Chapter 64

Vi_64

paranipāneṣu na snānam ācaret // Vi_64.1 //

ācaret pañca piṇḍān uddhṛtyāpas tad āpadi // Vi_64.2 //

nājīrṇe // Vi_64.3 //

na cāturaḥ // Vi_64.4 //

na nagnaḥ // Vi_64.5 //

na rātrau // Vi_64.6 //

rāhudarśanavarjam // Vi_64.7 //

na saṃdhyayoḥ // Vi_64.8 //

prātaḥsnānaśīlo 'ruṇatāmrāṃ prācīm ālokya snāyāt // Vi_64.9 //

snātaḥ śiro nāvadhunet // Vi_64.10 //

nāṅgebhyas toyam uddharet // Vi_64.11 //

na tailavat saṃspṛśet // Vi_64.12 //

nāprakṣālitaṃ pūrvadhṛtaṃ vasanaṃ bibhṛyāt // Vi_64.13 //

snāta eva soṣṇīṣe dhaute vāsasī bibhṛyāt // Vi_64.14 //

na mlecchāntyajapatitaiḥ saha saṃbhāṣaṇaṃ kuryāt // Vi_64.15 //

snāyāt prasravaṇadevakhātasarovareṣu // Vi_64.16 //

uddhṛtāt bhūmiṣṭham udakaṃ puṇyaṃ, sthāvarāt prasravat, tasmān nādeyaṃ, tasmād api sādhuparigṛhītaṃ, sarvata eva gāṅgam // Vi_64.17 //

mṛttoyaiḥ kṛtamalāpakaṛṣo 'psu nimajjyopaviśyāpo hi ṣṭheti tisṛbhir hiraṇyavarṇeti catasṛbhir idam āpaḥ pravahateti ca tīrtham abhimantrayet // Vi_64.18 //

tato 'psu nimagnas trir aghamarṣaṇaṃ japet // Vi_64.19 //

tadviṣṇoḥ paramaṃ padam iti vā // Vi_64.20 //

drupadāṃ sāvitrīṃ ca // Vi_64.21 //

yuñjate mana ity anuvākaṃ vā // Vi_64.22 //

puruṣasūktaṃ vā // Vi_64.23 //

snātaś cārdravāsā devapitṛtarpaṇam ambhaḥstha eva kuryāt // Vi_64.24 //

parivartitavāsāś cet tīrtham uttīrya // Vi_64.25 //

akṛtvā devapitṛtarpaṇaṃ snānaśāṭīṃ na pīḍayet // Vi_64.26 //

snātvācamya vidhivad upaspṛśet // Vi_64.27 //

puruṣasūktena pratyṛcaṃ puruṣāya puṣpāni dadyāt // Vi_64.28 //

udakāñjalīṃś ca // Vi_64.29 //

ādāv eva daivena tīrthena devānāṃ tarpaṇaṃ kuryāt // Vi_64.30 //

tadanantaraṃ pitryeṇa pitṝṇām // Vi_64.31 //

tatrādau svavaṃśyānāṃ tarpaṇaṃ kuryāt // Vi_64.32 //

tataḥ saṃbandhibāndhavānām // Vi_64.33 //

tataḥ suhṛdām // Vi_64.34 //

evaṃ nityasnāyī syāt // Vi_64.35 //

snātaś ca pavitrāṇi yathāśakti japet // Vi_64.36 //

viśeṣataḥ sāvitrīm // Vi_64.37 //

puruṣasūktaṃ ca // Vi_64.38 //

naitābhyām adhikam asti // Vi_64.39 //

snāto 'dhikārī bhavati daive pitrye ca karmaṇi /

pavitrāṇāṃ tathā japye dāne ca vidhibodhite || Vi_64.40 ||

alaksmīḥ kālakarṇī ca duḥsvapnaṃ durvicintitam /

abmātreṇābhiṣiktasya naśyanta iti dhāraṇā || Vi_64.41 ||

yāmyaṃ hi yātanāduḥkhaṃ nityasnāyī na paśyati /

nityasnānena pūyante ye 'pi pāpakṛto narāḥ || Vi_64.42 ||