Chapter 81

Vi_81

nānnam āsanam āropayet // Vi_81.1 //

na padā spṛśet // Vi_81.2 //

nāvakṣutaṃ kuryāt // Vi_81.3 //

tilaiḥ sarṣapair vā yātudhānān visarjayet // Vi_81.4 //

saṃvṛte ca śrāddhaṃ kuryāt // Vi_81.5 //

na rajasvalāṃ paśyet // Vi_81.6 //

na śvānam // Vi_81.7 //

na viḍvarāham // Vi_81.8 //

na grāmakukkuṭam // Vi_81.9 //

prayatnāt śrāddham ajasya darśayet // Vi_81.10 //

aśnīyur brāhmaṇāś ca vāgyatāḥ // Vi_81.11 //

na veṣṭitaśirasaḥ // Vi_81.12 //

na sopānatkāḥ // Vi_81.13 //

na pīṭhopahitapādāḥ // Vi_81.14 //

na hīnāṅgā adhikāṅgāḥ śrāddhaṃ paśyeyuḥ // Vi_81.15 //

na śūdrāḥ // Vi_81.16 //

na patitāḥ // Vi_81.17 //

na mahārogiṇaḥ // Vi_81.18 //

tatkālaṃ brāhmaṇaṃ brāhmaṇānumatena bhikṣukaṃ vā pūjayet // Vi_81.19 //

havir guṇān na brāhmaṇā brūyur dātrā pṛṣṭāḥ // Vi_81.20 //

yāvad ūṣmā bhavaty anne yāvad aśnanti vāgyatāḥ /

tāvad aśnanti pitaro yāvan noktā havir guṇāḥ || Vi_81.21 ||

sārvavarṇikam annādyaṃ saṃnīyāplāvya vāriṇā /

samutsṛjed bhuktavatām agrato vikiran bhuvi || Vi_81.22 ||

asaṃskṛtapramītānāṃ tyāgināṃ kulayoṣitām /

ucchiṣṭaṃ bhāgadheyaṃ syād darbheṣu vikiraś ca yaḥ || Vi_81.23 ||

uccheṣaṇaṃ bhūmigatam ajihmasyāśaṭhasya ca /

dāsavargasya tat pitrye bhāgadheyaṃ pracakṣate || Vi_81.24 ||