Shikwa

transliterator: thothica

work_id: "cc61e86c-ca8b-4714-8f37-fe742b33069d" work_slug: "allama-iqbal-bang-e-dara-part-3-cc61e8" work_title: "Bang-E-Dara Part 3" author_name: Allama Iqbal chapter_number: 20 chapter_title: Shikwa chapter_slug: "20-shikwa" variant_id: "00e884a0-e395-41f3-be51-b539d078efc9" content_type: transliteration layout: verse language: Urdu source_language: Urdu language_direction: ltr script: latin word_count: 1429 estimated_read_time: 6

Shikwa (Shikwa)

Kyon ziyaan kaar banun, sood faraamosh rahun Fikr farda na karun, mehve gham-e-dosh rahun Naale bulbul ke sunoon aur hama tan gosh rahun Hum nawa mein bhi koi gul hoon ke khaamosh rahun Jurrat aamoz meri taab-e-sukhan hai mujh ko Shikwa Allah se, khaakam badahan, hai mujh ko

Hai baja shewa-e-tasleem mein mash'hoor hain hum Qissa dard sunaate hain ke majboor hain hum Saaz khaamosh hain, faryaad se maamoor hain hum Naala aata hai agar lab pe to maazoor hain hum Ae Khuda! shikwa-e-arbaab-e-wafa bhi sun le Khoo-gar-e hamd se thora sa gila bhi sun le

Thi to maujood azal se hi teri zaat-e-qadeem Phool tha zeb-e-chaman par na pareshaan thi shameem Shart-e insaaf hai ae saahib-e-altaaf-e-ameem Boo-e gul phailti kis tarah jo hoti na naseem Hum ko jamiyat-e-khaatir yeh pareshaani thi Warna ummat tere Mehboob ki deewani thi?

Hum se pehle tha ajab tere jahaan ka manzar Kahin masjood the patthar, kahin maabood shajar Khoo-gar-e paikar-e-mehsoos thi insaan ki nazar Maanta phir koi an-dekhe Khuda ko kyonkar Tujh ko maaloom hai, leta tha koi naam tera? Quwwat-e baazu-e-Muslim ne kiya kaam tera

Bas rahe the yahin Saljuq bhi, Tooraani bhi Ahl-e Cheen Cheen mein, Iran mein Saasaani bhi Isi maamooray mein aabaad the Yoonaani bhi Isi duniya mein Yahoodi bhi the, Nasraani bhi Par tere naam pe talwaar uthaayi kis ne Baat jo bigri hui thi, woh banaayi kis ne

The humein ek tere maarka aaraaon mein Khushkiyon mein kabhi larte, kabhi daryaaon mein Deen azaanein kabhi Europe ke kaleesaaon mein Kabhi Africa ke tapte hue sehraaon mein Shaan aankhon mein na jachti thi jahaandaaron ki Kalma parhte the hum chaaon mein talwaaron ki

Hum jo jeete the to jangon ki museebat ke liye Aur marte the tere naam ki azmat ke liye Thi na kuch tegh-zani apni hukoomat ke liye Sar-ba-kaf phirte the kya deher mein daulat ke liye? Qaum apni jo zar-o-maal-e-jahaan par marti But faroshi ke ewaz but-shikani kyon karti ! Tal na sakte the agar jang mein ar jaate the Paaon sheron ke bhi maidaan se ukhar jaate the Tujh se sarkash hua koi to bigar jaate the Tegh kya cheez hai, hum toap se lar jaate the Naqsh-e tauheed ka har dil pe bithaaya hum ne Zer-e khanjar bhi yeh paighaam sunaaya hum ne

Tu hi keh de ke ukhaara dar-e-Khaibar kis ne Sheher Qaisar ka jo tha, us ko kiya sar kis ne Toray makhlooq khudaawandon ke paikar kis ne Kaat kar rakh diye kuffaar ke lashkar kis ne Kis ne thanda kiya aatishkada-e-Iran ko? Kis ne phir zinda kiya tazkara-e-Yazdaan ko?

Kaun si qaum faqat teri talabgaar hui Aur tere liye zehmat-kash-e-paikaar hui Kis ki shamsheer jahaan-geer, jahaan-daar hui Kis ki takbeer se duniya teri bedaar hui Kis ki haibat se sanam sehme hue rehte the Munh ke bal gir ke 'Huwa Allahu Ahad' kehte the

Aa gaya ain laraai mein agar waqt-e-Namaz Qibla-roo ho ke zameen-bos hui qaum-e-Hijaaz Ek hi saf mein khare ho gaye Mahmud-o-Ayaaz Na koi banda raha aur na koi banda-nawaaz Banda-o-sahib-o-mohtaaj-o-ghani ek hue Teri sarkaar mein pohanche to sabhi ek hue

Mehfil-e kaun-o-makaan mein seher-o-shaam phire Mai-e tauheed ko le kar sifat-e-jaam phire Koh mein, dasht mein le kar tera paighaam phire Aur maaloom hai tujh ko, kabhi naakaam phire ! Dasht to dasht hain, darya bhi na choray hum ne Behr-e zulmaat mein daura diye ghore hum ne

Safha-e deher se baatil ko mitaaya hum ne Nau-e insaan ko ghulaami se churaaya hum ne Tere Kaabe ko jabeenon se basaaya hum ne Tere Qur'an ko seenon se lagaaya hum ne Phir bhi hum se yeh gila hai ke wafadaar nahin Hum wafadaar nahin, tu bhi to dildaar nahin ! Ummatein aur bhi hain, un mein gunahgaar bhi hain Ijz waale bhi hain, mast-e-mai-e-pindaar bhi hain In mein kaahil bhi hain, ghaafil bhi hain, hoshiyaar bhi hain Sainkron hain ke tere naam se bezaar bhi hain Rehmatein hain teri aghyaar ke kaashaanon par Barq girti hai to bechaare Musalmaanon par

But sanam-khaanon mein kehte hain, Musalmaan gaye Hai khushi un ko ke Kaabe ke nigehbaan gaye Manzil-e deher se oonton ke hudi-khwaan gaye Apni baghlon mein dabaye hue Qur'an gaye Khanda-zan kufr hai, ehsaas tujhe hai ke nahin Apni tauheed ka kuch paas tujhe hai ke nahin

Yeh shikaayat nahin, hain un ke khazaane maamoor Nahin mehfil mein jinhein baat bhi karne ka shaoor Qeher to yeh hai ke kaafir ko milein hoor-o-qusoor Aur bechaare Musalmaan ko faqat waada-e-hoor Ab woh altaaf nahin, hum pe inaayaat nahin Baat yeh kya hai ke pehli si mudaaraat nahin

Kyon Musalmaanon mein hai daulat-e-duniya naayaab Teri qudrat to hai woh jis ki na had hai na hisaab Tu jo chaahe to uthe seena-e-sehra se hubaab Reh-raw-e dasht ho seli-zada-e-mauj-e-saraab Taan-e aghyaar hai, ruswaai hai, naadaari hai Kya tere naam pe marne ka ewaz khwaari hai?

Bani aghyaar ki ab chaahne waali duniya Reh gayi apne liye ek khayaali duniya Hum to rukhsat hue, auron ne sambhaali duniya Phir na kehna hui tauheed se khaali duniya Hum to jeete hain ke duniya mein tera naam rahe Kahin mumkin hai ke saaqi na rahe, jaam rahe ! Teri mehfil bhi gayi, chahne waale bhi gaye Shab ki aahein bhi gayin, subah ke naale bhi gaye Dil tujhe de bhi gaye, apna sila le bhi gaye Aa ke baithe bhi na the aur nikaale bhi gaye Aaye ushaaq, gaye waada-e-farda le kar Ab unhein dhoond chiraagh-e-rukh-e-zeba le kar

Dard-e Laila bhi wohi, Qais ka pehlu bhi wohi Najd ke dasht-o-jabal mein ram-e-aahu bhi wohi Ishq ka dil bhi wohi, husn ka jaadu bhi wohi Ummat-e Ahmed-e-Mursil bhi wohi, Tu bhi wohi Phir yeh aazurdagi-e-ghair-sabab kya maani Apne shaidaaon pe yeh chashm-e-ghazab kya maani

Tujh ko chhora ke Rasool-e-Arabi ko chhora? But-gari pesha kiya, but-shikani ko chhora? Ishq ko, ishq ki aashufta-sari ko chhora? Rasm-e Salman-o-Owais-e-Qarni ko chhora? Aag takbeer ki seenon mein dabi rakhte hain Zindagi misl-e-Bilal-e-Habashi rakhte hain

Ishq ki khair woh pehli si ada bhi na sahi Jaada paimaai-e-tasleem-o-raza bhi na sahi Muztarib dil sifat-e-qibla-numa bhi na sahi Aur paabandi-e-aaeen-e-wafa bhi na sahi Kabhi hum se, kabhi ghairon se shanaasaai hai Baat kehne ki nahin, tu bhi to harjaai hai ! Sar-e Faaran pe kiya deen ko kaamil tu ne Ik ishaare mein hazaaron ke liye dil tu ne Aatish andoz kiya ishq ka haasil tu ne Phoonk di garmi-e-rukhsaar se mehfil tu ne Aaj kyon seene humaare sharar-aabaad nahin Hum wohi sokhta-saamaan hain, tujhe yaad nahin?

Waadi-e Najd mein woh shor-e-salaasil na raha Qais deewana-e-nazzaara-e-mehmil na raha Hausale woh na rahe, hum na rahe, dil na raha Ghar yeh ujra hai ke tu raunaq-e-mehfil na raha Ae khush aan roz ke aayi o basad naaz aayi Be-hijabaana su-e-mehfil-e-ma baaz aayi

Baada-kash ghair hain gulshan mein lab-e-joo baithe Sunte hain jaam-ba-kaf naghma-e-koo koo baithe Door hangaama-e-gulzaar se yak-su baithe Tere deewane bhi hain muntazir-e-'Hu' baithe Apne parwaanon ko phir zauq-e-khud-afrozi de Barq-e dereena ko farmaan-e-jigar-sozi de

Qaum aawara inaan-taab hai phir su-e-Hijaaz Le ura bulbul-e-be-par ko mazaq-e-parwaaz Muztarib baagh ke har ghunche mein hai boo-e-niyaaz Tu zara chair to de, tishna-e-mizraab hai saaz Naghme betaab hain taaron se nikalne ke liye Toor muztar hai isi aag mein jalne ke liye

Mushkilein ummat-e-marhoom ki aasaan kar de Mor-e be-maaya ko hamdosh-e-Sulaimaan kar de Jins-e naayaab-e-mohabbat ko phir arzaan kar de Hind ke dair-nasheenon ko Musalmaan kar de Ju-e-khun mi chakad az hasrat-e-dereena-e-ma Mi tapad naala ba nishtar-kada-e-seena-e-ma

Boo-e gul le gayi beroon-e-chaman raaz-e-chaman Kya qayaamat hai ke khud phool hain ghammaaz-e-chaman ! Ehd-e gul khatm hua, toot gaya saaz-e-chaman Urr gaye daaliyon se zamzama-pardaaz-e-chaman Ek bulbul hai ke hai mehv-e-tarannum ab tak Us ke seene mein hai naghmon ka talaatum ab tak

Qumriyaan shaakh-e-sanober se gurezaan bhi huin Patiyaan phool ki jhar jhar ke pareshaan bhi huin Woh puraani rawishein baagh ki veeraan bhi huin Daaliyaan pairahan-e-barg se uriyaan bhi huin Qaid-e mausam se tabiyat rahi aazaad is ki Kaash gulshan mein samajhta koi faryaad is ki ! Lutf marne mein hai baaqi, na maza jeene mein Kuch maza hai to yahi khoon-e-jigar peene mein Kitne betaab hain jauhar mere aaeene mein Kis qadar jalwe tarapte hain mere seene mein Is gulistaan mein magar dekhne waale hi nahin Daagh jo seene mein rakhte hon, woh laale hi nahin

Chaak is bulbul-e-tanha ki nawa se dil hon Jaagne waale isi baang-e-dara se dil hon Yaani phir zinda naye ehd-e-wafa se dil hon Phir isi baada-e-dereena ke pyaase dil hon Ajami khum hai to kya, mai to Hijaazi hai meri Naghma Hindi hai to kya, lai to Hijaazi hai meri !