Chapter 67

Vi_67

athāgniṃ parisamuhya paryukṣya paristīrya pariṣicya sarvataḥ pākād agram uddhṛtya juhuyāt // Vi_67.1 //

vāsudevāya saṃkarṣaṇāya pradyumnāyāniruddhāya puruṣāya satyāyācyutāya vāsudevāya // Vi_67.2 //

athāgnaye, somāya, mitrāya, varuṇāya, indrāya, indrāgnibhyāṃ, viśvebhyo devebhyaḥ, prajāpataye, anumatyai, dhanvantaraye, vāstoṣpataye, agnaye sviṣṭakṛte ca // Vi_67.3 //

tato 'nnaśeṣeṇa balim upaharet // Vi_67.4 //

bhakṣopabhakṣābhyām // Vi_67.5 //

abhitaḥ pūrveṇāgnim // Vi_67.6 //

ambā nāmāsīti, dulā nāmāsīti, nitantī nāmāsīti, cupuṇīkā nāmāsīti sarvāsām // Vi_67.7 //

nandini subhage sumaṅgali bhadraṃkarīti svaśriṣv abhipradakṣiṇam // Vi_67.8 //

sthūṇāyāṃ dhruvāyāṃ śriyai hiraṇyakeśyai vanaspatibhyaś ca // Vi_67.9 //

dharmādharmayor dvāre mṛtyave ca // Vi_67.10 //

udadhāne varuṇāya // Vi_67.11 //

viṣṇava ity ulūkhale // Vi_67.12 //

marudbhya iti dṛṣadi // Vi_67.13 //

upari śaraṇe vaiśravaṇāya rājñe bhūtebhyaś ca // Vi_67.14 //

indrāyendrapuruṣebhyaś ceti pūrvārdhe // Vi_67.15 //

yamāya yamapuruṣebhya iti dakṣinārdhe // Vi_67.16 //

varuṇāya varuṇapuruṣebhya iti paścārdhe // Vi_67.17 //

somāya somapuruṣebhya ity uttarārdhe // Vi_67.18 //

brahmaṇe brahmapuruṣebhya iti madhye // Vi_67.19 //

ūrdhvam ākāśāya // Vi_67.20 //

sthaṇḍile divācarebhyo bhūtebhya iti divā // Vi_67.21 //

naktaṃcarebhya iti naktam // Vi_67.22 //

tato *dakṣiṇāgreṣu darbheṣu pitre pitāmahāya prapitāmahāya mātre pitāmahyai prapitāmahyai nāmagotrābhyāṃ ca piṇḍanirvāpaṇaṃ kuryāt [dakṣiṇagreṣu] // Vi_67.23 //

piṇḍānāṃ cānulepanapuṣpadhūpanaivedyādi dadyāt // Vi_67.24 //

udakakalaśam upanidhāya svastyayanaṃ vācayet // Vi_67.25 //

śvakākaśvapacānāṃ bhuvi nirvapet // Vi_67.26 //

bhikṣāṃ ca dadyāt // Vi_67.27 //

atithipūjane ca paraṃ yatnam ātiṣṭheta // Vi_67.28 //

sāyam atithiṃ prāptaṃ prayatnenārcayet // Vi_67.29 //

anāśitam atithiṃ gṛhe na vāsayet // Vi_67.30 //

yathā varṇānāṃ brāhmaṇaḥ prabhur yathā strīṇāṃ bhartā tathā gṛhasthasyātithiḥ // Vi_67.31 //

tatpūjayā svargam āpnoti // Vi_67.32 //

atithir yasya bhagnāśo gṛhāt pratinivartate /

tasmāt sukṛtam ādāya duṣkṛtaṃ tu prayacchati || Vi_67.33 ||

ekarātraṃ hi nivasann atithir brāhmaṇaḥ smṛtaḥ /

anityaṃ hi sthito yasmāt tasmād atithir ucyate || Vi_67.34 ||

naikagrāmīṇam atithiṃ vipraṃ sāṃgatikaṃ tathā /

upasthitaṃ gṛhe vindyād bhāryā yatrāgnayo 'pi vā || Vi_67.35 ||

yadi tv atithidharmeṇa kṣatriyo gṛham āgataḥ /

bhuktavatsu ca vipresu kāmaṃ tam api bhojayet || Vi_67.36 ||

vaiśyaśūdrāv api prāptau kuṭumbe 'tithidharmiṇau /

bhojayet saha bhṛtyais tāv ānṛśaṃsyaṃ prayojayan || Vi_67.37 ||

itarān api sakhyādīn saṃprītyā gṛham āgatān /

prakṛtānnaṃ yathāśakti bhojayet saha bhāryayā || Vi_67.38 ||

svavāsinīṃ kumārīṃ ca rogiṇīṃ gurviṇīṃ tathā /

atithibhyo 'gra evaitān bhojayed avicārayan || Vi_67.39 ||

adattvā yas tu etebhyaḥ pūrvaṃ bhuṅkte 'vicakṣaṇaḥ /

bhuñjāno na sa jānāti śvagṛdhrair jagdhim ātmanaḥ || Vi_67.40 ||

bhuktavatsu ca vipreṣu sveṣu bhṛtyeṣu caiva hi /

bhuñjīyātāṃ tataḥ paścād avaśiṣṭaṃ tu daṃpatī || Vi_67.41 ||

devān pitṝn manuṣyāṃś ca bhṛtyān gṛhyāś ca devatāḥ /

pūjayitvā tataḥ paścād gṛhasthaḥ śeṣabhug bhavet || Vi_67.42 ||

aghaṃ sa kevalaṃ bhuṅkte yaḥ pacaty ātmakāraṇāt /

yajñaśiṣṭāśanaṃ hy etat satām annaṃ vidhīyate || Vi_67.43 ||

svādhyāyenāgnihotreṇa yajñena tapasā tathā /

na cāpnoti gṛhī lokān yathā tv atithipūjanāt || Vi_67.44 ||

sāyaṃ prātas tv atithaye pradadyād āsanodake /

annaṃ caiva yathāśaktyā satkṛtya vidhipūrvakam || Vi_67.45 ||

pratiśrayaṃ tathā śayyāṃ pādābhyaṅgaṃ sadīpakam /

pratyekadānenāpnoti gopradānasamaṃ phalam || Vi_67.46 ||