573f7-5f84-4cf9-a324-c732d09d2799" work_slug: "cynewulf-andreas-07b573" work_title: Andreas author_name: Cynewulf chapter_number: 1 chapter_title: Chapter 1 chapter_slug: 01 variant_id: "2cafdf1b-7438-47f0-8136-c684eae9ec67" content_type: transliteration layout: verse language: old_english source_language: old_english language_direction: ltr script: latin word_count: 9297 estimated_read_time: 79

Hwaet! We gefrunan on fyrndagum twelfe under tunglum tireadige haeleth, theodnes thegnas. No hira thrym alaeg campraedenne thonne cumbol hneotan, syththan hie gedaeldon, swa him dryhten sylf, heofona heahcyning, hlyt getaehte. thaet waeron maere men ofer eorthan, frome folctogan ond fyrdhwate, rofe rincas, thonne rond ond hand on herefelda helm ealgodon, on meotudwange. Waes hira Matheus sum, se mid Iudeum ongan godspell aerest wordum writan wundorcraefte. tham halig god hlyt geteode ut on thaet igland thaer aenig tha git elltheodigra ethles ne mihte blaedes brucan. Oft him bonena hand on herefelda hearde gesceode. Eal waes thaet mearcland morthre bewunden, feondes facne, folcstede gumena, haeletha ethel. Naes thaer hlafes wist werum on tham wonge, ne waeteres drync to bruconne, ah hie blod ond fel, fira flaescheoman, feorrancumenra, thegon geond tha theode. Swelc waes theaw hira thaet hie aeghwylcne elltheodigra dydan him to mose metethearfendum, thara the thaet ealand utan sohte. Swylc waes thaes folces freotholeas tacen, unlaedra eafoth, thaet hie eagena gesihth, hettend heorogrimme, heafodgimmas agetton gealgmode gara ordum. Syththan him geblendan bitere tosomne, dryas thurh dwolcraeft, drync unheorne, se onwende gewit, wera ingethanc, heortan on hrethre, (hyge waes oncyrred), thaet hie ne murndan aefter mandreame, haeleth heorograedige, ac hie hig ond gaers for meteleaste methe gedrehte. tha waes Matheus to thaere maeran byrig cumen in tha ceastre. thaer waes cirm micel geond Mermedonia, manfulra hloth, fordenera gedraeg, syththan deofles thegnas geascodon aethelinges sith. Eodon him tha togenes, garum gehyrsted, lungre under linde, (nalas late waeron), eorre aescberend, to tham orlege. Hie tham halgan thaer handa gebundon ond faestnodon feondes craefte, haeleth hellfuse, ond his heafdes segl abreoton mid billes ecge. Hwaethre he in breostum tha git herede in heortan heofonrices weard, theah the he atres drync atulne onfenge. Eadig ond onmod, he mid elne forth wyrthode wordum wuldres aldor, heofonrices weard, halgan stefne, of carcerne. Him waes Cristes lof on fyrhthlocan faeste bewunden. He tha wepende weregum tearum his sigedryhten sargan reorde grette, gumena brego, geomran stefne, weoruda wilgeofan, ond thus wordum cwaeth: "Hu me eltheodige inwitwrasne searonet seowath! A ic symles waes on wega gehwam willan thines georn on mode; nu thurh geohtha sceal daede fremman swa tha dumban neat. thu ana canst ealra gehygdo, meotud mancynnes, mod in hrethre. Gif thin willa sie, wuldres aldor, thaet me waerlogan waepna ecgum, sweordum, aswebban, ic beo sona gearu to adreoganne thaet thu, drihten min, engla eadgifa, ethelleasum, dugetha daedfruma, deman wille. Forgif me to are, aelmihtig god, leoht on thissum life, thy laes ic lungre scyle, ablended in burgum, aefter billhete thurh hearmcwide heorugraedigra, lathra leodsceathena, leng throwian edwitspræce. Ic to anum the, middangeardes weard, mod statholige, faeste fyrhthlufan, ond the, faeder engla, beorht blaedgifa, biddan wille thaet thu me ne gescyrige mid scyldhetum, werigum wrohtsmihtum, on thone wyrrestan, dugotha demend, death ofer eorthan." aefter thyssum wordum com wuldres tacen halig of heofenum, swylce hadre segl to tham carcerne. thaer gecythed wearth thaet halig god helpe gefremede, tha wearth gehyred heofoncyninges stefn wraetlic under wolcnum, wordhleothres sweg maeres theodnes. He his maguthegne under hearmlocan haelo ond frofre beadurofum abead beorhtan stefne: "Ic the, Matheus, mine sylle sybbe under swegle. Ne beo thu on sefan to forht, ne on mode ne murn. Ic the mid wunige ond the alyse of thyssum leothubendum, ond ealle tha menigo the the mid wuniath on nearonedum. the is neorxnawang, blaeda beorhtost, boldwela faegrost, hama hyhtlicost, halegum mihtum torht ontyned. thaer thu tyres most, to widan feore willan brucan. Gethola theoda threa! Nis seo thrah micel thaet the waerlogan witebendum, synnige thurh searocraeft, swencan motan. Ic the Andreas aedre onsende to hleo ond to hrothre in thas haethenan burg. He the alyseth of thyssum leodhete. Is to thaere tide taelmet hwile emne mid sothe seofon ond twentig nihtgerimes, thaet thu of nede most, sorgum geswenced, sigore gewyrthod, hweorfan of henthum in gehyld godes." Gewat him tha se halga helm aelwihta, engla scyppend, to tham uplican ethelrice. He is on riht cyning, statholfaest styrend, in stowa gehwam. tha waes Matheus miclum onbryrded niwan stefne. Nihthelm toglad, lungre leorde. Leoht aefter com, daegredwoma. Duguth samnade, haethne hildfrecan, heapum thrungon, (guthsearo gullon, garas hrysedon), bolgenmode, under bordhreothan. Woldon cunnian hwaether cwice lifdon tha the on carcerne clommum faeste hleoleasan wic hwile wunedon, hwylcne hie to aete aerest mihton aefter fyrstmearce feores beraedan. Haefdon hie on rune ond on rimcraefte awriten, waelgraedige, wera endestaef, hwaenne hie to mose metethearfendum on thaere wertheode weorthan sceoldon. Cirmdon caldheorte, (corthor othrum getang), rethe raesboran. Rihtes ne gimdon, meotudes mildse. Oft hira mod onwod under dimscuan deofles larum, thonne hie unlaedra eaefethum gelyfdon. Hie tha gemetton modes glawne, haligne haele, under heolstorlocan bidan beadurofne thaes him beorht cyning, engla ordfruma, unnan wolde. tha waes first agan frumraedenne thinggemearces butan thrim nihtum, swa hit waelwulfas awriten haefdon thaet hie banhringas abrecan thohton, lungre tolysan lic ond sawle, ond thonne todaelan duguthe ond geogothe, werum to wiste ond to wilthege, faeges flaescheoman. Feorh ne bemurndan, graedige guthrincas, hu thaes gastes sith aefter swyltcwale geseted wurde. Swa hie symble ymb thritig thing gehedon nihtgerimes; waes him neod micel thaet hie tobrugdon blodigum ceaflum fira flaescheoman him to foddorthege. tha waes gemyndig, se the middangeard gestathelode strangum mihtum, hu he in elltheodigum yrmthum wunode, belocen leothubendum, the oft his lufan adreg for Ebreum ond Israhelum; swylce he Iudea galdorcraeftum withstod stranglice. tha sio stefn gewearth gehered of heofenum, thaer se halga wer in Achaia, Andreas, waes, (leode laerde on lifes weg), tha him cirebaldum cininga wuldor, meotud mancynnes, modhord onleac, weoruda drihten, ond thus wordum cwaeth: "thu scealt feran ond frith laedan, sithe gesecan, thaer sylfaetan eard weardigath, ethel healdath morthorcraeftum. Swa is thaere menigo theaw thaet hie uncuthra aengum ne willath on tham folcstede feores geunnan syththan manfulle on Mermedonia onfindath feasceaftne. thaer sceall feorhgedal, earmlic ylda cwealm, aefter wyrthan. thaer ic seomian wat thinne sigebrothor mid tham burgwarum bendum faestne. Nu bith fore threo niht thaet he on thaere theode sceal fore haethenra handgewinne thurh gares gripe gast onsendan, ellorfusne, butan thu aer cyme." aedre him Andreas agef andsware: "Hu maeg ic, dryhten min, ofer deop gelad fore gefremman on feorne weg swa hraedlice, heofona scyppend, wuldres waldend, swa thu worde becwist? thaet maeg engel thin eath geferan, halig of heofenum con him holma begang, sealte saestreamas ond swanrade, warothfarutha gewinn ond waeterbrogan, wegas ofer widland. Ne synt me winas cuthe, eorlas eltheodige, ne thaer aeniges wat haeletha gehygdo, ne me herestraeta ofer cald waeter cuthe sindon." Him tha ondswarude ece dryhten: "Eala, Andreas, thaet thu a woldest thaes sithfaetes saene weorthan! Nis thaet uneathe eallwealdan gode to gefremmanne on foldwege, thaet sio ceaster hider on thas cneorisse under swegles gang aseted wyrthe, breogostol breme, mid tham burgwarum, gif hit worde becwith wuldres agend. Ne meaht thu thaes sithfaetes saene weorthan, ne on gewitte to wac, gif thu wel thencest with thinne waldend waere gehealdan, treowe tacen. Beo thu on tid gearu; ne maeg thaes aerendes ylding wyrthan. thu scealt tha fore geferan ond thin feorh beran in gramra gripe, thaer the guthgewinn thurh haethenra hildewoman, beorna beaducraeft, geboden wyrtheth. Scealtu aeninga mid aerdaege, emne to morgene, aet meres ende ceol gestigan ond on cald waeter brecan ofer baethweg. Hafa bletsunge ofer middangeard mine, thaer thu fere!" Gewat him tha se halga healdend ond wealdend, upengla fruma, ethel secan, middangeardes weard, thone maeran ham, thaer sothfaestra sawla moton aefter lices hryre lifes brucan. tha waes aerende ethelum cempan aboden in burgum, ne waes him bleath hyge, ah he waes anraed ellenweorces, heard ond higerof, nalas hildlata, gearo, guthe fram, to godes campe. Gewat him tha on uhtan mid aerdaege ofer sandhleothu to saes faruthe, thriste on gethance, ond his thegnas mid, gangan on greote. Garsecg hlynede, beoton brimstreamas. Se beorn waes on hyhte, syththan he on waruthe widfaethme scip modig gemette. tha com morgentorht beacna beorhtost ofer breomo sneowan, halig of heolstre. Heofoncandel blac ofer lagoflodas. He thaer lidweardas, thrymlice thry thegnas gemette, modiglice menn, on merebate sittan sithfrome, swylce hie ofer sae comon. thaet waes drihten sylf, dugetha wealdend, ece aelmihtig, mid his englum twam. Waeron hie on gescirplan scipferendum, eorlas onlice ealithendum, thonne hie on flodes faethm ofer feorne weg on cald waeter ceolum lacath. Hie tha gegrette, se the on greote stod, fus on farothe, faegn reordade: "Hwanon comon ge ceolum lithan, macraeftige menn, on merethissan, ane aegflotan? Hwanon eagorstream ofer ytha gewealc eowic brohte?" Him tha ondswarode aelmihti god, swa thaet ne wiste, se the thaes wordes bad, hwaet se manna waes methelhegendra, the he thaer on warothe withthingode: "We of Marmedonia maegthe syndon feorran geferede. Us mid flode baer on hranrade heahstefn naca, snellic saemearh, snude bewunden, oththaet we thissa leoda land gesohton, waere bewrecene, swa us wind fordraf." Him tha Andreas eathmod oncwaeth: "Wolde ic the biddan, theh ic the beaga lyt, sincweorthunga, syllan meahte, thaet thu us gebrohte brante ceole, hea hornscipe, ofer hwaeles ethel on thaere maegthe. Bith the meorth with god, thaet thu us on lade lithe weorthe." Eft him ondswarode aethelinga helm of ythlide, engla scippend: "Ne magon thaer gewunian widferende, ne thaer eltheodige eardes brucath, ah in thaere ceastre cwealm throwiath, tha the feorran thyder feorh gelaedath, ond thu wilnast nu ofer widne mere thaet thu on tha faegthe thine feore spilde." Him tha Andreas agef ondsware: "Usic lust hweteth on tha leodmearce, mycel modes hiht, to thaere maeran byrig, theoden leofesta, gif thu us thine wilt on merefarothe miltse gecythan." Him ondswarode engla theoden, neregend fira, of nacan stefne: "We the estlice mid us willath ferigan freolice ofer fisces baeth efne to tham lande thaer the lust myneth to gesecanne, syththan ge eowre gafulraedenne agifen habbath, sceattas gescrifene, swa eow scipweardas, aras ofer ythbord, unnan willath." Him tha ofstlice Andreas with, winethearfende, wordum maelde: "Naebbe ic faeted gold ne feohgestreon, welan ne wiste ne wira gespann, landes ne locenra beaga, thaet ic the maege lust ahwettan, willan in worulde, swa thu worde becwist." Him tha beorna breogo, thaer he on bolcan saet, ofer warotha geweorp withthingode: "Hu gewearth the thaes, wine leofesta, thaet thu saebeorgas secan woldes, merestreama gemet, mathmum bedaeled, ofer cald cleofu ceoles neosan? Nafast the to frofre on farothstraete hlafes wiste ne hlutterne drync to dugothe. Is se drohtath strang tham the lagolade lange cunnath." tha him Andreas thurh ondsware, wis on gewitte, wordhord onleac: "Ne gedafenath the, nu the dryhten geaf welan ond wiste ond woruldspede, thaet thu ondsware mid oferhygdum, sece sarcwide. Selre bith aeghwam thaet he eathmedum ellorfusne oncnawe cuthlice, swa thaet Crist bebead, theoden thrymfaest. We his thegnas synd gecoren to cempum. He is cyning on riht, wealdend ond wyrhta wuldorthrymmes, an ece god eallra gesceafta, swa he ealle befehth anes craefte, hefon ond eorthan, halgum mihtum, sigora selost. He thaet sylfa cwaeth, faeder folca gehwaes, ond us feran het geond ginne grund gasta streonan: 'Farath nu geond ealle eorthan sceatas emne swa wide swa waeter bebugeth, oththe stedewangas straete gelicgath. Bodiath aefter burgum beorhtne geleafan ofer foldan faethm. Ic eow freotho healde. Ne thurfan ge on tha fore fraetwe laedan, gold ne seolfor. Ic eow goda gehwaes on eowerne agenne dom est ahwette.' Nu thu seolfa miht sith userne gehyran hygethancol. Ic sceal hrathe cunnan hwaet thu us to duguthum gedon wille." Him tha ondswarode ece dryhten: "Gif ge syndon thegnas thaes the thrym ahof ofer middangeard, swa ge me secgath, ond ge geheoldon thaet eow se halga bead, thonne ic eow mid gefean ferian wille ofer brimstreamas, swa ge benan sint." tha in ceol stigon collenfyrhthe, ellenrofe, aeghwylcum wearth on merefarothe mod geblissod. tha ofer ytha geswing Andreas ongann merelithendum miltsa biddan wuldres aldor, ond thus wordum cwaeth: "Forgife the dryhten domweorthunga, willan in worulde ond in wuldre blaed, meotud manncynnes, swa thu me hafast on thyssum sithfaete sybbe gecythed!" Gesaet him tha se halga helmwearde neah, aethele be aethelum. aefre ic ne hyrde thon cymlicor ceol gehladenne heahgestreonum. Haeleth in saeton, theodnas thrymfulle, thegnas wlitige. tha reordode rice theoden, ece aelmihtig, heht his engel gan, maerne maguthegn, ond mete syllan, frefran feasceafte ofer flodes wylm, thaet hie the eath mihton ofer ytha gethring drohtath adreogan. tha gedrefed wearth, onhrered hwaelmere. Hornfisc plegode, glad geond garsecg, ond se graega maew waelgifre wand. Wedercandel swearc, windas weoxon, waegas grundon, streamas styredon, strengas gurron, waedo gewaette. Waeteregsa stod threata thrythum. thegnas wurdon acolmode. aenig ne wende thaet he lifgende land begete, thara the mid Andreas on eagorstream ceol gesohte. Naes him cuth tha gyt hwa tham saeflotan sund wisode. Him tha se halga on holmwege ofer argeblond, Andreas tha git, thegn theodenhold, thanc gesaegde, ricum raesboran, tha he gereordod waes: "the thissa swaesenda sothfaest meotud, lifes leohtfruma, lean forgilde, weoruda waldend, ond the wist gife, heofonlicne hlaf, swa thu hyldo with me ofer firigendstream freode gecythdest! Nu synt gethreade thegnas mine, geonge guthrincas. Garsecg hlymmeth, geofon geotende. Grund is onhrered, deope gedrefed, duguth is geswenced, modigra maegen myclum gebysgod." Him of helman oncwaeth haeletha scyppend: "Laet nu geferian flotan userne, lid to lande ofer lagufaesten, ond thonne gebidan beornas thine, aras on earde, hwaenne thu eft cyme." Edre him tha eorlas agefan ondsware, thegnas throhthearde, thafigan ne woldon thaet hie forleton aet lides stefnan leofne lareow ond him land curon: "Hwider hweorfath we hlafordlease, geomormode, gode orfeorme, synnum wunde, gif we swicath the? We bioth lathe on landa gehwam, folcum fracothe, thonne fira bearn, ellenrofe, aeht besittath, hwylc hira selost symle gelaeste hlaforde aet hilde, thonne hand ond rond on beaduwange billum forgrunden aet nithplegan nearu throwedon." tha reordade rice theoden, waerfaest cining, word stunde ahof: "Gif thu thegn sie thrymsittendes, wuldorcyninges, swa thu worde becwist, rece tha gerynu, hu he reordberend laerde under lyfte. Lang is thes sithfaet ofer fealuwne flod; frefra thine maecgas on mode. Mycel is nu gena lad ofer lagustream, land swithe feorr to gesecanne. Sund is geblonden, grund with greote. God eathe maeg heatholithendum helpe gefremman." Ongan tha gleawlice gingran sine, wuldorspedige weras wordum trymman: "Ge thaet gehogodon, tha ge on holm stigon, thaet ge on fara folc feorh gelaeddon, ond for dryhtnes lufan death throwodon, on aelmyrcna ethelrice sawle gesealdon. Ic thaet sylfa wat, thaet us gescyldeth scyppend engla, weoruda dryhten. Waeteregsa sceal, gethyd ond gethreatod thurh thrythcining, lagu lacende, lithra wyrthan. Swa gesaelde iu, thaet we on saebate ofer waruthgewinn waeda cunnedan, farothridende. Frecne thuhton egle ealada. Eagorstreamas beoton bordstaethu, brim oft oncwaeth, yth otherre. Hwilum upp astod of brimes bosme on bates faethm egesa ofer ythlid. aelmihtig thaer, meotud mancynnes, on merethyssan beorht basnode. Beornas wurdon forhte on mode, frithes wilnedon, miltsa to maerum. tha seo menigo ongan clypian on ceole, cyning sona aras, engla eadgifa, ythum stilde, waeteres waelmum. Windas threade, sae sessade, smylte wurdon merestreama gemeotu. tha ure mod ahloh syththan we gesegon under swegles gang windas ond waegas ond waeterbrogan forhte gewordne for frean egesan. Forthan ic eow to sothe secgan wille, thaet naefre forlaeteth lifgende god eorl on eorthan, gif his ellen deah." Swa hleothrode halig cempa, theawum gethancul. thegnas laerde eadig oreta, eorlas trymede, oththaet hie semninga slaep ofereode, methe be maeste. Mere sweotherade, ytha ongin eft oncyrde, hreoh holmthracu. tha tham halgan wearth aefter gryrehwile gast geblissod. Ongan tha reordigan raedum snottor, wis on gewitte, wordlocan onspeonn: "Naefre ic saelidan selran mette, macraeftigran, thaes the me thynceth, rowend rofran, raedsnotterran, wordes wisran. Ic wille the, eorl unforcuth, anre nu gena bene biddan, theah ic the beaga lyt, sincweorthunga, syllan mihte, faetedsinces. Wolde ic freondscipe, theoden thrymfaest, thinne, gif ic mehte, begitan godne. thaes thu gife hleotest, haligne hyht on heofonthrymme, gif thu lidwerigum larna thinra este wyrthest. Wolde ic anes to the, cynerof haeleth, craeftes neosan, thaet thu me getaehte, nu the tir cyning ond miht forgeaf, manna scyppend, hu thu waegflotan waere bestemdon, saehengeste, sund wisige. Ic waes on gifethe iu ond nu tha syxtyne sithum on saebate, mere hrerendum mundum freorig, eagorstreamas, (is thys ane ma), swa ic aefre ne geseah aenigne mann, thrythbearn haeletha, the gelicne, steoran ofer staefnan. Streamwelm hwileth, beateth brimstaetho. Is thes bat ful scrid, faereth famigheals, fugole gelicost glideth on geofone. Ic georne wat thaet ic aefre ne geseah ofer ythlade on saeleodan syllicran craeft. Is thon geliccost swa he on landsceare stille stande, thaer hine storm ne maeg, wind awecgan, ne waeterflodas brecan brondstaefne, hwaethere on brim snoweth snel under segle. thu eart seolfa geong, wigendra hleo, nalas wintrum frod, hafast the on fyrhthe, farothlacende, eorles ondsware. aeghwylces canst worda for worulde wislic andgit." Him ondswarode ece dryhten: "Oft thaet gesaeleth, thaet we on saelade, scipum under scealcum, thonne sceor cymeth, brecath ofer baethweg, brimhengestum. Hwilum us on ythum earfothlice gesaeleth on saewe, theh we sith nesan, frecne geferan. Flodwylm ne maeg manna aenigne ofer meotudes est lungre gelettan: ah him lifes geweald, se the brimu bindeth, brune ytha thyth ond threatath. He theodum sceal racian mid rihte, se the rodor ahof ond gefaestnode folmum sinum, worhte ond wrethedhe, wuldras fylde beorhtne boldwelan, swa gebledsod wearth engla ethel thurh his anes miht. Forthan is gesyne, soth orgete, cuth oncnawen, thaet thu cyninges eart thegen gethungen, thrymsittendes, forthan the sona saeholm oncneow, garsecges begang, thaet thu gife haefdes haliges gastes. Haern eft onwand, arytha geblond. Egesa gestilde, widfaethme waeg. Waedu swaethorodon seoththan hie ongeton thaet the god haefde waere bewunden, se the wuldres blaed gestathelade strangum mihtum." tha hleothrade halgan stefne cempa collenferhth, cyning wyrthude, wuldres waldend, ond thus wordum cwaeth: "Wes thu gebledsod, brego mancynnes, dryhten haelend! A thin dom lyfath! Ge neh ge feor is thin nama halig, wuldre gewlitegad ofer wertheoda, miltsum gemaersod. Naenig manna is under heofonhwealfe, haeletha cynnes, thaette areccan maeg oththe rim wite hu thrymlice, theoda baldor, gasta geocend, thine gife daelest. Huru is gesyne, sawla nergend, thaet thu thissum hysse hold gewurde ond hine geongne geofum wyrthodest, wis on gewitte ond wordcwidum. Ic aet efenealdum aefre ne mette on modsefan maran snyttro." Him tha of ceole oncwaeth cyninga wuldor, fraegn fromlice fruma ond ende: "Saga, thances gleaw thegn, gif thu cunne, hu thaet gewurde be werum tweonum, thaet tha arleasan inwidthancum, Iudea cynn with godes bearne ahof hearmcwide. Haeleth unsaelige no thaer gelyfdon in hira liffruman, grome gealgmode, thaet he god waere, theah the he wundra feala weorodum gecythde, sweotulra ond gesynra. Synnige ne mihton oncnawan thaet cynebearn, se the acenned wearth to hleo ond to hrothre haeletha cynne, eallum eorthwarum. aethelinge weox word ond wisdom, ah he thara wundra a, domagende, dael naenigne fraetre theode beforan cythde." Him tha Andreas agef andsware: "Hu mihte thaet gewyrthan in wertheode, thaet thu ne gehyrde haelendes miht, gumena leofost, hu he his gif cythde geond woruld wide, wealdendes bearn? Sealde he dumbum gesprec, deafe gehyrdon, healtum ond hreofum hyge blissode, tha the limseoce lange waeron, werige, wanhale, witum gebundene, aefter burhstedum blinde gesegon. Swa he on grundwaege gumena cynnes manige missenlice men of deathe worde awehte. Swylce he eac wundra feala cynerof cythde thurh his craeftes miht. He gehalgode for heremaegene win of waetere ond wendan het, beornum to blisse, on tha beteran gecynd. Swylce he afedde of fixum twam ond of fif hlafum fira cynnes fif thusendo. Fethan saeton, reonigmode, reste gefegon, werige aefter wathe, wiste thegon, menn on moldan, swa him gemedost waes. Nu thu miht gehyran, hyse leofesta, hu us wuldres weard wordum ond daedum lufode in life, ond thurh lare speon to tham faegeran gefean, thaer freo moton, eadige mid englum, eard weardigan, tha the aefter deathe dryhten secath." tha gen weges weard wordhord onleac, beorn ofer bolcan, beald reordade: "Miht thu me gesecgan, thaet ic soth wite, hwaether wealdend thin wundor on eorthan, tha he gefremede nalas feam sithum, folcum to frofre beforan cythde, thaer bisceopas ond boceras ond ealdormenn aeht besaeton, maethelhaegende? Me thaet thinceth, thaet hie for aefstum inwit syredon thurh deopne gedwolan. Deofles larum haeleth hynfuse hyrdon to georne, wrathum waerlogan. Hie seo wyrd beswac, forleolc ond forlaerde. Nu hie lungre sceolon, werige mid werigum, wraece throwian, biterne bryne on banan faethme." Him tha Andreas agef ondsware: "Secge ic the to sothe thaet he swithe oft beforan fremede folces raeswum wundor aefter wundre on wera gesiehthe, swylce deogollice dryhten gumena folcraed fremede, swa he to frithe hogode." Him ondswarode aethelinga helm: "Miht thu, wis haeleth, wordum gesecgan, maga mode rof, maegen tha he cythde, deormod on digle, tha mid dryhten oft, rodera raedend, rune besaeton?" Him tha Andreas ondsware agef: "Hwaet frinest thu me, frea leofesta, wordum wraetlicum, ond the wyrda gehwaere thurh snyttra craeft soth oncnawest?" tha git him waeges weard withthingode: "Ne frine ic the for taele ne thurh teoncwide on hranrade, ac min hige blissath, wynnum wridath, thurh thine wordlaethe, aethelum ecne. Ne eom ic ana thaet, ac manna gehwam mod bith on hyhte, fyrhth afrefred, tham the feor oththe neah on mode geman hu se maga fremede, godbearn on grundum. Gastas hweorfon, sohton sithfrome swegles dreamas, engla ethel thurh tha aethelan miht." Edre him Andreas agef ondsware: "Nu ic on the sylfum soth oncnawe, wisdomes gewit, wundorcraefte sigesped geseald, (snyttrum bloweth, beorhtre blisse, breost innanweard), nu ic the sylfum secgan wille oor ond ende, swa ic thaes aethelinges word ond wisdom on wera gemote thurh his sylfes muth symle gehyrde. Oft gesamnodon side herigeas, folc unmaete, to frean dome, thaer hie hyrcnodon haliges lare. thonne eft gewat aethelinga helm, beorht blaedgifa, in bold other, thaer him togenes, god herigende, to tham methelstede manige comon, snottre seleraedend. Symble gefegon, beornas blitheorte, burhweardes cyme. Swa gesaelde iu thaet se sigedema ferde, frea mihtig. Naes thaer folces ma on sithfate, sinra leoda, nemne ellefne orettmaecgas, geteled tireadige. He waes twelfta sylf. tha we becomon to tham cynestole, thaer getimbred waes tempel dryhtnes, heah ond horngeap, haelethum gefrege, wuldre gewlitegod. Huscworde ongan thurh inwithanc ealdorsacerd herme hyspan, hordlocan onspeon, wroht webbade. He on gewitte oncneow thaet we sothfaestes swathe folgodon, laeston larcwide. He lungre ahof wothe witherhydig wean onblonden: 'Hwaet, ge syndon earme ofer ealle menn! Wadath widlastas, weorn geferath earfothsitha, elltheodiges nu butan leodrihte larum hyrath, eadiges orhlytte aetheling cythath, secgath sothlice thaet mid suna meotudes drohtigen daeghwaemlice. thaet is duguthum cuth hwanon tham ordfruman aethelu onwocon. He waes afeded on thysse folksceare, cildgeong acenned mid his cneomagum. thus syndon haten hamsittende, faeder ond modur, thaes we gefraegen habbath thurh modgemynd, Maria ond Ioseph. Syndon him on aethelum othere twegen beornas geborene, brothorsybbum, suna Iosephes, Simon ond Iacob.' Swa hleothrodon haeletha raeswan, duguth domgeorne, dyrnan thohton meotudes mihte. Man eft gehwearf, yfel endeleas, thaer hit aer aras. tha se theoden gewat thegna heape fram tham methelstede mihtum geswithed, dugetha dryhten, secan digol land. He thurh wundra feala on tham westenne craefta gecythde thaet he waes cyning on riht ofer middangeard, maegene geswithed, waldend ond wyrhta wuldorthrymmes, an ece god eallra gesceafta. Swylce he otherra unrim cythde wundorworca on wera gesyhthe. Syththan eft gewat othre sithe getrume mycle, thaet he in temple gestod, wuldres aldor. Wordhleothor astag geond heahraeced. Haliges lare synnige ne swulgon, theah he sothra swa feala tacna gecythde, thaer hie to segon. Swylce he wraetlice wundor agraefene, anlicnesse engla sinra geseh, sigora frea, on seles wage, on twa healfe torhte gefraetwed, wlitige geworhte. He worde cwaeth: 'this is anlicnes engelcynna thaes bremestan the mid tham burgwarum in thaere ceastre is. Cheruphim et Seraphim tha on swegeldreamum syndon nemned. Fore onsyne ecan dryhtnes standath stithferthe, stefnum herigath, halgum hleothrum, heofoncyninges thrym, meotudes mundbyrd. Her amearcod is haligra hiw, thurh handmaegen awriten on wealle wuldres thegnas.' tha gen worde cwaeth weoruda dryhten, heofonhalig gast, fore tham heremaegene: 'Nu ic bebeode beacen aetywan, wundor geweorthan on wera gemange, thaet theos onlicnes eorthan sece, wlitig of wage, ond word sprece, secge sothcwidum, (thy sceolon gelyfan eorlas on cyththe), hwaet min aethelu sien.' Ne dorste tha forhylman haelendes bebod wundor fore weorodum, ac of wealle ahleop, frod fyrngeweorc, thaet he on foldan stod, stan fram stane. Stefn aefter cwom, hlud thurh heardne, hleothor dynede, wordum wemde. Wraetlic thuhte stithhycgendum stanes ongin. Septe sacerdas sweotolum tacnum, witig werede ond worde cwaeth: 'Ge synd unlaede, earmra gethohta searowum beswicene, oththe sel nyton, mode gemyrde. Ge mon cigath godes ece bearn, thone the grund ond sund, heofon ond eorthan ond hreo waegas, salte saestreamas ond swegl uppe amearcode mundum sinum. this is se ilca ealwalda god thone on fyrndagum faederas cuthon. He Abrahame ond Isace ond Iocobe gife bryttode, welum weorthode, wordum saegde aerest Habrahame aetheles gethingu, thaet of his cynne cenned sceolde weorthan wuldres god. Is seo wyrd mid eow open, orgete, magan eagum nu geseon sigores god, swegles agend.' aefter thyssum wordum weorud hlosnode geond thaet side sel, (swigodon ealle), tha tha yldestan eft ongunnon secgan synfulle, (soth ne oncneowan), thaet hit drycraeftum gedon waere, scingelacum, thaet se scyna stan maelde for mannum. Man wridode geond beorna breost, brandhata nith weoll on gewitte, weorm blaedum fag, attor aelfaele. thaer orcnawe wearth thurh teoncwide tweogende mod, maecga misgehygd morthre bewunden. tha se theoden bebead thrythweorc faran, stan on straete of stedewange, ond forth gan foldweg tredan, grene grundas, godes aerendu larum laedan on tha leodmearce to Channaneum, cyninges worde beodan Habrahame mid his eaforum twaem of eorthscraefe aerest fremman, laetan landreste, leotho gadrigean, gaste onfon ond geogothhade, edniwinga andweard cuman, frode fyrnweotan, folce gecythan, hwylcne hie god mihtum ongiten haefdon. Gewat he tha feran, swa him frea mihtig, scyppend wera, gescrifen haefde, ofer mearcpathu, thaet he on Mambre becom beorhte blican, swa him bebead meotud, thaer tha lichoman lange thrage, heahfaedera hra, beheled waeron. Het tha ofstlice up astandan Habraham ond Isaac, aetheling thridan Iacob of greote to godes gethinge, sneome of slaepe thaem faestan. Het hie to tham sithe gyrwan, faran to frean dome. Sceoldon hie tham folce gecythan hwa aet frumsceafte furthum teode eorthan eallgrene ond upheofon, hwaer se wealdend waere the thaet weorc statholade. Ne dorston tha gelettan leng owihte wuldorcyninges word. Geweotan tha tha witigan thry modige mearcland tredan. Forlaetan moldern wunigean open eorthscreafu, woldon hie aedre gecythan frumweorca faeder. tha thaet folc gewearth egesan geaclod, thaer tha aethelingas wordum weorthodon wuldres aldor. Hie tha ricene het rices hyrde to eadwelan othre sithe secan mid sybbe swegles dreamas, ond thaes to widan feore willum neotan. Nu thu miht gehyran, hyse leofesta, hu he wundra worn wordum cythde, swa theah ne gelyfdon larum sinum modblinde menn. Ic wat manig nu gyt mycel maere spell the se maga fremede, rodera raedend, tha thu araefnan ne miht, hrethre behabban, hygethances gleaw." thus Andreas ondlangne daeg herede hleothorcwidum haliges lare, oththaet hine semninga slaep ofereode on hronrade heofoncyninge neh. tha gelaedan het lifes brytta ofer ytha gethraec englas sine, faethmum ferigean on faeder waere leofne mid lissum ofer lagufaesten, oththaet saewerige slaep ofereode. thurh lyftgelac on land becwom to thaere ceastre the him cining engla tha tha aras sithigean, eadige on upweg, ethles neosan. Leton thone halgan be herestraete swefan on sybbe under swegles hleo, blithne bidan burhwealle neh, his nithhetum, nihtlangne fyrst, oththaet dryhten forlet daegcandelle scire scinan. Sceadu swetherodon, wonn under wolcnum. tha com wederes blaest, hador heofonleoma, ofer hofu blican. Onwoc tha wiges heard, (wang sceawode), fore burggeatum. Beorgas steape, hleothu hlifodon, ymbe harne stan tigelfagan trafu, torras stodon, windige weallas. tha se wisa oncneow thaet he Marmedonia maegthe haefde sithe gesohte, swa him sylf bebead, tha he him fore gescraf, faeder mancynnes. Geseh he tha on greote gingran sine, beornas beadurofe, biryhte him swefan on slaepe. He sona ongann wigend weccean, ond worde cwaeth: "Ic eow secgan maeg soth orgete, thaet us gystrandaege on geofones stream ofer arwelan aetheling ferede. In tham ceole waes cyninga wuldor, waldend wertheode. Ic his word oncneow, theh he his maegwlite bemidhen haefde." Him tha aethelingas ondsweorodon, geonge gencwidum, gastgerynum: "We the, Andreas, eathe gecythath sith userne, thaet thu sylfa miht ongitan gleawlice gastgehygdum. Us saewerige slaep ofereode. tha comon earnas ofer ytha wylm faran on flyhte, fetherum hremige, us ofslaependum sawle abrugdon, mid gefean feredon flyhte on lyfte, brehtmum blithe, beorhte ond lithe. Lissum lufodon ond in lofe wunedon, thaer waes singal sang ond swegles gong, wlitig weoroda heap ond wuldres threat. Utan ymbe aethelne englas stodon, thegnas ymb theoden, thusendmaelum, heredon on hehtho halgan stefne dryhtna dryhten. Dream waes on hyhte. We thaer heahfaederas halige oncneowon ond martyra maegen unlytel, sungon sigedryhtne sothfaestlic lof, duguth domgeorne. thaer waes Dauid mid, eadig oretta, Essages sunu, for Crist cumen, cining Israhela. Swylce we gesegon for suna meotudes, aethelum ecne, eowic standan, twelfe getealde, tireadige haeleth. Eow thegnodon thrymsittende, halige heahenglas. tham bith haeletha well the thara blissa brucan moton. thaer waes wuldres wynn, wigendra thrym, aethelic onginn, naes thaer aenigum gewinn. tham bith wraecsith witod, wite geopenad, the thara gefeana sceal fremde weorthan, hean hwearfian, thonne heonon gangath." tha waes modsefa myclum geblissod haliges on hrethre, syththan hleothorcwide gingran gehyrdon, thaet hie god wolde onmunan swa mycles ofer menn ealle, ond thaet word gecwaeth wigendra hleo: "Nu ic, god dryhten, ongiten haebbe thaet thu on farothstraete feor ne waere, cyninga wuldur, tha ic on ceol gestah, theh ic on ythfare, engla theoden, gasta geocend, ongitan ne cuthe. Weorth me nu milde, meotud aelmihtig, blithe, beorht cyning! Ic on brimstreame spraec worda worn, wat aefter nu hwa me wyrthmyndum on wudubate ferede ofer flodas. thaet is frofre gast haeletha cynne. thaer is help gearu, milts aet maerum, manna gehwylcum, sigorsped geseald, tham the seceth to him." tha him fore eagum onsyne wearth aetheling othywed in tha ilcan tid, cining cwicera gehwaes, thurh cnihtes had. tha he worde cwaeth, wuldres aldor: "Wes thu, Andreas, hal, mid thas willgedryht, ferthgefeonde! Ic the frithe healde, thaet the ne moton mangenihtlan, grame grynsmithas, gaste gesceththan." Feoll tha to foldan, friotho wilnode wordum wis haeleth, winedryhten fraegn: "Hu geworhte ic thaet, waldend fira, synnig with seolfne, sawla nergend, thaet ic the swa godne ongitan ne meahte on waegfaere, thaer ic worda gespraec minra for meotude ma thonne ic sceolde?" Him andswarode ealwalda god: "No thu swa swithe synne gefremedest swa thu in Achaia ondsaec dydest, thaet thu on feorwegas feran ne cuthe ne in tha ceastre becuman mehte, thing gehegan threora nihta fyrstgemearces, swa ic the feran het ofer wega gewinn. Wast nu the gearwor thaet ic eathe maeg anra gehwylcne fremman ond fyrthran freonda minra on landa gehwylc, thaer me leofost bith. Aris nu hraedlice, raed aedre ongit, beorn gebledsod, swa the beorht faeder geweorthath wuldorgifum to widan aldre, craefte ond mihte. thu in tha ceastre gong under burglocan, thaer thin brothor is. Wat ic Matheus thurh maenra hand hrinen heorudolgum, heafodmagan searonettum beseted. thu hine secan scealt, leofne alysan of lathra hete, ond eal thaet mancynn the him mid wunige, eltheodigra inwitwrasnum, bealuwe gebundene. Him sceal bot hrathe weorthan in worulde ond in wuldre lean, swa ic him sylfum aer secgende waes. Nu thu, Andreas, scealt edre genethan in gramra gripe. Is the guth weotod, heardum heoruswengum scel thin hra daeled wundum weorthan, waettre geliccost faran flode blod. Hie thin feorh ne magon deathe gedaelan, theh thu drype tholie, synnigra slege. thu thaet sar aber; ne laet the ahweorfan haethenra thrym, grim gargewinn, thaet thu gode swice, dryhtne thinum. Wes a domes georn; laet the on gemyndum hu thaet manegum wearth fira gefrege geond feala landa, thaet me bysmredon bennum faestne weras wansaelige. Wordum tyrgdon, slogon ond swungon, synnige ne mihton thurh sarcwide soth gecythan. tha ic mid Iudeum gealgan thehte, (rod waes araered), thaer rinca sum of minre sidan swat ut forlet, dreor to foldan. Ic adreah feala yrmtha ofer eorthan. Wolde ic eow on thon thurh blithne hige bysne onstellan, swa on elltheode ywed wyrtheth. Manige syndon in thysse maeran byrig thara the thu gehweorfest to heofonleohte thurh minne naman, theah hie morthres feala in fyrndagum gefremed habban." Gewat him tha se halga heofonas secan, eallra cyninga cining, thone claenan ham, eathmedum upp, thaer is ar gelang fira gehwylcum, tham the hie findan cann. tha waes gemyndig modgethyldig, beorn beaduwe heard, eode in burh hrathe, anraed oretta, elne gefyrthred, maga mode rof, meotude getreowe, stop on straete, (stig wisode), swa him naenig gumena ongitan ne mihte, synfulra geseon. Haefde sigora weard on tham wangstede waere betolden leofne leodfruman mid lofe sinum. Haefde tha se aetheling in gethrungen, Cristes cempa, carcerne neh. Geseh he haethenra hloth aetgaedere, fore hlindura hyrdas standan, seofone aetsomne. Ealle swylt fornam, druron domlease. Deathraes forfeng haeleth heorodreorige. tha se halga gebaed bilwytne faeder, breostgehygdum herede on hehtho heofoncyninges thrym, godes dryhtendom. Duru sona onarn thurh handhrine haliges gastes, ond thaer in eode, elnes gemyndig, haele hildedeor. Haethene swaefon, dreore druncne, deathwang rudon. Geseh he Matheus in tham morthorcofan, haeleth higerofne under heolstorlocan, secgan dryhtne lof, domweorthinga engla theodne. He thaer ana saet geohthum geomor in tham gnornhofe. Geseh tha under swegle swaesne geferan, halig haligne. Hyht waes geniwad. Aras tha togenes, gode thancade thaes the hie onsunde aefre moston geseon under sunnan. Syb waes gemaene bam tham gebrothrum, blis edniwe. aeghwaether otherne earme bethehte, cyston hie ond clypton. Criste waeron begen leofe on mode. Hie leoht ymbscan halig ond heofontorht. Hrethor innan waes wynnum awelled. tha worde ongan aerest Andreas aethelne geferan on clustorcleofan mid cwide sinum gretan godfyrhtne, saede him guthgethingu, feohtan fara monna: "Nu is this folc on luste, haeleth hyder on gewyrht eardes neosan." aefter thyssum wordum wuldres thegnas, begen tha gebrothor, to gebede hyldon, sendon hira bene fore bearn godes. Swylce se halga in tham hearmlocan his god grette ond him geoce baed, haelend helpe, aer than hra crunge fore haethenra hildethrymme, ond tha gelaedde of leothobendum fram tham faestenne on frith dryhtnes tu ond hundteontig geteled rime, swylce feowertig, generede fram nithe, (thaer he naenigne forlet under burglocan bennum faestne), ond thaer wifa tha gyt, weorodes to eacan, anes wana the fiftig forhte gefreothode. Faegen waeron sithes, lungre leordan, nalas leng bidon in tham gnornhofe guthgethingo. Gewat tha Matheus menigo laedan on gehyld godes, swa him se halga bebead. Weorod on wilsith wolcnum bethehte, the laes him scyldhatan scyththan comon mid earhfare, ealdgenithlan. thaer tha modigan mid him maethel gehedan, treowgethoftan, aer hie on tu hweorfan. aegther thara eorla othrum trymede heofonrices hyht, helle witu wordum werede. Swa tha wigend mid him, haeleth higerofe, halgum stefnum cempan coste cyning weorthadon, wyrda waldend, thaes wuldres ne bith aefre mid eldum ende befangen. Gewat him tha Andreas inn on ceastre glaedmod gangan, to thaes the he gramra gemot, fara folcmaegen, gefraegen haefde, oththaet he gemette be mearcpathe standan straete neah stapul aerenne. Gesaet him tha be healfe, haefde hluttre lufan, ece upgemynd engla blisse; thanon basnode under burhlocan hwaet him guthweorca gifethe wurde. tha gesamnedon side herigeas, folces frumgaras. To tham faestenne waerleasra werod waepnum comon, haethne hildfrecan, to thaes tha haeftas aer under hlinscuwan hearm throwedon. Wendan ond woldon witherhycgende thaet hie on eltheodigum aet geworhton, weotude wiste. Him seo wen gelah, syththan mid corthe carcernes duru eorre aescberend opene fundon, onhliden hamera geweorc, hyrdas deade. Hie tha unhythige eft gecyrdon, luste belorene, lathspell beran, saegdon tham folce thaet thaer feorrcundra, ellreordigra, aenigne to lafe in carcerne cwicne ne gemetton, ah thaer heorodreorige hyrdas lagan, gaesne on greote, gaste berofene, faegra flaescheaman. tha wearth forht manig for tham faerspelle folces raeswa, hean, hygegeomor, hungres on wenum, blates beodgastes. Nyston beteran raed, thonne hie tha belidenan him to lifnere deade gefeormedon. Duruthegnum wearth in ane tid eallum aetsomne thurh heard gelac hildbedd styred. tha ic lungre gefraegn leode tosomne burgwaru bannan. Beornas comon, wiggendra threat, wicgum gengan, on mearum modige, maethelhegende, aescum dealle. tha waes eall geador to tham thingstede theod gesamnod. Leton him tha betweonum taan wisian hwylcne hira aerest othrum sceolde to foddurthege feores ongyldan; hluton hellcraeftum, haethengildum teledon betwinum. tha se tan gehwearf efne ofer aenne ealdgesitha, se waes uthweota eorla dugothe, heriges on ore. Hrathe siththan wearth fetorwrasnum faest, feores orwena. Cleopode tha collenferhth cearegan reorde, cwaeth he his sylfes sunu syllan wolde on aehtgeweald, eaforan geongne, lifes to lisse. Hie tha lac hrathe thegon to thance. theod waes oflysted, metes modgeomre, naes him to mathme wynn, hyht to hordgestreonum. Hungre waeron thearle gethreatod, swa se theodsceatha reow ricsode. tha waes rinc manig, guthfrec guma, ymb thaes geongan feorh breostum onbryrded. To tham beadulace waes thaet weatacen wide gefrege, geond tha burh bodad beorne manegum, thaet hie thaes cnihtes cwealm corthe gesohton, duguthe ond eogothe, dael onfengon lifes to leofne. Hie lungre to thaes, haethene herigweardas, here samnodan ceastrewarena. Cyrm upp astah tha se geonga ongann geomran stefne, gehaefted for herige, hearmleoth galan, freonda feasceaft, frithes wilnian. Ne mihte earmsceapen are findan, freothe aet tham folce, the him feores wolde, ealdres geunnan. Haefdon aeglaecan saecce gesohte. Sceolde sweordes ecg, scerp ond scurheard, of sceathan folme, fyrmaelum fag, feorh acsigan. tha thaet Andrea earmlic thuhte, theodbealo thearlic to getholianne, thaet he swa unscyldig ealdre sceolde lungre linnan. Waes se leodhete thrist ond throhtheard. thrymman sceocan, modige maguthegnas, morthres on luste, woldon aeninga, ellenrofe, on tham hysebeorthre heafolan gescenan, garum agetan. Hine god forstod, halig of hehtho, haethenum folce. Het waepen wera wexe gelicost on tham orlege eall formeltan, thy laes scyldhatan sceththan mihton, egle ondsacan, ecga thrythum. Swa wearth alysed of leodhete, geong of gyrne. Gode ealles thanc, dryhtna dryhtne, thaes the he dom gifeth gumena gehwylcum, thara the geoce to him seceth mid snytrum. thaer bith symle gearu freod unhwilen, tham the hie findan cann. tha waes wop haefen in wera burgum, hlud heriges cyrm. Hreopon friccan, maendon meteleaste, methe stodon, hungre gehaefte. Hornsalu wunedon, weste winraeced, welan ne benohton beornas to brucanne on tha bitran tid, gesaeton searuthancle sundor to rune ermthu eahtigan. Naes him to ethle wynn. Fregn tha gelome freca otherne: "Ne hele se the haebbe holde lare, on sefan snyttro! Nu is sael cumen, threa ormaete, is nu thearf mycel thaet we wisfaestra wordum hyran." tha for thaere dugothe deoful aetywde, wann ond wliteleas, haefde weriges hiw. Ongan tha meldigan morthres brytta, hellehinca, thone halgan wer witherhycgende, ond thaet word gecwaeth: "Her is gefered ofer feorne weg aethelinga sum innan ceastre, elltheodigra, thone ic Andreas nemnan herde. He eow neon gesceod tha he aferede of faestenne manncynnes ma thonne gemet waere. Nu ge magon eathe oncythdaeda wrecan on gewyrhtum. Laetath waepnes spor iren ecgheard, ealdorgeard sceoran, faeges feorhhord. Gath fromlice thaet ge witherfeohtend wiges gehnaegan." Him tha Andreas agef ondsware: "Hwaet, thu thristlice theode laerest, baeldest to beadowe! Waest the baeles cwealm, hatne in helle, ond thu here fysest, fethan to gefeohte. Eart thu fag with god, dugotha demend. Hwaet, thu deofles strael, icest thine yrmtho. the se aelmihtiga heanne gehnaegde, ond on heolstor besceaf, thaer the cyninga cining clamme belegde, ond the syththan a Satan nemdon, tha the dryhtnes a deman cuthon." tha gyt se withermeda wordum laerde folc to gefeohte, feondes craefte: "Nu ge gehyath haeletha gewinnan, se thyssum herige maest hearma gefremede. thaet is Andreas, se me on fliteth wordum wraetlicum for wera menigo." tha waes beacen boden burhsittendum. Ahleopon hildfrome heriges brehtme ond to weallgeatum wigend thrungon, cene under cumblum, corthe mycle to tham orlege, ordum ond bordum. tha worde cwaeth weoroda dryhten, meotud mihtum swith saegde his magothegne: "Scealt thu, Andreas, ellen fremman! Ne mith thu for menigo, ah thinne modsefan stathola with strangum! Nis seo stund latu thaet the waelreowe witum belecgath, cealdan clommum. Cyth the sylfne, herd hige thinne, heortan stathola, thaet hie min on the maegen oncnawan. Ne magon hie ond ne moton ofer mine est thinne lichoman, lehtrum scyldige, deathe gedaelan, theah thu drype tholige, mirce manslaga. Ic the mid wunige." aefter tham wordum com werod unmaete, lyswe larsmeothas, mid lindgecrode, bolgenmode; baeron ut hraethe ond tham halgan thaer handa gebundon. Siththan geypped waes aethelinga wynn, ond hie andweardne eagum meahton gesion sigerofne, thaer waes sec manig on tham welwange wiges oflysted leoda duguthe. Lyt sorgodon hwylc him thaet edlean aefter wurde. Heton tha laedan ofer landsceare, thragmaelum teon, torngenithlan, swa hie hit frecnost findan meahton. Drogon deormodne aefter dunscraefum, ymb stanhleotho, staercedferthne, efne swa wide swa wegas to lagon, enta aergeweorc, innan burgum, straete stanfage. Storm upp aras aefter ceasterhofum, cirm unlytel haethnes heriges. Waes thaes halgan lic sarbennum soden, swate bestemed, banhus abrocen. Blod ythum weoll, hatan heolfre. Haefde him on innan ellen untweonde, waes thaet aethele mod asundrad fram synnum, theah he sares swa feala deopum dolgslegum dreogan sceolde. Swa waes ealne daeg oththaet aefen com sigetorht swungen. Sar eft gewod ymb thaes beornes breost, oththaet beorht gewat sunne swegeltorht to sete glidan. Laeddan tha leode lathne gewinnan to carcerne. He waes Criste swa theah leof on mode. Him waes leoht sefa halig heortan neh, hige untyddre. tha se halga waes under heolstorscuwan, eorl ellenheard, ondlange niht searothancum beseted. Snaw eorthan band wintergeworpum. Weder coledon heardum haegelscurum, swylce hrim ond forst, hare hildstapan, haeletha ethel lucon, leoda gesetu. Land waeron freorig cealdum cylegicelum, clang waeteres thrym ofer eastreamas, is brycgade blaece brimrade. Blitheort wunode eorl unforcuth, elnes gemyndig, thrist ond throhtheard in threanedum wintercealdan niht. No on gewitte blon, acol for thy egesan, thaes the he aer ongann, thaet he a domlicost dryhten herede, weorthade wordum, oththaet wuldres gim heofontorht onhlad. tha com haeletha threat to thaere dimman ding, duguth unlytel, wadan waelgifre weorodes brehtme. Heton ut hraethe aetheling laedan in wrathra geweald, waerfaestne haeleth. tha waes eft swa aer ondlangne daeg swungen sarslegum. Swat ythum weoll thurh bancofan, blodlifrum swealg, hatan heolfre. Hra weorces ne sann, wundum werig. tha cwom wopes hring thurh thaes beornes breost, blat ut faran, weoll wathuman stream, ond he worde cwaeth: "Geseoh nu, dryhten god, drohtath minne, weoruda willgeofa! thu waest ond const anra gehwylces earfethsithas. Ic gelyfe to the, min liffruma, thaet thu mildheort me for thinum maegenspedum, nerigend fira, naefre wille, ece aelmihtig, anforlaetan, swa ic thaet gefremme, thenden feorh leofath, min on moldan, thaet ic, meotud, thinum larum leofwendum lyt geswice. thu eart gescyldend with sceathan waepnum, ece eadfruma, eallum thinum; ne laet nu bysmrian banan manncynnes, facnes frumbearn, thurh feondes craeft leahtrum belecgan tha thin lof berath." tha thaer aetywde se atola gast, wrath waerloga. Wigend laerde for tham heremaegene helle dioful awerged in witum, ond thaet word gecwaeth: "Sleath synnigne ofer seolfes muth, folces gewinnan! Nu to feala reordath." tha waes orlege eft onhrered, niwan stefne. Nith upp aras oththaet sunne gewat to sete glidan under niflan naes. Niht helmade, brunwann oferbraed beorgas steape, ond se halga waes to hofe laeded, deor ond domgeorn, in thaet dimme raeced; sceal thonne in neadcofan nihtlangne fyrst waerfaest wunian wic unsyfre. tha com seofona sum to sele geongan, atol aeglaeca yfela gemyndig, morthres manfrea myrce gescyrded, deoful deathreow duguthum bereafod, ongan tha tham halgan hospword sprecan: "Hwaet hogodest thu, Andreas, hidercyme thinne on wrathra geweald? Hwaet is wuldor thin, the thu oferhigdum upp araerdest, tha thu goda ussa gild gehnaegdest? Hafast nu the anum eall getihhad land ond leode, swa dyde lareow thin. Cynethrym ahof, tham waes Crist nama, ofer middangeard, thynden hit meahte swa. thone Herodes ealdre besnythede, forcom aet campe cyning Iudea, rices beraedde, ond hine rode befealg, thaet he on gealgan his gast onsende. Swa ic nu bebeode bearnum minum, thegnum thrythfullum, thaet hie the hnaegen, gingran aet guthe. Laetath gares ord, earh aettre gemael, in gedufan in faeges ferth. Gath fromlice, thaet ge guthfrecan gylp forbegan." Hie waeron reowe, raesdon on sona gifrum grapum. Hine god forstod, stathulfaest steorend, thurh his strangan miht. Syththan hie oncneowon Cristes rode on his maegwlite, maere tacen, wurdon hie tha acle on tham onfenge, forhte, afaerde, ond on fleam numen. Ongan eft swa aer ealdgenithla, helle haeftling, hearmleoth galan: "Hwaet wearth eow swa rofum, rincas mine, lindgesteallan, thaet eow swa lyt gespeow?" Him tha earmsceapen agef ondsware, fah fyrnsceatha, ond his faeder oncwaeth: "Ne magan we him lungre lath aetfaestan, swilt thurh searwe. Ga the sylfa to! thaer thu gegninga guthe findest, frecne feohtan, gif thu furthur dearst to tham anhagan aldre genethan. We the magon eathe, eorla leofost, aet tham secgplegan selre gelaeran; aer thu gegninga guthe fremme, wiges woman, weald, hu the saele aet tham gegnslege. Utan gangan eft, thaet we bysmrigen bendum faestne, othwitan him his wraecsith. Habbath word gearu with tham aeglaecan eall getrahtod!" tha hleothrade hludan stefne, witum bewaeled, ond thaet word gecwaeth: "thu the, Andreas, aclaeccraeftum lange feredes! Hwaet, thu leoda feala forleolce ond forlaerdest! Nu leng ne miht gewealdan thy weorce. the synd witu thaes grim weotud be gewyrhtum. thu scealt werigmod, hean, hrothra leas, hearm throwigan, sare swyltcwale. Secgas mine to tham guthplegan gearwe sindon, tha the aeninga ellenweorcum unfyrn faca feorh aethringan. Hwylc is thaes mihtig ofer middangeard, thaet he aethringan. Hwylc is thaes mihtig ofer middangeard, thaet he the alyse of leothubendum, Him tha Andreas agef ondsware: "Hwaet, me eathe aelmihtig god, nitha neregend, se the in niedum iu gefaestnode fyrnum clommum! thaer thu syththan a, susle gebunden, in wraec wunne, wuldres blunne, syththan thu forhogedes heofoncyninges word. thaer waes yfles or, ende naefre thines wraeces weortheth. thu scealt widan feorh ecan thine yrmthu. the bith a symble of daege on daeg drohtath strengra." tha wearth on fleame se the tha faehtho iu with god geara grimme gefremede. Com tha on uhtan mid aerdaege haethenra hloth haliges neosan leoda weorude. Heton laedan ut throhtheardne thegn thriddan sithe, woldon aninga ellenrofes mod gemyltan. Hit ne mihte swa! tha waes niowinga nith onhrered, heard ond hetegrim. Waes se halga wer sare geswungen, searwum gebunden, dolgbennum thurhdrifen, thendon daeg lihte. Ongan tha geomormod to gode cleopian, heard of haefte, halgan stefne weop werigferth, ond thaet word gecwaeth: "Naefre ic geferde mid frean willan under heofonhwealfe heardran drohtnoth, thaer ic dryhtnes ae deman sceolde. Sint me leothu tolocen, lic sare gebrocen, banhus blodfag, benne weallath, seonodolg swatige. Hwaet, thu sigora weard, dryhten haelend, on daeges tide mid Iudeum geomor wurde tha thu of gealgan, god lifigende, fyrnweorca frea, to faeder cleopodest, cininga wuldor, ond cwaede thus: 'Ic the, faeder engla, frignan wille, lifes leohtfruma, hwaet forlaetest thu me?' Ond ic nu thry dagas tholian sceolde waelgrim witu. Bidde ic, weoroda god, thaet ic gast minne agifan mote, sawla symbelgifa, on thines sylfes hand. thu thaet gehete thurh thin halig word, tha thu us twelfe trymman ongunne, thaet us heterofra hild ne gesceode, ne lices dael lungre oththeoded, ne synu ne ban on swathe lagon, ne loc of heafde to forlore wurde, gif we thine lare laestan woldon. Nu sint sionwe toslopen, is min swat adropen, licgath aefter lande loccas todrifene, fex on foldan. Is me feorhgedal leofre mycle thonne theos lifcearo." Him tha stefn oncwaeth, stithhycgendum, wuldorcyninges word hlothrode: "Ne wep thone wraecsith, wine leofesta, nis the to frecne. Ic the frithe healde, minre mundbyrde maegene besette. Me is miht ofer eall, sigorsped geseald. Soth thaet gecytheth maenig aet methele on tham myclan daege, thaet thaet geweortheth, thaet theos wlitige gesceaft, heofon ond eorthe, hreosath togadore, aer awaeged sie worda aenig the ic thurh minne muth methlan onginne. Geseoh nu seolfes swaethe, swa thin swat aget thurh bangebrec blodige stige, lices laelan. No the lathes ma thurh darotha gedrep gedon motan, tha the heardra maest hearma gefremedan." tha on last beseah leoflic cempa aefter wordcwidum wuldorcyninges. Geseh he geblowene bearwas standan blaedum gehrodene, swa he aer his blod aget. tha worde cwaeth wigendra hleo: "Sie the thanc ond lof, theoda waldend, to widan feore wuldor on heofonum, thaes thu me on sare, sigedryhten min, elltheodigne, an ne forlaete." Swa se daedfruma dryhten herede halgan stefne oththaet hador saegl wuldortorht gewat under wathu scrithan. tha tha folctogan feorthan sithe, egle ondsacan, aetheling laeddon to tham carcerne, woldon craefta gehygd, magoraedendes mod oncyrran on thaere deorcan niht. tha com dryhten god in thaet hlinraeced, haeletha wuldor, ond tha wine synne wordum grette ond frofre gecwaeth, faeder manncynnes, lifes lareow, heht his lichoman hales brucan: "Ne scealt thu in henthum a leng searohaebbendra sar throwian." Aras tha maegene rof, saegde meotude thanc, hal of haefte heardra wita. Naes him gewemmed wlite, ne wloh of hraegle lungre alysed, ne loc of heafde, ne ban gebrocen, ne blodig wund lice gelenge, ne lathes dael, thurh dolgslege dreore bestemed, ac waes eft swa aer thurh tha aethelan miht lof laedende, ond on his lice trum. Hwaet, ic hwile nu haliges lare, leothgiddinga, lof thaes the worhte, wordum wemde, wyrd undyrne ofer min gemet. Mycel is to secganne, langsum leornung, thaet he in life adreag, eall aefter orde. thaet scell aeglaewra mann on moldan thonne ic me taelige findan on ferthe, thaet fram fruman cunne eall tha earfetho the he mid elne adreah, grimra gutha. Hwaethre git sceolon lytlum sticcum leothworda dael furthur reccan. thaet is fyrnsaegen, hu he weorna feala wita getholode, heardra hilda, in thaere haethenan byrig. He be wealle geseah wundrum faeste under saelwage sweras unlytle, stapulas standan, storme bedrifene, eald enta geweorc. He with anne thaera, mihtig ond modrof, maethel gehede, wis, wundrum gleaw, word stunde ahof: "Geher thu, marmanstan, meotudes raedum, fore thaes onsyne ealle gesceafte forhte geweorthath, thonne hie faeder geseoth heofonas ond eorthan herigea maeste on middangeard mancynn secan. Laet nu of thinum stathole streamas weallan, ea inflede, nu the aelmihtig hateth, heofona cyning, thaet thu hraedlice on this fraete folc forth onsende waeter widrynig to wera cwealme, geofon geotende. Hwaet, thu golde eart, sincgife, sylla! On the sylf cyning wrat, wuldres god, wordum cythde recene geryno, ond ryhte ae getacnode on tyn wordum, meotud mihtum swith. Moyse sealde, swa hit sothfaeste syththan heoldon, modige magothegnas, magas sine, godfyrhte guman, Iosua ond Tobias. Nu thu miht gecnawan thaet the cyning engla gefraetwode furthur mycle giofum geardagum thonne eall gimma cynn. thurh his halige haes thu scealt hraethe cythan gif thu his ondgitan aenige haebbe." Naes tha wordlatu wihte thon mare thaet se stan togan. Stream ut aweoll, fleow ofer foldan. Famige walcan mid aerdaege eorthan thehton, myclade mereflod. Meoduscerwen wearth aefter symbeldage, slaepe tobrugdon searuhaebbende. Sund grunde onfeng, deope gedrefed. Duguth wearth afyrhted thurh thaes flodes faer. Faege swulton, geonge on geofene guthrases fornam thurh sealtne weg. thaet waes sorgbyrthen, biter beorthegu. Byrlas ne gaeldon, ombehtthegnas. thaer waes aelcum genog fram daeges orde drync sona gearu. Weox waeteres thrym. Weras cwanedon, ealde aescberend. Waes him ut myne fleon fealone stream, woldon feore beorgan, to dunscraefum drohtath secan, eorthan ondwist. Him thaet engel forstod, se tha burh oferbraegd blacan lige, hatan heathowaelme. Hreoh waes thaer inne beatende brim. Ne mihte beorna hloth of tham faestenne fleame spowan. Waegas weoxon, wadu hlynsodon, flugon fyrgnastas, flod ythum weoll. thaer waes ythfynde innan burgum geomorgidd wrecen. Gehtho maendan forhtferth manig, fusleoth golon. Egeslic aeled eagsyne wearth, heardlic hereteam, hleothor gryrelic. thurh lyftgelac leges blaestas weallas ymbwurpon, waeter mycladon. thaer waes wop wera wide gehyred, earmlic ylda gedraeg. tha thaer an ongann, feasceaft haeleth, folc gadorigean, hean, hygegeomor, heofende spraec: "Nu ge magon sylfe soth gecnawan, thaet we mid unrihte elltheodigne on carcerne clommum belegdon, witebendum. Us seo wyrd scytheth, heard ond hetegrim. thaet is her swa cuth, is hit mycle selre, thaes the ic soth talige, thaet we hine alysan of leothobendum, ealle anmode, (ofost is selost), ond us thone halgan helpe biddan, geoce ond frofre. Us bith gearu sona sybb aefter sorge, gif we secath to him." tha thaer Andrea orgete wearth on fyrhthlocan folces gebaero, thaer waes modigra maegen forbeged, wigendra thrym. Waeter faethmedon, fleow firgendstream, flod waes on luste, oththaet breost oferstag, brim weallende, eorlum oth exle. tha se aetheling het streamfare stillan, stormas restan ymbe stanhleothu. Stop ut hraethe cene collenferth, carcern ageaf, gleawmod, gode leof. Him waes gearu sona thurh streamraece straet gerymed. Smeolt waes se sigewang, symble waes dryge folde fram flode, swa his fot gestop. Wurdon burgware blithe on mode, ferhthgefeonde. tha waes forth cumen geoc aefter gyrne. Geofon swathrode thurh haliges haes, hlyst yst forgeaf, brimrad gebad. tha se beorg tohlad, eorthscraef egeslic, ond thaer in forlet flod faethmian, fealewe waegas, geotende gegrind grund eall forswealg. Nalas he thaer ythe ane bisencte, ach thaes weorodes eac tha wyrrestan, faa folcsceathan, feowertyne gewiton mid thy waege in forwyrd sceacan under eorthan grund. tha wearth acolmod, forhtferth manig folces on laste. Wendan hie wifa ond wera cwealmes, thearlra gethinga thrage hnagran, syththan mane faa, morthorscyldige, guthelacan under grund hruron. Hie tha anmode ealle cwaedon: "Nu is gesyne thaet the soth meotud, cyning eallwihta, craeftum wealdeth, se thisne ar hider onsende theodum to helpe. Is nu thearf mycel thaet we gumcystum georne hyran." tha se halga ongann haeleth blissigean, wigendra threat wordum retan: "Ne beoth ge to forhte, theh the fell curen synnigra cynn. Swylt throwode, witu be gewyrhtum. Eow is wuldres leoht torht ontyned, gif ge teala hycgath." Sende tha his bene fore bearn godes, baed haligne helpe gefremman gumena geogothe, the on geofene aer thurh flodes faethm feorh gesealdon, thaet tha gastas, gode orfeorme, in wita forwyrd, wuldre bescyrede, in feonda geweald gefered ne wurdan. tha thaet aerende ealwealdan gode aefter hleothorcwidum haliges gastes waes on thanc sprecen, theoda raeswan. Het tha onsunde ealle arisan, geonge of greote, tha aer geofon cwealde. tha thaer ofostlice upp astodon manige on methele, mine gefrege, eaforan unweaxne, tha waes eall eador leotholic ond gastlic, theah hie lungre aer thurh flodes faer feorh aleton. Onfengon fulwihte ond freothuwaere, wuldres wedde witum aspedde, mundbyrd meotudes. tha se modiga het, cyninges craeftiga, ciricean getimbran, gerwan godes tempel, thaer sio geogoth aras thurh faeder fulwiht ond se flod onsprang. tha gesamnodon secga threate weras geond tha winburg wide ond side, eorlas anmode, ond hira idesa mid, cwaedon holdlice hyran woldon, onfon fromlice fullwihtes baeth dryhtne to willan, ond diofolgild, ealde eolhstedas, anforlaetan. tha waes mid thy folce fulwiht haefen, aethele mid eorlum, ond ae godes riht araered, raed on lande mid tham ceasterwarum, cirice gehalgod. thaer se ar godes anne gesette, wisfaestne wer, wordes gleawne, in thaere beorhtan byrig bisceop tham leodum, ond gehalgode fore tham heremaegene thurh apostolhad, Platan nemned, theodum on thearfe, ond thriste bebead thaet hie his lare laeston georne, feorhraed fremedon. Saegde his fusne hige, thaet he tha goldburg ofgifan wolde, secga seledream ond sincgestreon, beorht beagselu, ond him brimthisan aet saes farothe secan wolde. thaet waes tham weorode weorc to getholigenne, thaet hie se leodfruma leng ne wolde wihte gewunian. tha him wuldres god on tham sithfaete sylfum aetywde, ond thaet word gecwaeth, weoruda dryhten: "folc of firenum? Is him fus hyge gath geomriende, geohtho maenath weras wif samod. Hira wop becom, murnende mod fore sneowan. Ne scealt thu thaet eowde anforlaetan on swa niowan gefean, ah him naman minne on ferthlocan faeste getimbre. Wuna in thaere winbyrig, wigendra hleo, salu sinchroden, seofon nihta fyrst. Syththan thu mid mildse minre ferest." tha eft gewat othre sithe modig, maegene rof, Marmedonia ceastre secan. Cristenra weox word ond wisdom, syththan wuldres thegn, aethelcyninges ar, eagum sawon. Laerde tha tha leode on geleafan weg, trymede torhtlice, tireadigra wenede to wuldre weorod unmaete, to tham halgan ham heofona rices, thaer faeder ond sunu ond frofre gast in thrinnesse thrymme wealdeth in woruld worulda wuldorgestealda. Swylce se halga herigeas threade, deofulgild todraf ond gedwolan fylde. thaet waes Satane sar to getholienne, mycel modes sorg, thaet he tha menigeo geseah hweorfan higeblithe fram helltrafum thurh Andreas este lare to faegeran gefean, thaer naefre feondes ne bith, gastes gramhydiges, gang on lande. tha waeron gefylde aefter frean dome dagas on rime, swa him dryhten bebead, thaet he tha wederburg wunian sceolde. Ongan hine tha fysan ond to flote gyrwan, blissum hremig, wolde on brimthisan Achaie othre sithe sylfa gesecan, thaer he sawulgedal, beaducwealm gebad. thaet tham banan ne wearth hleahtre behworfen, ah in helle ceafl sith asette, ond syththan no, fah, freonda leas, frofre benohte. tha ic laedan gefraegn leoda weorode leofne lareow to lides stefnan, maecgas modgeomre. thaer manegum waes hat aet heortan hyge weallende. Hie tha gebrohton aet brimes naesse on waegthele wigan unslawne. Stodon him tha on ofre aefter reotan thendon hie on ythum aethelinga wunn ofer seolhpathu geseon mihton, ond tha weorthedon wuldres agend, cleopodon on corthe, ond cwaedon thus: "An is ece god eallra gesceafta! Is his miht ond his aeht ofer middangeard breme gebledsod, ond his blaed ofer eall in heofonthrymme halgum scineth, wlitige on wuldre to widan ealdre, ece mid englum. thaet is aethele cyning!"